Iakobo 2 - Cook Island Maori Revised New Testament(CIMRNT)

'Akamatakite'anga i te piripiri'anga tangata

1E aku au taeake, nō te mea kua 'irinaki kōtou i tō tātou 'Atu ko Iēsū Mesia, te 'Atu o te kakā ra, auraka 'e piripiri'anga tangata i ō kōtou na.

2Mei te mea ē, tē 'aere mai nei tēta'i tangata ki roto i tō kōtou 'uipā'anga ma te tāpe'a 'auro ē ma te kāka'u mānea ra, ē tē tomo katoa mai nei tēta'i tangata puta'ua ma te kāka'u repo,

3ē tē 'akangāteitei nei kōtou i te tangata tei kāka'u'ia ki te kāka'u mānea ma te 'akakite atu ki aia ē, “E no'o koe ki konei ki te ngā'i meitaki.” Ē tē 'akakite nei rā kōtou ki te tangata puta'ua ē, “Ka tū koe ki kō atu” mē kāre ra, “E no'o koe ki konei ki taku pange vaevae.”

4Kāre āina kōtou e tūkē ki tēta'i ē e tūkē ki tēta'i, ē kua riro kōtou 'ei au 'akavā ma te tumu manako kino ra?

5Ka 'akarongo mai ana, e aku au taeake 'akaperepere ē! Kāre āinei ē ko te aronga puta'ua i te manako'anga o tō te ao nei i 'iki'ia e te Atua kia 'apinga nui rātou nō tō rātou 'irinaki'anga ē kia riro rātou 'ei aronga tu'anga i te bāsileia tāna i papa'u mai ki te aronga tei 'inangaro atu i aia?

6Ko kōtou rā, kua tā'akamā atu kōtou i te tangata puta'ua. Kāre āinei ē ko te aronga 'apinga nui ra tei tākinga kino mai i a kōtou, ē ko rātou rāi tei kika mai i a kōtou ki te 'akavā'anga?

7Kāre āinei ko rātou rāi te 'akakino nei i te ingoa meitaki tei tapa'ia ki runga i a kōtou na?

8 Lev 19.18 Mē tē 'ākono na kōtou i te ture o te bāsileia, mei tei tātā'ia ra ē, “E aro'a atu koe i tō'ou tangata tupu mei a koe 'ua'orāi,” tē rave ra kōtou i te mea meitaki.

9Mē tē 'ākono ra rā kōtou i te tū o te tangata ra, tē rave ra kōtou i te 'ara ē kua 'aka'apa'ia e te Ture 'ei aronga 'a'ati ture.

10Ko te tangata 'oki tē 'ākono ra i te Ture katoa ra, kia 'apa rā i te mea 'okota'i 'ua, kua 'apa ia i te Ture katoa.

11a: Exo 20.14; Deut 5.18; b: Exo 20.13; Deut 5.17Nō te mea, ko tei tuatua mai ē, “Auraka rava koe e 'akaturi,” ko ia rāi 'oki tei tuatua mai ē, “Auraka rava koe e tā 'ua.” Kia kore rāi koe e 'akaturi, tē tā 'ua rā koe, kua riro i a koe 'ei tangata 'a'ati ture.

12E tuatua ma te rave 'oki i te au mea katoa mei te mea ē, ka 'akavā'ia kōtou e te ture o te tū rangatira.

13'E 'akavā'anga aro'akore 'oki nō te tangata tei kore i 'akaāri i te aro'a. E vī rā te 'akavā'anga i te aro'a.

Te 'akarongo ē te 'anga'anga

14E aku au taeake, 'e a'a te pu'apinga kia tuatua mai tēta'i tangata ē 'e 'akarongo tōna, ē kāre āna 'e 'anga'anga? Ka 'akaora āina taua 'akarongo ra i aia?

15Mei te mea ē, 'e taeake mē kāre ra 'e tua'ine tēta'i tei ngere i te kāka'u ē kāre 'e kai nō taua rā ra,

16ē tēta'i o kōtou e karanga ki aia ē, “E 'aere ma te 'au; kia mā'ana'ana 'oki ē e kai kia marengo!” Inārā, kāre aia i 'ōronga atu ki aia i te au mea anoano'ia nō tōna kōpapa, 'e a'a i reira te pu'apinga?

17Pērā katoa te 'akarongo: kia vai anake 'ua aia ē kāre i āru'ia e te 'anga'anga, 'e mea mate ia.

18Pēnei ka karanga mai tēta'i ē, “'E 'akarongo tō'ou, ē 'e 'anga'anga tāku.” Tēia tāku pa'u'anga ki aia, e 'akaāri mai ki āku i tō'ou 'akarongo takakē atu mei tā'au 'anga'anga. Ko au rā ka 'akapāpū ki a koe, 'e 'akarongo tōku nā roto mai i tāku au 'anga'anga.

19Tē 'irinaki nei koe ē, e 'okota'i 'ua Atua? Meitaki! Tē 'irinaki katoa nei te au dēmoni i te reira ē tē rūtetetete nei rātou.

20E tērā ra tangata nēneva ē! Tē 'inangaro ra āina koe kia 'akaāri'ia mai ki a koe ē, 'e mea pu'apingakore te 'akarongo kāre āna 'anga'anga?

21Gen 22.1-14Kāre āina tō tātou metua ko Āberahāma i 'akatikatika'ia nō tāna 'anga'anga i te 'apai atu'anga aia i tāna tamaiti 'ei 'ātinga ki runga i te 'atarau?

22Tē kite nei koe ē, kua 'akatupu tōna 'irinaki'anga i te au 'anga'anga, ē kua riro mai te 'irinaki'anga 'ei mea meitaki rava nā roto i tāna 'anga'anga.

23a: Gen 15.6; b: 2 Par 20.7; Isa 41.8Kua tupu i reira te tuatua i tātā'ia ra tei nā kō maira ē, “Kua 'irinaki a Āberahāma i te Atua, ē kua 'āriki'ia te reira 'ei tumu 'akatikatika'anga nāna,” ē i tapa'ia ai aia 'e 'oa nō te Atua.

24Kia mārama kōtou ē, kua 'akatikatika'ia te tangata e te Atua nō tāna 'anga'anga, ē kāre nō tōna 'irinaki'anga anake 'ua.

25 Iosu 2.1-21 Ē pērā katoa, kāre āinei te va'ine 'akaturi ko Rā'aba i 'akatikatika'ia nō tāna au 'anga'anga? Kua 'āriki meitaki 'oki aia i ngā tangata 'ākarakara i te 'enua ra, ē kua tuku atura nā tēta'i mataara kē.

26Mei te kōpapa 'oki 'e mea mate ia kia kore 'e vaerua, pērā katoa te 'irinaki'anga kāre 'e 'anga'anga ra, 'e mea mate ia.