1 Ioane 2 - Cook Island Maori Revised New Testament(CIMRNT)

Ko te Mesia tō tātou tauturu

1E aku au tamariki ra, tē tātā atu nei au i tēia au tuatua ki a kōtou kia kore kōtou e 'ara. Mei te mea rā ē, tē 'ara ra tēta'i tangata, e tauturu ia tō tātou ki mua i te Metua ra, ko Iēsū Mesia tuatua tika.

2Ē ko ia te rāvenga kia 'akakore'ia tā tātou nei au 'ara, ē kāre i tā tātou anake 'ua ia, i tā tō te ao katoa rā.

3Ē ka mārama i a tātou ē, tē kite tikāi nei tātou i aia, koia 'oki, mē 'ākono tātou i tāna au 'akaue'anga.

4Ko tei karanga ē, “Tē kite tikāi nei au i aia,” ē kāre rā aia e 'ākono i tāna au 'akaue'anga, 'e tangata pikika'a ia, ē kāre te tuatua mou i roto i aia.

5Ko tei 'ākono rā i tāna tuatua, 'e mea pāpū ē, e meitaki rava te aro'a o te Atua i roto i aia. Nā roto i te reira ka mārama i a tātou ē tei roto tātou i te Mesia.

6Ko tei karanga e te no'o nei aia i roto i te Mesia, kia 'ā'āere katoa aia mei te Mesia e 'ā'āere nei e tikāi.

Te 'akaue'anga 'ōu

7 Ioa 13.34 E aku au 'akaperepere ē, kāre i te 'akaue'anga 'ōu tāku e tātā atu nei ki a kōtou, 'e 'akaue'anga ta'ito rā, tei a kōtou rāi ia mei muatangāna mai rāi. Ko te 'akaue'anga ta'ito ko te karere ia tā kōtou i 'akarongo ana.

8'E 'akaue'anga 'ōu rā tāku e tātā atu nei ki a kōtou. Ē ko te tika o te reira kua mārama ia i roto i te Mesia ē i roto i a kōtou na, koia 'oki, tē peke atu nei te pōiri ē tē kite'ia maira te mārama mou.

9Ko te tangata e karanga ē tei roto aia i te mārama, kua mākitakita rā i tōna taeake, tei roto aia i te pōiri i tēianei rāi.

10Ko tei aro'a i tōna taeake, tē no'o nei ia i roto i te mārama, ē kāre 'e tumu i roto i aia e 'inga ai tōna taeake.

11Ko tei mākitakita rā i tōna taeake, tei roto ia i te pōiri ē tē 'ā'āere 'ua nei ia i roto i te pōiri ma te kitekore i tōna 'aerenga, nō te mea, tē 'akapōiri ra te pōiri i ōna mata.

12Tē tātā atu nei au ki a kōtou, e te au tamariki, nō te mea, kua 'akakore'ia tā kōtou au 'ara nō tōna ingoa 'oki.

13Tē tātā atu nei au ki a kōtou, e te au metua, nō te mea, tē kite nei kōtou i aia ko tei vai ana mei muatangāna mai rāi. Tē tātā atu nei au ki a kōtou, e te au māpū, nō te mea, kua ūpokotū kōtou ki runga i te Mea Kino ra.

14Tē tātā atu nei au ki a kōtou, e te au tamariki, nō te mea, tē kite nei kōtou i te Metua. Tē tātā atu nei au ki a kōtou, e te au metua, nō te mea, tē kite nei kōtou i aia ko tei vai ana mei muatangāna mai rāi. Tē tātā atu nei au ki a kōtou, e te au māpū, nō te mea, tē māro'iro'i nei kōtou ē tē no'o nei te tuatua a te Atua i roto i a kōtou; ē tē ūpokotū 'ua nei kōtou ki runga i te Mea Kino ra.

