Ephesia 3 - Cook Island Maori Revised New Testament(CIMRNT)

Tā Paulo 'anga'anga nō te au 'ētene

1Nō reira 'oki, ko au nei, ko Paulo, 'e tāvini nō te Mesia ko Iēsū, i mou'āuri ei nō tāku 'anga'anga ki ō kōtou, te au 'ētene na.

2'E mea pāpū ē, kua 'akarongorongo kōtou ē, kua 'ōronga'ia mai e te Atua ki āku te aro'a 'ua o te tao'onga 'ēvangelia nō kōtou;

3ē kua 'akakite'ia mai ki āku te mea muna ngaro nā roto i te tuatua 'e'eu'ia, mei tāku 'oki i tātā poto atu ana ki a kōtou na i mua atu ana.

4Kol 1.26,27Ē mē tatau kōtou i te reira, ka mārama rāi kōtou i tōku kite i taua mea muna ngaro ra a te Mesia.

5Kāre te reira i 'akakite'ia mai ki te tangata o te au uki i muatangāna ra, mei tei 'akaāri'ia mai i tēianei e te Vaerua ki tāna au 'āpōsetolo tapu ē te au peroveta ra.

6Ko tēia taua mea muna ngaro ra: nā roto i te 'ēvangelia kua riro mai te au 'ētene 'ei aronga tu'anga katoa i te kāpiti'ia'anga mai ki taua kōpapa 'okota'i ra, ē ka rauka katoa i a rātou te au mea i papa'u'ia maira nō te tā'okota'i'anga ki te Mesia ra ko Iēsū.

7I 'akariro'ia ai 'oki au 'ei tāvini nō taua 'ēvangelia kia tau ki te aro'a 'ua tā te Atua i tuku aro'a 'ua mai ki āku nā roto i tāna rāvenga mana ririnui.

8Ko au nei 'oki, tei iti rava i tei iti o te aronga tapu rava rāi, i 'ōronga'ia mai tēia aro'a 'ua nei, kia tūtū 'aere au ki te au 'ētene i tō te Mesia meitaki ma'ata kiteakore kia kimi ra;

9ē kia 'akamārama au i te au tangata rava rāi ē, 'e a'a tā te Atua rāvenga i te 'akatupu'anga i tōna 'akakoro'anga i 'u'una'ia mei muatangāna mai o tēianei ao i roto i te Atua, ko tei 'anga i te au 'apinga rava rāi.

10Ko tōna 'akakoro'anga 'oki kia 'akakite'ia mai i tēianei te pakari tūmatatini o te Atua ki te au manārangi ē te au tūtara i te ao ra nā roto i tāna 'ēkālēsia,

11mei tei tau ki tōna 'akakoro'anga mei muatangāna mai, tāna i 'akatupu nā roto i te Mesia ko Iēsū, tō tātou 'Atu.

12Nā roto i tō tātou 'irinaki'anga i aia ē te tā'okota'i'anga atu ki aia e tae atu ei tātou ma te matakukore ē te māro'iro'i tikāi ki mua i te aroaro o te Atua.

13Nō reira, tē pati atu nei au ki a kōtou, 'eia'a kōtou e taitaiā i tōku nei au mate nō kōtou; ko tō kōtou 'oki ia kakā.

Te aro'a o te Mesia

14Nō reira 'oki au i tuturi ei ki raro ki mua i te aroaro o te Metua,

15nōna 'oki te ingoa i tapa'ia ki te kōpū tangata rava rāi tō runga i te rangi ē tō te ao katoa nei.

16Ē tē pati nei au kia 'ōronga mai aia ki a kōtou mei roto mai i te ma'ata o tōna kakā i te māro'iro'i, ē kia 'akaketaketa'ia mai kōtou i te pae vaerua nā roto i tōna Vaerua,

17ē kia no'o te Mesia i roto i tō kōtou ngākau nā roto i te 'akarongo. Tē pati katoa nei au kia aka'ia ē kia 'akatumu'ia kōtou ki roto i te aro'a,

18kia rauka i reira i a kōtou ē te aronga tapu kātoatoa ra te nakiro mou tikāi i te tīpoto ē te tīroa, i te teitei ē te 'ō'onu o te aro'a o te Mesia.

19Ē kia kite rāi kōtou i te reira aro'a, noa atu ē, kāre e taea e te kite tangata nei. Kia 'akakī'ia kōtou i reira ki te kī katoa o te Atua ra.

20'E ma'ata rava atu tā te Atua rāvenga i te au mea katoa tā tātou e pati nei ē tā tātou e manako nei, nā roto i te mana e 'anga'anga nei i roto i a tātou.

21'Ei aia te kakā i roto i te 'ēkālēsia ē i roto i te Mesia i a Iēsū, e 'ope 'ua atu te au uki rava rāi e tuātatau 'ua atu. Āmene.