1Ē tē tuatua 'ua ra a Pētero ē Ioane ki te tangata tini ra, kua 'aere maira te kau ta'unga, te rangatira o te 'iero ē te au Sādukea ki a rāua.
2I māinaina 'oki rātou, i te mea kua 'āpi'i rāua i te tangata, ē kua 'akakite atu i te tū'aka'ou'anga mei te mate maira, nō Iēsū 'oki.
3Kua mou atura rātou i a rāua, tuku atura ki roto i te 'are 'āuri ē kia ao ra; kua a'ia'i 'oki i reira.
4'E mānganui 'oki te aronga tei 'akarongo ana i taua tuatua ra ē kua 'irinaki. E rima pa'a tauatini i te tāne kia tatau'ia.
5E pōpongi akera, kua putuputu maira tō rātou au tūtara, te aronga pakari ē te au Pū'āpi'i Ture i Iērūsalēma ra,
6ē te Ta'unga Ma'ata ra ko Ana, ē pērā katoa a Kaiāpha, ē Ioane, ē Ālekānēdero, ē te kātoatoa o te kōpū tangata o te Ta'unga Ma'ata ra.
7Kua tuku atura rātou i a Pētero rāua ko Ioane ki rotopū, ē kua uiui atura, “Mei te a'a te 'atu o te mana, mē kāre, nō 'ai te ingoa i rave ei kōrua i tēia?”
8Kī akera a Pētero i te Vaerua Tapu, kua pa'u atura ki a rātou, “E te aronga tūtara o te 'iti tangata ē te aronga pakari nei,
9mē tē tā'ē'ē'ia nei māua i tēianei rā nō tēta'i 'anga'anga meitaki i rave'ia ki tēta'i tangata parukā 'ua ē i 'akapē'ea i 'akaora'ia ai aia,
10kia kite kōtou ē te tangata kātoatoa o Īserā'ela nei ē, tē tū nei tēia tangata nei i mua i a kōtou ma te māro'iro'i tikāi nō te ingoa o Iēsū Mesia nō Nāzarēta tā kōtou i 'akasātauro, ē tā te Atua i 'akatū mai mei te mate maira.
11Sal 118.22Ko Iēsū rāi tēia
‘te toka i 'akava'ava'a'ia e kōtou, te aronga patu 'are,
kua 'akariro'ia i'o nei rā 'ei toka ti'avā.’
12Ē kāre rava 'oki 'e rāvenga ora i roto i tēta'i kē 'ua atu. Kāre katoa 'oki 'e ingoa kē 'ua atu i raro ake i tēianei rangi tei 'ōronga'ia mai ki te au tangata nei kia 'akaora'ia tātou nei.”
13Kua ūmere tikāi rātou i tō rātou kite'anga i te tū matakukore o Pētero rāua ko Ioane, ē tō rātou mārama katoa'anga ē, 'e ngā tangata 'āpi'ikore'ia ē te kitekore 'oki rāua. Ē kua 'ō'ō katoa rātou i a rāua ē, nō Iēsū rāi rāua.
14Ē i tō rātou kite'anga atu i te tangata 'akaora'ia ra i te tū'anga i tō rāua pae, kāre atura ā rātou tuatua 'ei pāto'i'anga atu.
15Kua 'akaue atura rātou i a rāua kia 'aere ki va'o mai i te 'uipā'anga kōnitara, ē kua 'uri'uri manako i'ora rātou i rotopū i a rātou 'ua'orāi,
16ē kua nā kō akera, “Ka 'akapē'ea atu tātou i tēianei ngā tangata nei? Kua kitea'ia 'oki e te kātoatoa tei no'o i Iērūsalēma nei ē, kua rave'ia tēta'i 'akairo vāvāria e rāua nei, ē kāre ā tātou rāvenga i te 'u'una.
17Inārā, kia kore e pararauare 'aere atu i rotopū i te 'iti tangata, e 'akamataku tātou i a rāua kia kore rava rāua e tuatua 'aka'ou ma tēia ingoa nei ki tēta'i 'ua atu tangata.”
18Kua kāpiki 'aka'ou atura rātou i a rāua, ē kua 'akaue pakari atura i a rāua, auraka rava rāua e 'āpi'i 'ua atu ē auraka rava 'oki e tuatua 'ua atu i te ingoa o Iēsū.
19Kua pa'u maira a Pētero ē Ioane ki a rātou, “E 'akamanako meitaki kōtou ē, mē kua tika āina i mua i te aroaro o te Atua kia 'akarongo atu māua i a kōtou na, ē auraka i te Atua.
20Kāre 'oki e rauka i a māua kia kore e tuatua i tā māua i kite ana ē tā māua i 'akarongo ana.”
