'Anga'anga 22 - Cook Island Maori Revised New Testament(CIMRNT)

1“E tama mā ē te au taeake ma te 'ai metua nei, ka 'akarongo mai ana kōtou i tēia 'ati'anga nei i tāku tuatua 'ei pāruru i āku 'ua'orāi ki mua i a kōtou na.”

2Ē kia 'akarongo maira rātou i aia i te tuatua'anga atu ki a rātou nā roto i te reo 'Ēbera ra, kua mūtēkī tākiri rava i'ora rātou. Ē kua karanga atura aia,

3 Anga 5.34-39 “'E tangata Ngāti Iūda tikāi au, nō Tāreso i Kilikia ra tōku 'ānau'ia'anga, inārā, i tupu mai au i roto i tēianei 'ōire, ē i 'āpi'i'ia au i te pae vaevae o Gāmaliela i te tū tau tikāi nō te 'ākono'anga i te Ture tei tuku'ia mai ki tō tātou 'ai metua ra. Māro'iro'i rava akera 'oki au i tā te Atua mei a kōtou rava rāi na i tēianei rā.

4Anga 8.3; 26.9-11I tākinga kino ana au i tēia Mataara kia mate rava atu nā roto i te tāpeka'anga ē te titiri'anga atu i te au tāne ē te au va'ine katoa ki roto i te 'are 'āuri.

5Ko te Ta'unga Ma'ata ē te aronga pakari rava rāi 'oki tōku au kite. Nā rātou 'oki i 'ōronga mai i te au leta ki āku nō te au taeake Ngāti Iūda ra i Dāmāseko, ē i 'aere atu au e taki mou'āuri mai i tō reira ki Iērūsalēma nei kia 'akautunga'ia.

Tē 'akakite nei a Paulo i tōna 'aka'āriu'anga'ia('Anga'anga 9.1-19; 26.12-18)

6“I āku rā e 'aere ra i taua tere nōku ra, e vaitata atura ki Dāmāseko, mei te avatea pū, kāre akera i mamia, kua pini i'ora au i te mārama ma'ata i te kakā'anga mai nō runga mai i te rangi.

7Topa i'ora au ki raro i te one, ē kua 'akarongo akera au i tēta'i reo i te tuatua'anga mai ki āku ē, ‘E Saula, e Saula, 'e a'a koe i tākinga kino mai ei i āku?’

8Kua ui atura au, ‘E te 'Atu, ko 'ai koe?’ Kua pa'u maira aia ki āku, ‘Ko au ko Iēsū o Nāzarēta tā'au e tākinga kino mai nei.’

9Ko rātou tei āru mai i āku ra, kua kite katoa rātou i taua mārama ra, kāre rā rātou i 'akarongo i te reo o tei tuatua mai ki āku ra.

10Kua karanga atura au, ‘E te 'Atu, 'e a'a tāku ka rave?’ Kua tuatua maira te 'Atu ki āku, ‘Ka tū ki runga, ka 'aere ki Dāmāseko, 'ei reira e 'akakite'ia mai ei te au 'anga'anga kātoatoa tei 'akataka'ia tā'au ka rave.’

11Ē nō te mea, kāre i rauka i āku i te 'ākara nō te kakā 'oki o taua mārama ra, kua taki rima'ia atura au e te aronga i āru mai i āku ra, ē kua tae atura au ki Dāmāseko.

12“Ē ko tēta'i tangata, ko Ānania tōna ingoa, 'e tangata 'ākono Atua i tei tau i te Ture ra, 'e rongo meitaki 'oki tōna i te Ngāti Iūda rava rāi tei no'o ki reira,

13kua 'aere maira aia, ē kua tū maira i mua i āku ra ē kua tuatua maira ki āku, ‘E taku taeake, e Saula, kia 'ākara 'aka'ou ō'ou mata!’ I taua 'ati'anga rāi, kua 'ākara 'aka'ou akera ōku mata, ē kua kite atura au i aia.

14Ē kua tuatua maira aia, ‘Kua 'iki'ia koe e te Atua o tō tātou 'ai metua, kia kite 'oki koe i tōna anoano ē kia 'ākara koe i aia te Tangata Tuatuatika ra, ē kia 'akarongo 'oki koe i tōna 'ua'orāi reo tikāi.