15Auraka e 'akaperepere i te ao nei, ē auraka katoa e 'akaperepere i tō te ao nei. Ko tei 'akaperepere i tō te ao nei, kāre te aro'a o te Metua i roto i aia.

16Ko te au mea katoa 'oki o te ao nei, 'e noinoi ia o te kōpapa, ē 'e noinoi o te mata, ē 'e ngākau parau nō te au 'apinga, kāre ia e nō kō mai i te Metua ra, nō tēianei ao anake rā.

17Ko te ao nei ma tōna au noinoi katoa ka ngaro ia; ko tei 'ākono rā i te anoano o te Atua ka ora ia e tuātau 'ua atu.

Te Pāto'i Mesia

18E aku au tamariki ra, ko te tuātau 'openga tēia. Ē mei tā kōtou i 'akarongo ra ē, ka tae mai te Pāto'i Mesia. Kua tae tikāi mai i tēianei te au pāto'i Mesia 'e mānganui. Nō reira, tē kite nei tātou ē, ko te tuātau 'openga tēia.

19Kua 'aere atura rātou nō roto atu i a tātou. Kāre rā rātou i tō tātou tikāi. Nāringa 'oki nō tātou tikāi rātou, kua no'o rāi rātou ki ō tātou nei. Kua 'akaāri meitaki rā rātou ē, kāre rātou kātoatoa i tō tātou.

20Kua rauka 'oki i a kōtou te 'akatā'inu'anga nō kō mai i te Vaerua Tapu ra, ē tē kite nei kōtou kātoatoa i te tuatua mou.

21Kāre au i tātā ana ki a kōtou nō te mea, kāre kōtou e kite i te tuatua mou. Nō te mea rā ē, kua kite kōtou i te reira, ē kāre tākiri 'e tuatua pikika'a nā roto mai i te tuatua mou.

22Ko 'ai te tangata pikika'a, māri rā ko tei karanga ē, kāre a Iēsū i te Mesia? Ko tei kōpae i te Metua ē te Tamaiti, ko te Pāto'i Mesia ia.

23Ko tei kōpae i te Tamaiti ra, kua ngere katoa ia i te Metua; kāreka ko tei 'a'aki i te Tamaiti ra, tei aia katoa te Metua.

24Tā kōtou i 'akarongo mei muatangāna maira, kia no'o tāmou ia i roto i a kōtou. Mē ka no'o tāmou i roto i a kōtou tā kōtou i 'akarongo mei muatangāna mai, ka no'o tāmou rāi kōtou i roto i te Tamaiti ē i roto 'oki i te Metua.

25Ē tēia 'oki te mea tāna i papa'u mai ki a tātou, ko te ora mutukore ia.

26Kua tātā au i tēia au tuatua ki a kōtou nō runga 'oki i a rātou tē arataki kē nei i a kōtou.

27Ko kōtou rā, kua 'āriki mai kōtou i te 'akatā'inu'anga nō kō mai i te Mesia ra ē tē no'o tāmou nei rāi ia i roto i a kōtou. Nō reira, kāre e umuumu'ia kia 'āpi'i tēta'i tangata i a kōtou. Tē 'āpi'i nei tāna 'akatā'inu'anga i a kōtou nō runga i te au mea rava rāi. 'E tuatua mou 'oki tāna 'āpi'i'anga, ē kāre i te pikika'a. Ē mei tāna i 'āpi'i atu i a kōtou na, e no'o tāmou rāi kōtou i roto i aia.

Te tamariki a te Atua

28E aku au tamariki ē, e no'o tāmou rāi kōtou i roto i te Mesia, kia matakukore tātou mē 'akaāri'ia mai aia ē kia kore tātou e 'akamā ki mua i aia i tōna 'oki'anga mai.

29Mei te mea ē, tē kite nei kōtou ē 'e tuatua tika aia, ka mārama katoa ki a kōtou ē, ko te tangata katoa tei rave i te tika ra 'e tamaiti ia nā te Atua.