2 Petero 1 - Cook Island Maori Revised New Testament(CIMRNT)

Aro'a'anga

1Ko au, ko Simona Pētero, 'e tāvini ē 'e 'āpōsetolo nā Iēsū Mesia, tē tātā atu nei au ki a kōtou, te aronga i rauka katoa taua 'akarongo meitaki ma'ata mei a mātou nei rāi, nā roto i te tuatua tika a tō tātou Atua ē te 'Akaora ko Iēsū Mesia ra.

2Kia ma'ata 'ua atu rāi te aro'a 'ua ē te 'au ki a kōtou nā roto i tō kōtou kite i te Atua ē i a Iēsū tō tātou 'Atu.

Te ora'anga tau i te aronga tei āru i te 'Atu

3Nā tō Iēsū mana Atua i 'ōronga 'ua mai ki a tātou i te au mea kātoatoa tei tau ki te ora'anga ē ki te 'ākono Atua. Kua kāpiki mai 'oki aia i a tātou nā roto i te kite mou kia tū tātou i tōna 'ua'orāi kakā ē te tūranga meitaki.

4Nā roto i te reira i 'ōronga'ia mai ei ki a tātou te au papa'u'anga meitaki ē te pu'apinga ma'ata rava: koia 'oki, kia rauka i a kōtou i te rere kē atu i te mate e vai nei i tēianei ao i roto i te au 'inangaro tikakore, ē kia tū rāi kōtou i te tū Atua.

5Ē nō reira, e tautā pakari kia kāpiti kōtou i te tū meitaki ki tō kōtou 'akarongo, ē i te kite mou ki te tū meitaki,

6ē i te no'o mārie ki te kite mou, ē i te 'akakoromaki ki te no'o mārie, ē i te 'ākono Atua ki te 'akakoromaki,

7ē i te aro'a taeake ki te 'ākono Atua, ē i te aro'a i te tangata kātoatoa ki te aro'a taeake 'oki.

8Mē tei a kōtou 'oki te reira au mea, ē tē tupu rāi kia ma'ata atu, ka 'akapāpū te reira ē kāre tō kōtou kite i tō tātou 'Atu i a Iēsū Mesia 'e mea pu'apingakore ē te 'u'uakore.

9Ko te tangata rā kāre i aia tēia au mea, kua tōpiri aia i ōna mata, 'e matapō ia, ē kua ngaropōina i aia ē, kua tāmā'ia tāna au 'ara muatangāna ra.

10E aku au taeake ē, kua kāpiki'ia ē kua 'iki'ia kōtou. E tautā ma'ata atu kia tau meitaki kōtou ki te reira. Kia pērā 'oki kōtou, kāre 'ua ia e 'inga.

11Ē ka 'ōronga'ia mai 'oki ki a kōtou tēta'i 'āriki'anga kakā ki roto i te bāsileia mutukore o tō tātou 'Atu ē te 'Akaora ko Iēsū Mesia.

12Nō reira, kāre 'ua au e tīvata i te 'akama'ara atu ki a kōtou i tēia au mea nei, noa atu ē, kua mārama rāi kōtou, ē kua 'akatinamou'ia rāi kōtou i tēia tuatua mou nei.

13Tē manako nei 'oki au ē, 'e mea tika kia 'aka'ōu 'aere 'ua rāi i tēia 'akama'ara'anga i tōku no'o'anga i tēianei pū'ākapa.

14Kua mārama 'oki au ē, kua vaitata au i te 'akaruke i tēianei pū'ākapa. Nā tō tātou 'Atu, ko Iēsū Mesia, i 'akaāri mai ki āku i te reira.

15Ka tautā 'oki au kia vai mārie rāi tēianei au mea i roto i tō kōtou manako kia riro kē atu au.

Te kakā o te Mesia ē te au tuatua toto'u

16I tō mātou 'akakite'anga atu ki a kōtou i te 'aerenga kakā ma te mana o tō tātou 'Atu ra ko Iēsū Mesia, kāre mātou i 'akapu'apinga i te au tuatua tā'eke 'ua i 'akatupu'ia e te pakari tangata ra. Kua kite mata tikāi 'oki mātou i tōna tū pāpānunui.

17Māt 17.1-5; Mār 9.2-7; Luk 9.28-35Nā te Atua Metua 'oki i 'ōronga ki aia i te 'akangāteitei ē te kakā, ka tae mai ei taua reo nō roto mai i te kakā ma'ata rava i te nā kō'anga mai ē, “Ko taku Tamaiti 'akaperepere tēia, kua mareka rava au i aia.”

18Ē ko mātou 'ua'orāi 'oki ma ia katoa i runga i te maunga tapu, kua 'akarongo mātou i taua reo nō te rangi mai.

19Nō reira kua 'akapāpū ma'ata atu'ia i te tuatua a te au peroveta ki a mātou, ē 'e mea meitaki nō kōtou i te 'ākono tikāi i te reira, kia riro ia mei te lāmepa e kakā 'ua i te ngā'i pōiri ē kia ao akera, ē kia kake 'oki te 'ētū pōpongi i roto i tō kōtou ngākau.

20Kia ma'ara kōtou nā mua ē, kāre te 'āite'anga o tēta'i 'ua atu toto'u'anga i roto i te tuatua i tātā'ia ra i nā roto mai i te kimi'anga manako o te tangata tātakita'i.

21Nō te mea, kāre rava tēta'i toto'u i tae mai nō te 'inangaro tangata 'ua. Kua tuatua rā te tangata i te karere nō kō mai i te Atua i raro ake i te arataki'anga a te Vaerua Tapu.