Ebera 1 - Cook Island Maori Revised New Testament(CIMRNT)

Kua tuatua mai te Atua nā roto i tāna Tamaiti

1Kua tuatua putuputu mai te Atua ki te 'ui tupuna i muatangāna nā roto mai i te au tuatua'anga rikiriki a te au peroveta.

2I tēianei rā, ko te 'openga 'oki ia o te au tuātau ra, kua tuatua maira aia ki a tātou nei nā roto mai i tāna Tamaiti. Nā roto 'oki i aia i 'anga ai te Atua i te au mea kātoatoa e vai nei, ē nō reira, ka 'akariro katoa te Atua i aia 'ei 'Atu nō te au mea rava rāi i te rā 'openga.

3Ko ia tē 'akaāri mai nei i roto i aia 'ua'orāi i te kakā o te Atua, ē tōna tū, ko te tū rāi ia o te Atua. Tē tāmou nei aia i te au mea rava rāi nā roto i tāna tuatua mana. Kua rauka i aia te 'akakore'anga i te 'ara a te tangata ē kua no'o i'ora ki te rima katau o te Atua pāpānunui i te rangi teitei.

'E ma'ata atu te Tamaiti i te au 'āngela

4Kua tuku mai te Atua ki te Tamaiti i te ingoa tei ma'ata atu i tō te au 'āngela, ē mei te reira katoa tōna tū tei ma'ata atu i tō te au 'āngela.

5a: Sal 2.7; b: 2 Sam 7.14; 1 Par 17.13Kāre 'oki te Atua i 'akakite ki tēta'i 'ua atu 'āngela ē,

“Ko koe, ko taku Tamaiti koe,

i nakōnei i riro ei au 'ei Metua nō'ou.”

Ē kāre katoa te Atua i 'akakite nō runga i tēta'i 'ua atu 'āngela ē,

“'Ei Metua au nōna,

ē 'ei Tamaiti aia i āku.”

6 Deut 32.43 I tōna tuku'anga rā i tāna tama mua ki te ao nei, kua karanga te Atua ē,

“Kia 'akamori taku au 'āngela kātoatoa i aia.”

7 Sal 104.4 Tē nā kō ra te Atua nō runga i te au 'āngela ē,

“Kua 'akariro au i taku au 'āngela mei te au matangi,

ē taku au tāvini mei te a'i kā ra.”

8 Sal 45.6,7 Nō runga rā i te Tamaiti, tē nā kō ra aia,

“Tō terōno, e te Atua ē, e vai rāi e tuātatau rava atu,

ē tē 'aka'aere nei koe i tō'ou bāsileia ma te tuatua tika.

9Kua mareka koe i te tuatua tika

ē kua mākitakita koe i te tuatua tikakore.

Nō reira, kua 'akangāteitei au, tō Atua ra, i a koe

ma te rekareka ki runga ake i tō au 'oa ra.”

10 Sal 102.25-27 Ē tē nā kō katoa ra aia nō runga i te Tamaiti ē,

“Ko koe, e te 'Atu ē, tei 'akatumu i te 'enua nei i te kāpua'anga mai,

ē te au rangi ko te 'anga'anga rāi ia a tō rima.

11Ka pou rātou, ka vai rāi koe,

ē ka piro rātou rava rāi mei te kāka'u ra.

12Ka 'atu'atu'ia rātou e koe mei te pereue rāi,

ē mei te kāka'u rāi e taui'ia,

ko koe rāi 'oki koe,

ē kāre rava tō'ou au mata'iti e 'ope.”

13 Sal 110.1 Kua karanga āinei te Atua ki tēta'i 'ua atu 'āngela ē,

“E no'o koe ki tōku rima katau nei,

e tae 'ua atu ki tōku 'akariro'anga i tō au 'enemi

'ei pange vaevae nō'ou”?

14'E a'a i reira te au 'āngela? 'E au vaerua anake rātou tei tāvini i te Atua, ē tei tonokia 'ei mātuāpuru i te aronga te ka rauka mai te rāvenga ora.