1Ē kia 'akapāpū'ia ē ka tere atu mātou ki Ītālia, kua tuku atura rātou i a Paulo ma ēta'i mou'āuri ki tēta'i rangatira 'ānere nō te pupu va'e'au o Auguso, ko Iūlio tōna ingoa.
2Kua kake atura mātou ki runga i tēta'i pa'ī Āderamitiō te ka tere atu ki te au ngā'i i te pae 'enua o Āsia, ē kua tuku atura. Ko Ārīsetāreko tēta'i, 'e tangata Mākedōnia nō Tēsālōnia mai, tei āru katoa mai i a mātou.
3Ē i tērā mai rā, kua kake atu mātou ki uta i Sīdona, ē, nō te mea ē, kua tākinga meitaki mai a Iūlio i a Paulo, kua 'akatika 'ua atura aia kia 'aere 'ua ana ki tōna au 'oa kia mātuāpuru mai rātou i aia.
4Ē kua tuku atura mātou mei reira atu, nō te mea ē, tē nā mua maira te matangi i a mātou, kua tere atu mātou nā te pae raro matangi i a Kūpero.
5Ē kia 'akatere atu mātou nā te ārea moana i te tua i a Kilikia ē Pāmephūlia, kua tae atura mātou ki Mura i Lūkia ra.
6E kite atura te rangatira 'ānere i tēta'i pa'ī Ālekānētēria i reira, te ka tere atu ki Ītālia, kua tuku atura aia i a mātou ki runga a'o i taua pa'ī ra.
7Mārie tikāi tō mātou tere'anga 'e mānganui akera te au rā, ē te ngatā i te tautā'anga kia taeria atu a Kenido; ē nō te kino rāi o te matangi, kua 'akatere atura mātou nā te pae raro matangi i a Kēreta i vaitata ki Salimone.
8Ē kua ngatā rāi tō mātou tere'anga atu nā te piri 'enua o Kēreta, inārā, kua tae atu rāi mātou ki tēta'i ngā'i, ko te “Tūtau'anga Meitaki” te ingoa, ē ko Lāsea te 'ōire i vaitata.
9Kua roaroa 'oki mātou, ē kua tae kē ana te tuātau kino nō te teretere moana, nō te mea, kua oti 'oki te 'Akakore'angā Kai; ē kua 'akamatakite atura a Paulo i a rātou,
10nā kō atura, “E tama mā, tē kite nei au ē ko tēianei tere ka roko'ia tātou e te kino ē te pou ma'ata, ē kāre 'oki ē nō te au 'apinga anake 'ua ē te pa'ī, māri katoa nō tō tātou ora'anga.”
11Ko te rangatira 'ānere rā, kāre aia i 'āriki i tā Paulo i tuatua maira, kua āru rā aia i tā te rangatira pa'ī, ē tā te 'atu o te pa'ī.
12Ē nō te mea 'oki ē, kāre te reira ava e meitaki ana i te 'akaruru i te tuātau 'uri'ia, kua 'akatika te rangatira ē kia tere atu rātou mei reira atu, pēnei ake ka taeria atu a Phēnika, 'ei reira 'akaruru ei i taua tuātau 'uri'ia ra. 'E ava 'oki tēia i Kēreta tei 'āriu ki 'apatonga ē ki 'apatokerau.
Te 'uri'ia i te moana13Ē kia 'akamata te matangi tonga i te 'angi'angi mai, kua manako akera rātou ē, kua rauka tā rātou i 'inangaro, kua 'uti i'ora i te tūtau, ē kua 'akatere atura rātou nā te pae roa i a Kēreta ra.
14Kāre akera i roa rava, kua tupu maira tēta'i matangi 'uri'ia nā mua mai i a rātou, mei te tua tokerau 'itinga mai.
15Nō te mea ē, kua roko'ia viviki'ia te pa'ī e te 'uri'ia, ē kāre atura i rauka i te 'akatika ki runga i te tumu matangi, kua tuku 'ua atura mātou, ē kua pāpānu 'aere 'ua.
16Kia tere atu mātou nā te pae raro matangi o tēta'i motu, ko Kāuda te ingoa, mei kore rāi i rauka i a mātou i te tāpekapeka i te poti 'akaora.
17E oti akera te reira i te 'uti'ia mai ki runga i te pa'ī, kua 'apai atura te au mātarō i te au taura nā raro ake i te takere pa'ī 'ei 'ītikitiki rāi i te pa'ī. Ē nō tō rātou mataku ko te tīria ā'ea rātou ki runga i te ngātoro one o Sūrati, kua tuku i'ora rātou i te kie pa'ī 'ei tūtau moana, ē kua vai'o i'ora i te pa'ī kia mānu 'aere 'ua.
18Nō te ririnui i tō mātou taka'uri'uri'ia'anga e te 'uri'ia, kua 'akamata atura rātou i te 'uri i te kākō ki roto i te tai, i tērā a'o mai rā.
19Ē i te toru o te rā, nā tō rātou 'ua'orāi rima i 'uri i te 'apinga 'akatere pa'ī ki roto i te tai.
20Ē nō tei kore te rā ē te au 'ētū i kitea mai 'e mānganui akera te rā, ē te ma'ata 'ua maira te 'uri'ia, kāre rava atura ō mātou manako toe ē ka 'akaora'ia mātou.
21Ē kua roa akera kāre i kai i te kai, kua tū akera a Paulo i rotopū i a rātou, ē kua karanga atura, “E tama mā, nāringa i 'āriki'ia mai tāku ē, 'eia'a e tere mai mei Kēreta, kua ora kōtou i reira i tēianei kino ē tēianei pou.
