Kolosa 4 - Cook Island Maori Revised New Testament(CIMRNT)

1 Eph 6.9 E te au pū ra, e 'ākono i tā kōtou au tuika'a ma te tau ē te tika. Kua nakiro 'oki kōtou ē, 'e pū rāi tō kōtou i te rangi.

Te au ako'anga 'openga

2E tāmou mārie i te pure, ē i tā kōtou pure kia māro'iro'i i te 'akameitaki.

3E pure katoa i a mātou nei kia 'akatupu mai te Atua i tēta'i rāvenga nō mātou i te 'apai i tāna karere, koia 'oki, te tuatua nō runga i te au mea muna ngaro o te Mesia ra. Nō te reira 'oki i riro ei au 'ei mou'āuri.

4E pure kia rauka i āku i te 'akamārama meitaki i tēia karere mei tei tau i āku kia rave.

5 Eph 5.16 'Ei 'aerenga 'ākono meitaki tō kōtou ki te aronga i va'o i te 'ēkālēsia ra ma te tāporoporo mārie i tā kōtou au rāvenga.

6'Ei tuatua rekareka ē te oraora tā kōtou i te au 'ati'anga rava rāi kia rauka i a kōtou i te 'ōronga atu i te pa'u'anga e tau i te tangata tātakita'i ra.

Te ve'eve'e'anga aro'a

7 Anga 20.4; 2 Timo 4.12 Eph 6.21,22 Nā taku taeake 'akaperepere, nā Tūkiko, e 'akakite atu ki a kōtou i te au tuatua katoa nōku nei. 'E tauturu 'irinaki'ia 'oki aia ē te taeake tāvini i te 'anga'anga a te 'Atu.

8Tē tono atu nei au i aia ki a kōtou kia kite kōtou i te tuatua nō mātou, ē kia 'akapūma'ana aia i tō kōtou ngākau.

9Phlm 1.10-12Ko Onesimo, te taeake 'akaperepere ē te 'irinaki'ia, ka āru atu i aia. Nō ko nā mai 'oki aia i a kōtou. Nā rāua e 'akakite atu i te au mea katoa i tupu i konei.

10 a: Anga 19.29; 27.2; Phlm 1.24; b: Anga 12.12,25; 13.13; 15.37-39 Tē aro'a atu nei tōku 'oa i roto i te 'are 'āuri, ko Ārīsetāreko i a kōtou. Pērā katoa a Māreko, 'e piri'angā toto vaitata tōna ki a Bānaba. Kua poroki takere'ia kōtou nō runga i aia kia 'ō'ō mai kōtou i aia mē ka tae atu aia.

11Ē tē aro'a katoa atu nei a Iēsū ko tei karanga'ia i a Iūseto i a kōtou. Ko rātou anake te au tangata nō roto mai i te Ngāti Iūda tei riro mai 'ei au 'oa rave 'anga'anga nō te bāsileia o te Atua. Ē kua riro mai rātou 'ei pūma'ana nōku.

12 Kol 1.7; Phlm 1.23 Tē aro'a katoa atu nei a Ēpāphera i a kōtou. Nō kōtou na 'oki aia, ē 'e tāvini nō te Mesia nō Iēsū. Tē tāmou mārie nei aia i te pure i a kōtou mei roto mai i te 'ō'onu o tōna ngākau kia riro kōtou 'ei aronga meitaki tikāi ē kia 'ākono kōtou ma te ngākau tae i te anoano katoa o te Atua.

13Ka rauka 'oki i āku i te 'akapāpū ē, tē 'anga'anga pakari nei aia ma te ro'iro'ikore nō kōtou, ē nō Laodikea ē tō Ierapoli.

14a: 2 Timo 4.11; Phlm 1.24; b: 2 Timo 4.10; Phlm 1.24Tē aro'a atu nei a Luka, te tangata rapakau maki 'akaperepere, i a kōtou, ē pērā katoa a Dema.

15E tuku atu i te aro'a ki te au taeake i Laodikea ra, ē ki a Nūmepa 'oki ē te 'ēkālēsia i roto i tōna ngutu'are.

16Ē kia oti tēianei leta i te tatau'ia i rotopū i a kōtou na, e tuku atu kia tatau katoa'ia i roto i te 'ēkālēsia i Laodikea. Ē kia tatau katoa kōtou i tō Laodikea maira.

17Phlm 1.2Ē e karanga atu ki a Arekipo: “E 'ākono i te 'anga'anga tei tuku'ia atu ki a koe na nō te 'Atu 'oki, kia oti meitaki i a koe.”

18Ko tēia tōku aro'a, tō Paulo, ē i tātā'ia e tōku 'ua'orāi rima. Ka 'akama'ara mai i te piri'anganaoa i runga i āku nei.

'Ei a kōtou te aro'a 'ua.