Ephesia 6 - Cook Island Maori Revised New Testament(CIMRNT)

Tā te tamariki ē tā te au metua 'ākono'anga

1 Kol 3.20 E te au tamariki ra, e kauraro atu i tō kōtou au metua nō te 'Atu 'oki; ko te mea tika 'oki te reira.

2Exo 20.12; Deut 5.16“E 'akangāteitei atu i tō metua tāne ē tō metua va'ine.” Ko te 'akaue'anga mua tēia 'e papa'u'anga tōna, koia 'oki:

3“kia meitaki koe, ē kia 'akaroa'ia tō'ou puke rā i te 'enua nei.”

4 Kol 3.21 Ē ko kōtou, te aronga metua ē, auraka e 'akariri atu i tā kōtou tamariki. E 'āpi'i rā i a rātou ki te pakari ē te ako'anga a te 'Atu ra.

Tā te au tuika'a ē tā te au pū 'ākono'anga

5 Kol 3.22-25 E te au tuika'a ē, e kauraro atu kōtou i tō kōtou au pū i te pae kōpapa nei ma te 'akangāteitei ē te mataku, ma te tāvaita'i o te ngākau, mei te mea ra ē, tē kauraro nei kōtou i te Mesia.

6Auraka anake mē 'ākara'ia kōtou mei te aronga tārekareka tangata ra. E 'ākono rā i tō te Atua ra anoano ma te tae o te ngākau, mei te mea ē, 'e au tāvini rāi kōtou o te Mesia.

7E rave i te 'anga'anga tāvini ma te rekareka tikāi, mei te mea ē, nā te 'Atu te reira ē kāre nā te tangata.

8Kua kite 'oki kōtou ē, ko te tangata tātakita'i tei rave i tēta'i 'anga'anga meitaki, ka rauka i aia te tūtaki mei kō mai i te 'Atu; ko te tangata tuika'a, ē pērā katoa te tangata rangatira.

9 a: Kol 4.1; b: Deut 10.17; Kol 3.25 Ē ko kōtou, e te au pū ra, e pērā katoa kōtou i te 'ākono i tō kōtou aronga tuika'a. Auraka e 'akamataku 'aka'ou i a rātou. Kua kite 'oki kōtou ē, ko rātou ē ko kōtou 'okota'i rāi 'Atu tei te ao ra ia, ē kāre 'oki e piripiri tangata.

Te rākei a te tangata 'akarongo

10'Ei tā'openga, kia māro'iro'i kōtou i roto i te tā'okota'i'anga ki te 'Atu ē i roto i tōna mana ririnui.

11E kāka'u i te rākei tā te Atua i 'ōronga mai kia rauka i a kōtou i te pāruru i a kōtou i te rāvenga kāraperape a te Tiāporo ra.

12Kāre 'oki tātou e kukumi nei i te tangata, i te au manārangi rā ē te au tūtara, te au atua tei 'aka'aere i tēianei ao i tēia tuātau pōiri nei, ē te au vaerua kikino i te ao ra.

13Nō reira, e rave kōtou i te rākei a te Atua ra kia rauka i a kōtou i te pāto'i atu i te 'enemi i te rā kino ra, ē mē oti te au mea kātoatoa, kia tū rāi kōtou.

14 a: Isa 11.5; b: Isa 59.17 E tū te'ate'amamao 'oki ma te tātua'ia tō kōtou taukupu i te tuatua mou, ma te kāka'u'ia i te tuatua tika 'ei tāpoki umauma,

15Isa 52.7ē ma te 'akatāmaka'ia tō kōtou vaevae i te vai te'ate'amamao'anga nō te tūtū 'aere i te tuatua meitaki o te 'au ra;

16ma te 'apai i te 'akarongo 'ei pāruru i te au 'ati'anga rava rāi, ēnā te reira 'oki ka rauka i a kōtou i te tāmate i te au kāka'o a'i rava rāi o te Mea Kino ra.

17Isa 59.17E 'āriki mai i te rāvenga ora 'ei pare pāruru ē e rave i te tuatua a te Atua 'ei koke nō kō mai i te Vaerua ra.

18Mē pērā kōtou, e pure katoa kōtou ma te au tū pure katoa ē te pati'anga i te au 'ati'anga rava rāi mei tā te Vaerua e 'akaāri mai. Nō reira, kia māro'iro'i ē e 'akatinamou i te pure nō te aronga tapu kātoatoa ra.

19E pure katoa nōku kia 'ōronga mai te Atua ki āku i te karere tau mē tuatua au, ē kia 'akakite au ma te matakukore i te mea muna ngaro o te tuatua meitaki.

20I tēianei, ko au ko tōna karere, kua riro mai au 'ei mou'āuri nō taua tuatua meitaki rāi. E pure kia tuatua atu au ma te matakukore, mei tei tau kia tuatua atu au.

Te ve'eve'e'anga aro'a 'openga

21 Anga 20.4; 2 Timo 4.12 Kol 4.7,8 Nā Tūkiko ra, tō tātou taeake 'akaperepere ē te tāvini 'irinaki'ia i roto i te 'Atu ra, nāna e 'akakite atu ki a kōtou i te au mea kātoatoa, kia kite kōtou i te au tuatua nōku nei ē te 'anga'anga tāku e rave ra.

22Tēia tikāi te tumu i unga atu ei au i aia ki a kōtou na, kia kite kōtou i te au tuatua nō mātou ē kia 'akapūma'ana'ia tō kōtou ngākau.

23'Ei 'au ki te au taeake, ē pērā katoa te aro'a ma te 'akarongo nō kō mai i te Atua Metua ē te 'Atu ra ko Iēsū Mesia.

24Kia vai rāi te aro'a 'ua ki te aronga kātoatoa tei 'inangaro i tō tātou 'Atu i a Iēsū Mesia ma te 'inangaro 'opekore.