22Inārā, tē pati atu nei au i a kōtou kia māro'iro'i kōtou, nō te mea, kāre rava te ora'anga o tēta'i o kōtou nei e kore, māri rā ko te pa'ī anake.
23Inapō 'oki, i tū mai ana tēta'i 'āngela a te Atua i mua i āku, nō te Atua 'oki au nei ē ko ia tāku e 'akamori nei,
24ē kua nā kō maira, ‘'Eia'a e mataku, e Paulo. Kia tū rāi koe ki mua i te aroaro o Kaisara e tikāi; ē inā 'oki, kua 'ōronga aro'a 'ua mai 'oki te Atua ki a koe i te ora o te aronga kātoatoa e tere nei kōtou.’
25Ē nō reira, e 'akamāro'iro'i, e tama mā, kua 'irinaki tikāi au ki te Atua ē ka tupu te reira, mei tāna rāi i tuatua mai ki āku nei.
26Inārā, ka paea rāi tātou ki runga i tēta'i 'enua e tikāi.”
27E tae akera ki te nga'uru mā 'ā o te pō, tē takanimonimo 'aere 'ua'ia ra mātou i runga i te Tai Ādēria, kua toko maira ki te au 'āōnga pa'ī i te tūruā'ipō ē, tē vaitata atu nei mātou ki tēta'i 'enua.
28Kua vāito akera rātou i te 'ō'onu o te tai, kite atura rātou ē, e rua nga'uru anga i te 'ō'onu; i muri poto mai i tō rātou tere'anga atu, kua vāito 'aka'ou i'ora rātou, ē kitea maira ē, e ta'i nga'uru mā rima anga i te 'ō'onu.
29Kua mataku akera rātou ko te tīria ā'ea rātou ki runga i te ngā'i tokatoka, kua tuku atura rātou i ngā tūtau e 'ā mei muri atu i te kōto'e pa'ī; tē 'inangaro ma'ata ra 'oki rātou kia ao.
30Kua tāmata i'ora te 'āōnga pa'ī i te 'akaruke mai i taua pa'ī ra, ē kia tuku'ia te poti 'akaora e rātou ki raro i te tai, mei te mea atura ē, kua tuku tūtau rātou ki mua i te pa'ī.
31Kua karanga atura a Paulo ki te rangatira 'ānere ē te au va'e'au, “Mē kāre tēianei aronga e no'o i runga i te pa'ī nei, kāre kōtou e ora.”
32Kua tīpū i'ora te au va'e'au i te au taura o te poti, ē kua tuku atura kia 'aere.
33Ē tē vaitata maira te 'ākirāta, kua 'akamāro'iro'i atura a Paulo i a rātou kātoatoa kia kai i te kai, nā kō atura, “Ko te nga'uru mā 'ā tēia o te rā i tō kōtou no'o tāpapa 'ua'anga ma te kaikore, ē kāre tākiri kōtou i kaikai.
34Ē nō reira, tē pati 'akatenga atu nei au ki a kōtou kia kai i te mānga, 'ei reira 'oki kōtou e ora ai; nō te mea, kāre rava tēta'i i'o rauru 'okota'i o tō kōtou na ūpoko e tākinokino'ia.”
35E oti akera aia i te tuatua'anga atu i ēia mea nei, kua rave akera aia i te mānga, kua 'akameitaki atura i te Atua i mua i a rātou kātoatoa; kua vā'i i'ora, ē kua 'akamata i'ora i te kai.
36Māro'iro'i rava akera rātou kātoatoa, ē kua kai katoa i'ora i te mānga.
37E rua 'ānere ē 'itu nga'uru mā ono mātou i te kātoatoa'anga i runga i taua pa'ī ra.
38E merengo akera rātou i te kaikai'anga, kua 'uri atura rātou i te sītona ki raro i te tai kia māmā te pa'ī.
Tē pararī nei te pa'ī39E ao akera, kāre rātou i runga i te pa'ī i pāpū tikāi ē, ko 'ai taua 'enua ra, kua kite atura rātou i tēta'i 'ākoko ma te one tea i ta'atai, ē kua 'akakoro i'ora rātou ē, mē ka rauka, e nā reira i te uru atu i te pa'ī ki uta.
40Kua tīpūpū atura rātou i te taura o ngā tūtau e tuku atura ki raro i te tai, ē te tatara katoa atu i te taura tāpeka 'oe i taua 'ati'anga rāi; kua 'uti akera rātou i te kie ō mua i te pa'ī kia kī i te matangi, ē kua tere tika atura rātou ki uta ki te one tea.
41E tae atura rātou ki tēta'i ngā'i rīpainga, kua 'akatūpā'oro'oro atura rātou i te pa'ī ki runga i te ngā'i pāpaku; mou piri'ākita atura te putāi'u o te pa'ī, ē kāre rava i ngāueue. Kāreka te kōto'e, kua vāvā'i'ia ia e te ruturutu'anga a te ngaru.
42Kua 'akakoro i'ora te au va'e'au e tāmate i te au mou'āuri kia kore rava tēta'i o rātou e kau ki uta e ora atura.
43Nō te 'inangaro rā o te rangatira 'ānere i te 'akaora i a Paulo, kua tāpū atura aia i tā rātou e 'akakoro ra, ē kua 'akaue atura aia i te aronga tei kite i te kau ra, kia rere atu nā mua ki roto i te tai, ka kau atu ei ki uta,
44ē te aronga i toe ra, kia nā runga tēta'i pae i te tapa'anga rākau, ē tēta'i pae kia nā runga i tēta'i atu 'apinga nō te pa'ī mai. I nā reira te kātoatoa rava i tae ora ai ki uta i te 'enua.
Who We AreWhat We EelieveWhat We Do
2025 by iamachristian.org,Inc All rights reserved.