15Ē ka riro 'oki koe 'ei kite nōna ki te tangata rava rāi i te au mea tā'au i 'ākara ana, ē tā'au i 'akarongo ana.

16Ē tēianei, 'eia'a e tāvarevare! Ka tū, kia bāpetīto'ia koe, ē kia tāmā'ia tā'au au 'ara i te kāpiki'anga atu i tōna ingoa.’

Tē tonokia nei a Paulo ki te au 'ētene ra

17“Ē kua 'oki 'aka'ou maira au ki Iērūsalēma nei ē tē pure ra au i roto i te 'iero, tāre'u'ia i'ora tōku manako,

18ē kite atura au i aia i te tuatua'anga mai ki āku ē, ‘E ngāko'iko'i, e 'akaruke viviki mai i a Iērūsalēma, nō te mea, kāre rātou e 'āriki mai i tā'au 'akakite'anga i āku.’

19Kua karanga atura au, ‘E te 'Atu, kua nakiro 'oki rātou ē, ko au tei 'akamou'āuri ē te pāpā i te aronga i 'irinaki i a koe ra i roto i te au sūnago rava rāi ra.

20Anga 7.58Ē kia 'akamaringi'ia 'oki te toto o Setephano, tō'ou kite ra, tē tū katoa ra au i vaitata a'o, ē kua 'akatika au i tōna mate, ē tē tiaki ra au i te kāka'u o te aronga i tā atu i aia ra.’

21Kua tuatua maira aia ki āku, ‘Ka 'aere, ka tono mamao 'oki au i a koe ki te au 'ētene ra.’ ”

Ko Paulo ē te rangatira ma'ata

22Kua 'akarongo 'oki te Ngāti Iūda i a Paulo, e tae akera ki taua tuatua nāna ra nō runga i te au 'ētene, ē kua 'akateitei atura rātou i tō rātou reo, nā kō atura, “E 'apai kē atu i tēnā na tangata mei te ao nei. Kāre 'oki e tau kia ora aia.”

23Ē tē kāpiki nui 'ua ra rātou ma te tā'iri'iri i tō rātou kāka'u ē te āū i te one ki runga.

24Kua 'akaue atura 'oki te rangatira ma'ata e kave i a Paulo ki roto i te pūnanga ma te 'akakite atu kia uiui'ia atu aia ma te pāpā atu, kia kitea'ia te tumu i kāpiki nui 'ua mai ei te au tangata i aia mei tērā te tū.

25E oti akera rātou i te tāpeka i aia ki ngā potonga kiri, kua ui atura a Paulo ki te rangatira 'ānere i tū vaitata ki aia ra ē, “E 'akatika'ia āina kia pāpā kōtou i tēta'i tangata Rōma kāre i 'akavā'ia ake?”

26I tō te rangatira 'ānere 'akarongo'anga i te reira, kua 'aere atura aia ki te rangatira ma'ata, ē kua 'akakite atura aia ki aia, nā kō atura, “'E a'a tā'au e rave nei? Ko tēia tangata nei 'oki 'e tangata Rōma aia.”

27Kua 'aere maira te rangatira ma'ata ki a Paulo, ē kua nā kō maira ki aia, “E 'akakite mai ki āku ē, 'e tangata Rōma āinei koe?”

Kua pa'u atura a Paulo, “Āe.”

28Kua karanga maira te rangatira ma'ata, “Kua 'oko'ia mai 'oki e au te au tika'anga o te tangata Rōma ki tēta'i moni ma'ata.”

Kua nā kō atura a Paulo, “Ko au, i 'ānau'ia mai au 'ei tangata Rōma.”

29I taua 'ati'anga rāi, kua 'akaātea akera te aronga te ka uiui atu i aia ra; kua mataku 'oki te rangatira ma'ata i tōna kite'anga ē, 'e tangata Rōma tikāi a Paulo, ē nāna 'oki i tāpeka i aia ki te piri'anganaoa.

Tei mua a Paulo i te Sūnēderi

30E ao akera, nō tōna 'inangaro 'oki kia pāpū meitaki i aia te tumu i 'aka'apa'ia mai ei a Paulo e te Ngāti Iūda ra, kua tatara akera aia i a Paulo, ē kua 'akaue akera aia i te kau ta'unga nunui ē te Sūnēderi katoa kia 'uipā mai, ē kua taki maira aia i a Paulo ki reira, ē kua tuku atura ki mua i a rātou.