1 Petero Nō runga i tēia leta - Cook Island Maori Revised New Testament(CIMRNT)

Nō runga i tēia letaI tēia leta nei, tē tuatua ma'ata a Pētero nō runga i te au mate. Tē 'akaāri nei aia ē, ko te au mate 'e rāvenga ia kia tāvini i te Atua, mē kāre ra, kia 'akakite i te 'akarongo, mē kāre ra, kia tīmata'ia. Kua tātā'ia tēia leta ki te au Keretitiāno tei 'akapue'urikiriki'ia i te pae tokerau o Āsia Mīnora. I taua tu'anga ra o tō Rōma bāsileia, 'e ma'ata te au Keretitiāno i tākinga kino'ia e te aronga kāre i 'āriki ana i te Mesia. Ē kua tano rāi tō te aronga 'akarongo manako ē, ka 'akapērā 'aka'ou'ia rāi rātou. Nō reira, tē 'inangaro nei a Pētero i te 'akamāro'iro'i i a rātou. Tē 'akama'ara nei tēia leta i te aronga tatau ē, pēnei ake tē 'inangaro nei te Atua kia 'aere tēta'i au tangata tei āru i aia nā roto i te tīmata'anga pakari. Kia riro rā te reira 'ei punāvai nō te rekareka, i nā Pētero ei, nō te mea, ka mātūtū tikāi tō rātou 'akarongo, ē ka riro i a rātou te kakā i te rā e 'oki 'aka'ou mai ei a Iēsū Mesia (1.6,7).Tē 'akama'ara nei a Pētero i a rātou ē, ko te Mesia tei mate i te mamae i te ao nei. Ē mē tē mate nei te aronga i āru i aia i te mamae, noa atu ē 'e au mea meitaki 'ua tā rātou i rave ana, ka rave rāi rātou ki runga i a rātou i te mamae mate o te Mesia (2.18-25; 4.12-17). Te tika'anga, kia manako te au Keretitiāno ē, kia mate rātou i te mamae nō tō rātou 'akarongo e tikāi (3.8—4.19).Inārā, nō te tū o te Atua ē nō tō te Atua 'akatū'aka'ou'anga i te Mesia mei te mate mai, 'e 'irinaki'anga tō te au Keretitiāno ki te tuātau ki mua. Mei te Mesia 'oki i mamae mate i mua ake i riro ei i aia te kakā nō kō mai i te Atua, ka tīmata katoa'ia te au Keretitiāno nā roto i te mamae mate i mua ake ka riro ei i a rātou te kakā kia 'oki 'aka'ou mai te 'Atu. Tē 'akama'ara nei a Pētero i te aronga tatau i tā te Mesia rāvenga nā roto i tēia tuatua: “I mate ana 'oki te Mesia i te mate'anga 'okota'i nō te au 'ara a te tangata kātoatoa. Ko te tangata tuatua tika 'oki tei mate nō te aronga tuatua tikakore. I pērā aia i te arataki i a kōtou ki mua i te aroaro o te Atua. Kua tāmate rava'ia aia i te pae o te kōpapa, kua rauka rā i aia te ora i te pae o te vaerua” (3.18).Te 'akano'ono'o'anga o tēia leta1. Te aro'a'anga 1.1-22. 'E tatari'anga ora tā tātou 1.3-123. Te ora'anga o te 'iti tangata tapu o te Atua 1.13—2.174. Ko te Mesia tō tātou 'ākara'anga 2.18-255. Te au Keretitiāno ē te au mamae mate 3.1—4.196. Te 'ānana a te Atua 5.1-117. Te ve'eve'e'anga aro'a 5.12-14