2 Kōrīnētia 13 - Cook Island Maori Revised New Testament(CIMRNT)

Te 'akamatakite'anga 'openga

1 Deut 17.6; 19.15 Ko te toru tēia o tōku 'aere'anga atu ki a kōtou na. Kua tātā'ia 'oki ē, “Tei te tuatua 'akakite a ngā kite tokorua, mē kāre tokotoru ra, e 'akapāpū'ia ai te au mea kātoatoa 'ei tuatua mou.”

2I te rua o tōku no'o'anga ki ō kōtou na, kua 'akamatakite takere atuna au i te aronga tei 'ara takere ana ē te kātoatoa rava; ē tē tā'oki 'aka'ou atu nei au i te reira, i āku kāre i ko nā ra: kia tae 'aka'ou atu au ra, kāre 'ua au e 'akaperepere atu i a rātou,

3nō te mea, tē umuumu maina kōtou i tēta'i 'akairo 'ei 'akapāpū ē, tē tuatua nei te Mesia nā roto i āku nei. Kāre 'oki aia i te paruparu i tāna rāvenga i rotopū i a kōtou na, 'e ririnui rā aia i roto i a kōtou na.

4I 'akasātauro'ia 'oki aia i roto i te paruparu, tē ora nei rā aia i roto i te mana ririnui o te Atua. Mei te reira katoa mātou i te paruparu i roto i aia, tē ora nei rā mātou ma ia katoa i roto i te ririnui o te Atua i rotopū i a kōtou na.

5E tīmata ana i a kōtou 'ua'orāi, mē tei roto rāi kōtou i te 'akarongo; e tā'ē'ē ana i a kōtou 'ua'orāi. Kāre āinei kōtou e kite ē, tei roto te Mesia a Iēsū i a kōtou na? Kia kore rā kōtou e kite i te reira, kua topa i a kōtou i te tā'ē'ē'anga.

6Ē tē 'irinaki nei au ē, ka kite kōtou ē, kāre mātou i topa i te tā'ē'ē'anga.

7Ē tēianei, tē pure nei mātou ki te Atua kia kore rava kōtou e rave i tēta'i 'ua atu mea kino. Kāre ē, kia kite te tangata ē kua 'autū mātou i te tā'ē'ē'anga, kia rave rā kōtou i te meitaki, noa atu ē, kua 'ākara'anga topa mātou i te tā'ē'ē'anga.

8Kāre rava tēta'i 'ua atu mea e rauka i a mātou kia rave 'ei pāto'i atu i te tuatua mou, 'ei tauturu atu rā i te reira.

9Tē rekareka nei mātou mē paruparu mātou ē te māro'iro'i ra kōtou. Ē tē pure nei mātou kia tiratiratū tikāi kōtou.

10Ko tēia 'oki te tumu i tātā atu ei au i ēia mea nei, i āku i te ātea kē mei a kōtou na, koia 'oki: kia tae atu au ra, kāre au e pāpā pakari atu i a kōtou ki te mana tā te 'Atu i 'ōronga mai ki āku nei, 'e mana 'oki kia meitaki kōtou, auraka kia kino ma'ata kōtou.

Te ve'eve'e'anga aro'a

11'Ei tā'openga, e aku au taeake, kia orana. Kia tiratiratū, e 'āriki mai i tāku pati'anga, e tā'okota'i te manako, ē e no'o ma te 'au. Ē kia no'o rāi te Atua o te aro'a ē te 'au ki rotopū i a kōtou.

12E aro'a kōtou tēta'i ki tēta'i ki te 'ongi tapu ra.

13Tē aro'a atu nei te aronga tapu rava rāi i a kōtou.

14'Ei a kōtou kātoatoa na te aro'a 'ua o te 'Atu ra ko Iēsū Mesia, ē te 'inangaro o te Atua, ē te tā'okota'i'anga o te Vaerua Tapu.