1Kua kitea'ia tēta'i 'akairo i te rangi, koia 'oki, 'e va'ine i kāka'u'ia i te rā ē tei raro ake te marama i ōna vaevae, ē tei runga a'o i tōna ūpoko tēta'i korōna 'ētū rau nga'uru mā rua.
2Kua nui aia, ē kua kāpikipiki ma'ata ē kua auē aia i te mamae 'ānau.
3 Dan 7.7 Kua kitea'ia tēta'i 'akairo kē i te rangi. Inā, 'e tā'ae kutekute, e 'itu ōna mīmiti, e ta'i nga'uru ōna tara, ē e 'itu korōna i runga a'o i ōna mīmiti.
4Dan 8.10Kua kika'ia e tōna 'iku te toru o te tu'anga o te au 'ētū o te rangi ē kua tīria mai ki runga i te 'enua. Kua tū i'ora taua tā'ae ra i mua i te va'ine tei vaitata i te 'ānau kia rauka i aia i te kai i tāna tama mē 'ānau aia.
5a: Isa 66.7; b: Sal 2.9Kua 'ānau i'ora aia i tāna tama, 'e tamāroa 'oki, ko te ka tūtara i te au 'iti tangata rava rāi ki te sepeta 'āuri ra. Kua 'apaina'ia taua tamaiti ra ki te Atua ē ki tōna terōno.
6Kua 'oro kē atura te va'ine ki roto i te mētēpara, ki te ngā'i i 'akate'ate'amamao'ia e te Atua nōna, kia utuutu'ia aia i reira e 'okota'i tauatini e rua 'ānere ē ono nga'uru rā.
7 Dan 10.13,21; 12.1; Iuda 1.9 'E tamaki atura i te rangi, ko Mikaela ē tāna au 'āngela tei tamaki atu i te tā'ae. Kua tamaki katoa mai te tā'ae ē tāna au 'āngela.
8Kāre rā aia i māro'iro'i rava, ē kāre atura ō rātou ngā'i 'aka'ou i te rangi.
9a: Gen 3.1; b: Luk 10.18Tīria atura 'oki te tā'ae ma'ata ki te 'enua nei. Ko te 'ōvī ta'ito ra ia, tei tapa'ia ko te Tiāporo ē ko Sātani, ē tei arataki kē atu i te ao katoa nei. Kua tīria tāna au 'āngela ma ia katoa.
10 Iob 1.9-11; Zek 3.1 Kua 'akarongo atura au i tēta'i reo ma'ata i te rangi i te nā kō'anga mai, “I tēianei i tae mai ei te rāvenga ora, te ririnui ē te bāsileia o tō tātou Atua ē te mana o tāna Mesia. Ko tei 'aka'apa i tō tātou au taeake, kua tīria 'oki ki raro. Kua 'aka'apa 'oki aia i a rātou i te pō ē te ao i mua i te aroaro o tō tātou Atua.
11Kua 'autū rā rātou i aia nā roto i te toto o te Punua Māmoe ē nā roto i te karere tā rātou i 'akakitekite ra, ē kāre rātou i nā mua i te kimikimi i tō rātou ora, kua tāmou tikāi rā te karere e tae 'ua atu ki te mate.
12Ē nō reira, e rekareka ma'ata, e te au rangi ē tei no'o i roto i te reira ē! Auē te 'enua ē te moana ē! Kua 'aere mai te Tiāporo ki raro ki a kōrua ma te riri ma'ata, nō tōna kite 'oki ē, 'e mānga tuātau poto 'ua tōna e toe.”
13Kia mārama te tā'ae ē, kua tīria aia ki runga i te 'enua, kua aruaru aia i te va'ine tei 'ānau i te tamāroa.
14Dan 7.25; 12.7Kua 'ōronga'ia i'ora ki taua va'ine ra ngā pē'au e rua o te 'āeto ma'ata kia rere atu aia ki te mētēpara ki tōna ngā'i, kia mamao kē aia mei te mata o taua 'ōvī ra ē kia 'āngai'ia aia i reira kia 'ope kia 'ope e toru ē te 'āpa mata'iti.
15Kua 'akapu'aki atura te 'ōvī i te vai mei roto mai i tōna va'a i muri i'o i taua va'ine ra, mei te kauvai rāi te tū, kia 'apai kē'ia aia e taua kauvai ra.
16Kua tauturu rā te 'enua i taua va'ine ra. Kua 'āmama te 'enua i tōna va'a, ē kua 'āpuku i te kauvai tā te tā'ae i 'akapu'aki mei roto mai i tōna va'a.
17Kua riri atura te tā'ae i taua va'ine ra, ē kua 'aere atura aia i te tamaki atu i tāna 'uānga toe, ko te aronga 'oki tē 'ākonokono i te au 'akaue'anga a te Atua ē tei a rātou te tuatua 'akakite a Iēsū.
18E kua tū i'ora aia ki runga i te one ta'atai.
Who We AreWhat We EelieveWhat We Do
2025 by iamachristian.org,Inc All rights reserved.
