Iakobo 4 - Cook Island Maori Revised New Testament(CIMRNT)

Piri'anga 'oa ki te ao nei

1Nō 'ea mai te au tamaki'anga ē te au tau'ētono'anga i roto i a kōtou na? Kāre āina nō te 'inangaro i te au mea navenave tei tamaki 'ua i roto i tō kōtou au mero?

2Tē 'inangaro 'ua ra kōtou, ē kāre rā i rauka; tē tā 'ua na kōtou ē tē umuumu ma'ata nei, ē kāre rāi i rauka; tē karo 'ua na ē tē tamaki na, ē kāre rāi i rauka ake tā kōtou i anoano, nō te mea, kāre kōtou i pati.

3Tē pati ra kōtou, ē kāre rā ā kōtou i rauka mai, nō te mea tē pati nei kōtou nō tē 'akakoro'anga kino, kia pou te ka rauka mai ki te au mea navenave tā kōtou i noinoi ra.

4E te au 'akaturi ē! Kāre āina kōtou i kite ē, ko te piri'anga 'oa ki tēianei ao, 'e 'enemi ia nō te Atua? Ko tei 'inangaro ē, 'e 'oa aia nō tēianei ao, tē 'akariro nei aia i aia 'ua'orāi 'ei 'enemi nō te Atua.

5Tē manako na kōtou ē, 'e tārevakē te tuatua i tātā'ia ra ē, “Tē 'inangaro pakari nei te Atua ma te vare'ae rāi i te Vaerua tāna i 'akano'o i roto i a tātou?”

6Mase 3.34'E ma'ata atu rā te aro'a 'ua tāna e 'ōronga mai nei. Tē nā kō maira 'oki te Tuatua Tapu ē, “E pāto'i mai te Atua i te aronga nengonengo, e 'ōronga mai rā i te aro'a 'ua ki te aronga 'aka'aka ra.”

7Nō reira, e kauraro kōtou i te Atua, e pāto'i rā i te Tiāporo ē nāna e rere kē atu.

8E 'akavaitata atu ki te Atua, ē nāna e 'akavaitata mai ki a kōtou na. E 'ōrei na i tō kōtou rima, e te aronga rave 'ara na. E tāmā na i tō kōtou ngākau, e te aronga ngākau rua na.

9Kia tatarā'ara ma'ata kōtou, kia auē ē kia maringi tō kōtou roimata; kia riro 'oki tō kōtou kata 'ei auē, ē tō kōtou rekareka 'ei tūmatetenga.

10E tā'aka'aka na i a kōtou 'ua'orāi ki mua i te aroaro o te 'Atu, ē nāna kōtou e 'akateitei.

Auraka e 'akavā i te taeake

11Auraka kōtou e uruto'e tēta'i i tēta'i. E aku au taeake, ko tei uruto'e 'oki i tōna taeake, mē kāre ra e 'aka'apa i aia, kua uruto'e ia i te Ture ē kua 'aka'apa i te Ture; ē mē 'aka'apa koe i te Ture, kāre koe i te tangata 'ākono Ture, ko tōna 'akavā rā.

12'Okota'i 'ua 'oki tuku ture ko te Atua ia, ē ko ia anake te 'akavā, 'e tika tāna kia 'akaora ē 'e tika 'oki kia tāmate rava. Ko 'ai rā koe ka 'aka'apa koe i tō'ou tangata tupu?

Auraka e 'akaparau

13 Mase 27.1 E 'akarongo mai, ko kōtou tei karanga mai ē, “Ka 'aere tātou ākōnei mē kāre, āpōpō ki te 'ōire ra ko mea, ka no'o ei i reira e kia 'okota'i mata'iti i te 'oko'oko'anga ē ka 'apinga'ia tātou.”

14Kāre rāi kōtou i kite ē, 'e a'a tō āpōpō. 'E a'a tō kōtou ora'anga nei? 'E ko'u 'ua 'oki ia tē vai nei, e roa poto akera, ngaro atura ia.

15Kia nā kō rā kōtou e tikāi, “Mē ka tika i te 'Atu ra, ka ora tātou ē ka rave i a tātou i tēia, mē kāre i tērā.”

16Tē ngākau parau nei rā kōtou i tā kōtou na 'akati'eti'e'anga. Ko taua au tū ngākau parau rava rāi 'e mea kino ia.

17Ē tēianei, ko te tangata tei kite i te meitaki tāna ka rave e tikāi, ē kāre aia i rave i te reira, kua 'ara ia.