Philemona 1 - Cook Island Maori Revised New Testament(CIMRNT)

Te aro'a'anga

1'E leta tēia nō kō mai i a Paulo, 'e mou'āuri nō te Mesia ra i a Iēsū, ē nō kō mai i tō tātou taeake ko Tīmōteo, ki a koe, e Philemona 'akaperepere, tō mātou 'oa rave 'anga'anga 'ēvangelia,

2Kol 4.17ē ki te 'ēkālēsia i roto i tō'ou ngutu'are. Pērā katoa ki tō mātou tua'ine ko Apephia, ē ki a Arekipo tei pāruru i te 'ēvangelia mei a mātou nei.

3Kia 'ōronga 'ua mai te Atua tō tātou Metua ē te 'Atu ko Iēsū Mesia i te aro'a 'ua ē te 'au ki a kōtou.

Te aro'a ē te 'akarongo o Philemona

4Tē 'akameitaki atu nei au i taku Atua i te au 'ati'anga rava rāi i te tā'iku'anga i a koe i tāku nei pure,

5nō tōku 'akarongo'anga i tō'ou aro'a i te aronga tapu kātoatoa, ē i tō'ou 'irinaki'anga i te 'Atu ra i a Iēsū.

6Tē pure nei au kia riro te tā'okota'i'anga ki tō'ou 'akarongo 'ei rāvenga kia ma'ata atu te mārama nō runga i te au meitaki rava rāi tei rauka i a tātou i te rave nō te Mesia ra.

7E taku taeake, 'e rekareka ma'ata tōku ē te pūma'ana nō tō'ou aro'a. Kua 'akamareka 'oki koe i te ngākau o te aronga tapu.

Tā Paulo pati'anga nō Onesimo

8Ē tēianei, noa atu ē 'e tika'anga rāi tōku i roto i te Mesia nei i te 'akaue atu ki a koe i te mea tau,

9nō tōku aro'a rā i a koe tē pati 'ua nei au i te reira. Ko au 'oki, ko Paulo, 'e tangata metua ē 'e mou'āuri katoa i tēianei nō te Mesia ra i a Iēsū.

10Kol 4.9Tē pati 'akatenga atu nei au ki a koe nō taku tamaiti, ko Onesimo, tāku i 'ānau nō Iēsū i tōku mou'āuri'anga nei.

11'E tāvini pu'apingakore ia nō'ou i mua ana, i tēianei rā, 'e tāvini pu'apinga ma'ata ia nō'ou ē nōku katoa.

12I tōku 'aka'oki'anga atu i aia, tē tuku atu nei au i tōku 'ua'orāi ngākau ki a koe.

13I 'inangaro ana 'oki au i te tāpū i aia ki konei i āku nei 'ei tūpa'u i a koe i te mātuāpuru mai i āku i tōku mou'āuri'anga nei nō te 'ēvangelia.

14Kāre rā au i 'inangaro i te rave i tēta'i mea kāre i 'akatika'ia e koe na, kia riro 'oki tō'ou tākinga meitaki 'ei mea 'inangaro'ia tikāi, ē kāre 'ei mea umuumu'ia.

15Pēnei ake 'oki i takakē poto 'ua mai a Onesimo mei ko nā mai i a koe, kia no'o tāmou aia ki a koe e tuātau 'ua atu.

16Kāre aia i te tuika'a 'aka'ou, 'e taeake 'akaperepere rā, koia 'oki, 'e ma'ata atu i te tuika'a! 'E 'oa piri mou ia nōku nei! 'E a'a i reira te ma'ata o tō'ou piri'anga ki aia nō tōna tū tangata ē pērā katoa nō tōna piri'anga ki te 'Atu!

17Tē manako nei koe ē, e 'okota'i tāua i te 'akarongo. Nō reira, e 'āriki koe i aia mei te mea ē ko au.

18Mē kua tākinga kino aia i a koe, mē kāre ra i kaio'u ana aia ki a koe, e tuku mai koe i te reira ki runga i āku nei.

19Ko au ko Paulo, tē tātā atu nei au ki tōku 'ua'orāi rima: “Nāku e tūtaki i te reira.” Kāre rā au e tā'iku ē, kua kaio'u katoa mai koe i āku i tēta'i mea, koia 'oki, i a koe 'ua'orāi.

20Nō reira, e taku taeake, ko au, tē pati nei au kia 'akatika mai koe i tēia rekareka i roto i te 'Atu. E 'akamarū mai koe i tōku ngākau nō te Mesia 'oki.

21Tē tātā atu nei au ma te pāpū tikāi ē, ka rave koe i te reira. Tē kite nei 'oki au ē, 'e ma'ata atu tā'au ka rave i tāku e pati atu.

22Tēia katoa tēta'i: e 'akate'ate'amamao i tēta'i ngā'i nōku, nō te mea, tē mānakonako nei au ē, ka 'aka'oki'ia atu au ki a kōtou, nō tā kōtou au pure 'oki.

Te ve'eve'e'anga aro'a

23 Kol 1.7; 4.12 Ko Ēpāphera, tōku 'oa i roto i te 'are 'āuri nei nō te Mesia ra i a Iēsū, tē aro'a atu nei aia i a koe.

24a: Anga 12.12,25; 13.13; 15.37-39; Kol 4.10; b: Anga 19.29; 27.2; Kol 4.10; c: Kol 4.14; 2 Timo 4.10; d: Kol 4.14; 2 Timo 4.11Pērā katoa a Māreko, a Ārīsetāreko, a Dema ē Luka, tōku au 'oa rave 'anga'anga.

25'Ei tō kōtou na au vaerua te aro'a 'ua o tō tātou 'Atu ra i a Iēsū Mesia.