Apokalupo 19 - Cook Island Maori Revised New Testament(CIMRNT)

1I muri ake i taua au mea nei, 'akarongo atura au mei te mea ra ē 'e reo ma'ata nō tēta'i urupū ma'ata i runga i te rangi i te nā kō'anga ē, “Aleluia, nō tō tātou Atua te ora, te kakā ē te mana.

2Deut 32.43; 2 Arik 9.7Ko tāna au 'akavā'anga 'oki 'e mea mou ia ē te tika, nō te mea, kua 'akautunga aia i taua va'ine 'akaturi ma'ata ra tei tākinga kino i te ao nei i tāna 'akaturi'anga, ē kua 'aka'oko atu aia ki aia i te toto o tōna au tāvini tā tōna rima i 'akamaringi.”

3Isa 34.10Kua nā kō 'aka'ou akera rātou, “Aleluia, tē kake nei tōna au a'i ki runga e tuātau 'ua atu.”

4Ko te aronga pakari e rua nga'uru mā 'ā ē ngā mea ora e 'ā, kua tīpapa i'ora rātou ki mua i te Atua tei no'o i runga i te terōno, nā kō atura, “Āmene, Aleluia.”

Te 'ōro'a 'akaipoipo a te Punua Māmoe

5 Sal 115.13 Kua nā kō maira tēta'i reo mei kō mai i te terōno, “E 'akameitaki i tō tātou Atua, ko kōtou rava rāi tōna au tāvini tei mataku i aia, tei meangiti ē tei ma'ata.”

6 a: Ezek 1.24; b: Sal 93.1; 97.1; 99.1 Kua 'akarongo atura au mei te mea ra ē 'e reo nō tēta'i urupū ma'ata, mei te 'aruru o te au vai 'e mānganui, ē mei te 'aruru o te māngūngū ma'ata ra i te nā kō'anga ē, “Aleluia. Kua 'akamata 'oki te 'Atu te Atua Mana Kātoatoa i te tūtara.

7Kia rekareka tātou ē kia perepere kāvana, ē kia 'ōronga atu tātou i te kakā ki aia, kua tae mai 'oki te 'akaipoipo'anga a te Punua Māmoe, ē kua 'akate'ate'amamao'ia tāna va'ine.

8Kua tuku'ia atu ki aia tēta'i kāka'u 'ōrongā meitaki rava, 'e mea mā ē te kakā.” Ko taua kāka'u ra, ko te 'anga'anga tika ia a te aronga tapu.

9 Māt 22.2,3 Kua nā kō maira te 'āngela ki āku, “E tātā ana, 'E ao tō rātou tei pati'ia ki te umukai 'akaipoipo'anga o te Punua Māmoe.” Ē kua nā kō katoa mai aia ki āku, “'E au tuatua tika tikāi tēia nā te Atua!”

10Kua tīpapa i'ora au ki raro ki tōna pae vaevae i te 'akamori i aia. Kua tuatua mai rā aia ki āku, “Auraka koe e 'akapērā. 'E taeake tāvini 'oki au nō'ou ē nō tō'ou au taeake tei mou i te karere o Iēsū. E 'akamori i te Atua! Ko te karere 'oki o Iēsū, ko te vaerua ia o te toto'u'anga.”

Te tangata i runga a'o i te 'oro'enua teatea

11 a: Ezek 1.1; b: Sal 96.13; Isa 11.4 Kua kite atura au i te rangi i te ma'eu'anga, ē inā, 'e 'oro'enua teatea ē ko tei no'o ki runga a'o ra. Kua karanga'ia aia ē ko “'Ākono meitaki ē te Tuatua mou,” nō te mea, tē 'akavā nei aia ē tē 'akatupu nei i te tamaki ma te tuatua tika.

12Dan 10.6Tōna mata mei te mura a'i ia, ē i runga a'o i tōna mīmiti 'e mānganui te korōna. 'E ingoa tātā'ia nōna, kāre rava 'e tangata i kite māri rā ko ia 'ua'orāi.

13Kua kāka'u'ia ki te kāka'u roroa i tūto'u'ia ki roto i te toto, ē kua tapa'ia tōna ingoa ko te “Tuatua a te Atua ra.”

14Kua āru maira te nuku o te rangi i aia nā runga i te au 'oro'enua teatea, ē kua kāka'u'ia ki te kāka'u 'ōrongā meitaki rava, teatea ē te mā.

15a: Sal 2.9; b: Isa 63.3; Ioel 3.13; Apo 14.20Mei roto mai i tōna va'a kua 'aere maira tēta'i koke kokoi kia tā atu aia i te au 'iti tangata rava rāi ē kia tūtara ki runga a'o i a rātou ma te sepeta 'āuri. Ka takataka'i aia i te taomi'angā vine tei kī i te riri 'oto'oto o te Atua Mana Kātoatoa.

16Kua tātā'ia tēta'i ingoa i runga a'o i tōna kāka'u ē tōna 'ū'ā, “Ko te Ariki o te au ariki ē te 'Atu o te au 'atu ra.”

17 Ezek 39.17-20 Kua kite atura au i tēta'i 'āngela i te tū'anga i roto i te rā. Kua kāpiki maira aia ma te reo ma'ata ki te au manu rava rāi e rere nā rotopū i te māreva, nā kō maira, “E 'aere mai ē e 'akaputuputu mai nō te umukai ma'ata a te Atua ra,

18kia kai kōtou i te kiko o te au ariki, te kiko o te au rangatira, te kiko o te aronga mana, te kiko o te au 'oro'enua ē tei no'o i runga a'o ra, te kiko o te au tangata rava rāi, ko te rangatira ē te tuika'a, ko te meangiti ē te ma'ata.”

19Kua kite atura au i taua puaka tā'ae ra ē te au ariki o te ao nei ē tō rātou au nuku i putuputu'ia nō te tamaki atu i aia ko tei no'o ki runga a'o i te 'oro'enua ē tōna nuku.

20Apo 13.1-18Kua 'opukia atura te puaka tā'ae ē te peroveta pikika'a e rave nei ki mua i aia i te au 'akairo. Nā roto 'oki i te reira kua arataki kē aia i te aronga tei 'āriki i te 'akairo o te puaka tā'ae ē te aronga tē 'akamori nei i tōna tiki. Kua 'uri ora'ia atura rāua ki roto i te roto a'i e kā 'ua ra i te teio.

21Ē ko te kātoatoa tei toe mai kua tā'ia rātou i te koke mei roto mai i te va'a o tei no'o ki runga a'o i te 'oro'enua, ē kua pangia rava akera te au manu rere i tō rātou kiko.