1Ē i taua au rā ra, tē ma'ata 'ua maira te au pipi ra, kua tarotaro i'ora te 'Ēbera reo Eleni i te 'Ēbera tumu, nō te mea, kāre i 'ākono meitaki'ia tā rātou au va'ine taka'ua i te tu'a'anga 'apinga i te au rā katoa ra.
2Ē kua 'akaputuputu maira te ta'i nga'uru mā rua ra i te au pipi 'e mānganui, ē kua nā kō atura, “Kāre i te mea tau i a mātou kia kōpae i te ako'anga i te tuatua a te Atua, ka raverave ei i te au kaingākai ra.
3Ē tēnā na, e te au taeake, e kimi mai kōtou mei rotopū i a kōtou 'ua'orāi e 'itu au tangata rongo meitaki, tei kī i te Vaerua ē te pakari, ko tā mātou ia e 'akatao'onga nō te reira 'anga'anga.
4Kāreka mātou nei, ka 'akatinamou mātou i te pure ē te ako'anga.”
5Mareka rava atura te au tangata kātoatoa i te reira tuatua ē kua 'iki i'ora rātou i a Setephano, 'e tangata kī i te Vaerua Tapu ē te 'akarongo ma'ata, ē Philipa, ē Porokoro, ē Nikanora, ē Timona, ē Paremena, ē Nikolao, 'e tangata tei 'āriki i te 'ākono'anga Ngāti Iūda, nō Ānētiōka mai.
6Ko tā rātou ia i tuku atu ki mua i te au 'āpōsetolo ra, ē i muri ake i te pure'anga, kua tuku atura te au 'āpōsetolo i tō rātou rima ki runga a'o i a rātou ra.
7Pararauare atura te tuatua a te Atua. 'E ma'ata rava atura 'oki te au pipi i Iērūsalēma ra, ē 'e mānganui katoa 'oki te kau ta'unga i 'āriki i te 'akarongo ra.
Te 'opu'anga'ia a Setephano8Ē ko Setephano tei kī i te aro'a 'ua ē te mana ririnui, rave atura i te au mea ūmeremere ē te au 'akairo ma'ata i rotopū i te au tangata ra.
9Kua tū akera tēta'i pae tangata o te sūnago tei tapa'ia ra ē nō te Libetino, ē tō Kurene, ē tō Ālekānētēria, ē tō Kilikia ē Āsia, i te taumārō'anga mai ki a Setephano,
10inārā, kāre atura i rauka i a rātou i te pāto'i atu i te pakari ē te vaerua o tāna i tuatua ra.
11Kua tiki atura rātou i ēta'i tangata kia tuatua pikika'a ē, “Kua 'akarongo mātou i aia i te tuatua'anga i te tuatua 'akakino i a Mōse ē te Atua!”
12Ē kua tāoriori atura rātou i te tangata ē te aronga pakari ē te au Pū'āpi'i Ture, ē kua 'aere maira rātou ki aia ē kua 'opu maira i aia, ē kua arataki atura i aia ki mua i te Sūnēderi.
13Ē kua tuku atura 'oki i te au kite pikika'a ra ko tei tuatua ē, “Kāre tēianei tangata e tukutuku i te tuatua mai i te au tuatua 'akakino i tēianei ngā'i tapu ē te Ture.
14Kua 'akarongo 'oki mātou i aia i te tuatua'anga ē, ‘Ka pou tēianei ngā'i i taua Iēsū o Nāzarēta ra ē ka 'akatūkē'ia te au peu tā Mōse i tuku mai ki a tātou nei.’ ”
15Ē tē tīroi matariki maira rātou kātoatoa i roto i te Sūnēderi ra i aia, kite atura i tōna mata mei te mata rāi o te 'āngela ra.
Who We AreWhat We EelieveWhat We Do
2025 by iamachristian.org,Inc All rights reserved.