21Kua 'akamataku 'aka'ou atu rāi rātou i a rāua ē kua tuku atura kia 'aere. Kāre 'oki rātou i kite ē ka 'akapē'ea rātou mē 'akautunga i a rāua, nō te mea, tē 'akakakā 'ua ra te tangata kātoatoa i te Atua nō tēia tei tupu.
22Tei runga ake 'oki te mata'iti o te tangata tei 'akaora'ia e taua semeio ra i te 'ā nga'uru.
Tē pati nei te aronga 'akarongo i te kaumaiti23Ē kia tuku'ia atu a Pētero rāua ko Ioane, 'aere atura rāua ki tō rāua 'ua'orāi 'iti tangata, ē 'akakite atura i tā te kau ta'unga nunui ē te aronga pakari ra i tuatua mai ana ki a rāua ra.
24Exo 20.11; Neh 9.6; Sal 146.6Ē i tō rātou 'akarongo'anga, kua tāteitei atura rātou i tō rātou reo ki te Atua ma te ngākau 'okota'i, nā kō akera, “E te 'Atu, ko koe tei 'anga i te rangi ē te 'enua nei, te moana ē te au mea kātoatoa i roto i a rātou ra.
25Sal 2.1,2Ko koe 'oki tei tuatua mai ma te Vaerua Tapu nā roto i te va'a o tō'ou tāvini, tō mātou metua ra ko Dāvida ē,
‘'E a'a te au 'ētene i roto riri 'ua ai,
ē te au 'iti tangata nei i manako 'ua ai i te au 'akakoro'anga pu'apingakore?
26Kua tū te au ariki o te ao nei ki runga,
ē kua tā'okota'i mai te au tūtara
e mārō i te 'Atu ē tāna i 'akatā'inu ra.’
27-28 a: Luk 23.7-11; b: Māt 27.1,2; Mār 15.1; Luk 23.1; Ioa 18.28,29 Kua tā'okota'i rāi 'oki rātou i roto i tēianei 'ōire, koia 'oki, ko Heroda ē Ponotio Pilato ma te au 'ētene, ē te 'iti tangata o Īserā'ela nei, kia rave rātou i te au mea katoa ra tā tō mana ē tō anoano i 'akakoro takere kia tupu ra ki tō'ou tāvini tapu i a Iēsū, tā'au i 'akatā'inu ra.
29Ē tēianei, e te 'Atu ē, e 'ākara mai koe i tā rātou nei au tāmataku'anga mai, e 'ōronga 'ua mai ki tō'ou na au tāvini i te kaumaiti tikāi kia ako rātou i tā'au na tuatua,
30ē kia rave'ia te 'akaora'anga nā roto i te 'akatika'anga i tō'ou na rima, ē kia tupu te au 'akairo ē te au mea ūmere nā roto i te ingoa o tō'ou tāvini tapu ra ko Iēsū.”
31E oti akera tā rātou pure'anga, kua ngāueue i'ora te ngā'i i 'uipā ai rātou, ē kua 'akakī'ia mai rātou rava rāi e te Vaerua Tapu, ē kua ako i'ora i te tuatua a te Atua ma te matakukore.
Tē tu'a nei te aronga 'akarongo i tō rātou au 'apinga32 Anga 2.44,45 E 'okota'i atura ngākau ē e 'okota'i 'oki vaerua tō te aronga 'e mānganui tei 'irinaki ra, ē kāre tēta'i o rātou i tuatua ē, ko tēta'i 'ua atu o tōna 'apinga ē nōna anake 'ua'orāi ia, māri rā, nō rātou kātoatoa te au mea rava rāi.
33Ē kua tinamou atu rāi te au 'āpōsetolo i te tuku'anga atu i tō rātou kite'anga i te tū'aka'ou'anga o te 'Atu o Iēsū ma te mana ma'ata. Ē 'e aro'a ma'ata 'oki tei runga i a rātou kātoatoa.
34Koia 'oki, kāre e 'okota'i i ō rātou i ngere; ko te aronga rā 'oki ē 'e kāinga, mē kāre, 'e 'are tō rātou, kua 'oko atura i te reira, ē kua 'apai maira i te moni 'oko,
35ē tuku atura ki te pae vaevae o te au 'āpōsetolo ra. E tu'a'ia i'ora ki te kātoatoa kia tau ki te tū ngere o te tangata tātakita'i.
36Ko Iōsēpha, 'e Ngāti Levi nō Kūpero mai, tei tapa'ia e te au 'āpōsetolo ra ē, ko Bānaba (ko te 'āite'anga ko te Tamaiti o te 'Akapūma'ana'anga).
37'E kāinga tōna, ē kua 'oko atura aia i te reira, ē 'apai maira i te moni ē tuku atura ki te pae vaevae o te au 'āpōsetolo ra.
Who We AreWhat We EelieveWhat We Do
2025 by iamachristian.org,Inc All rights reserved.
