3 Ioane 1 - Cook Island Maori Revised New Testament(CIMRNT)

Te aro'a'anga

1 Anga 19.29; Rōm 16.23; 1 Kōr 1.14 Ko Ioane, te tangata pakari, ki a Gāio 'akaperepere, tāku e aro'a tika tikāi atu nei.

2E taku 'oa 'akaperepere ē, tē 'inangaro nei au kia manuia koe i te au mea rava rāi ē kia māro'iro'i i te pae kōpapa mei a koe e māro'iro'i nei i te pae vaerua.

3'E rekareka ma'ata 'oki tōku i te 'aere'anga mai o te au taeake tei 'akakite mai ē, tē 'akaāri mai nei tō'ou ora'anga i te tuatua mou, nō te tū 'oki o tō'ou 'ākono'anga i te tuatua mou.

4Kāre 'oki ōku 'e rekareka'anga ma'ata atu i tēia: kia 'akarongo au ē, tē 'ākono ra tāku au tamariki i te tuatua mou.

Te tauturu'anga ē te pāto'i'anga

5E taku 'akaperepere ē, tē rave nei koe i te mea tika ki te au taeake ra, noa atu ē, 'e au tangata kekē rātou.

6Kua tuatua mai 'oki rātou ki mua i te 'ēkālēsia nō runga i tō'ou aro'a. 'E mea meitaki ia i a koe kia tauturu koe i tō rātou tere mei tei tau i te Atua.

7Nō tōna ingoa 'oki i 'aere ei rātou, ē kāre i 'āriki 'ua atu i tā te 'ētene ra.

8Nō reira, 'e mea tau rāi kia tauturu tātou i tēia au tangata; 'ei au 'oa rave 'anga'anga 'oki tātou i reira nō te tuatua mou.

9I tātā atu ana 'oki au ki te 'ēkālēsia na, inārā, ko Dioterepe, tei 'inangaro koia anake 'ua te 'aka'aere, kāre i 'āriki mai i a mātou.

10Nō reira, mē tae atu au, ka ma'ara au i tāna i rave, koia 'oki, kua 'akakino aia i a mātou ki te tuatua kino. Kāre rā aia i rave 'ua i te reira; kāre rāi aia e 'ō'ō mai nei i te au taeake, ē tē ārai katoa nei aia i te aronga tei 'inangaro i te rave i te reira, ē tē 'akaātea nei 'oki i a rātou mei roto atu i te 'ēkālēsia.

11E taku 'akaperepere ē, auraka e āru i te kino, e āru rā i te meitaki. Ko tei rave 'oki i te meitaki ra, nō te Atua ia, ko tei rave rā i te kino, kāre ia i kite ana i te Atua.

12Kua tuatua meitaki te tangata rava rāi nō runga i a Demetērio, ē pērā katoa tāna 'āpi'i'anga i te tuatua mou; ē tē tuatua meitaki katoa nei au nō runga i aia, ē tē kite nei kōtou ē, 'e tuatua mou tāku tuatua ra.

Te ve'eve'e'anga aro'a

13'E mānganui te au manako tāku ka tātā atu ki a koe e tikāi. Inārā, kāre au e 'inangaro i te tātā atu ki a koe ki te pēni ē te 'inika.

14Tē manako nei rā au ka kite vave atu au i a koe ē ka tuatua tāua tēta'i ki tēta'i.

15'Ei a koe te 'au. Tē aro'a atu nei te au 'oa i konei i a koe na. E aro'a atu koe i te au 'oa i ko nā ma te tā'iku i tō rātou ingoa.