1 Petero 3 - Cook Island Maori Revised New Testament(CIMRNT)

Te au peu a te va'ine ē te tāne

1 Eph 5.22; Kol 3.18 Pērā katoa kōtou, e te au va'ine, kia 'akamōraro kōtou ki tā kōtou au tāne. Mei te mea 'oki ē, kāre ēta'i o rātou i 'āriki i te karere, ka rauka i a rātou te 'akarongo ma te kore 'e tuatua nā roto 'ua i te tū o te ora'anga ō tā rātou au va'ine.

2Tē 'ākara nei 'oki rātou i te tū mā o tō kōtou ora'anga ē tō kōtou 'akangāteitei'anga i te Atua.

31 Timo 2.9'Eia'a tō kōtou mānea i te mānea 'ua i a va'o: te 'iri i te rauru, te 'iri'iri i a kōtou ki te 'auro ē te 'a'ao i te kāka'u mānea.

4Ko te mānea rā ō roto ra, tei roto ia i te ngākau tangata, koia 'oki te mānea ngarokore o te vaerua 'au ē te marū. Ko te mea ma'ata rava ia ki te Atua.

5I 'akapērā 'oki te au va'ine tapu tei 'irinaki i te Atua i muatangāna ra i te 'akamānea i a rātou 'ua'orāi. Kua kauraro mārie rātou i tā rātou au tāne,

6Gen 18.12mei a Sara i kauraro i a Āberahāma ē i tuatua atu ki aia ē, “E taku 'atu.” Ko kōtou rāi te au tamā'ine a Sara, mei te mea ē, tē rave nei kōtou i te mea tika ma te matakukore.

7 Eph 5.25; Kol 3.19 Koia katoa kōtou, e te au tāne, kia no'o kōtou ki tā kōtou au va'ine ma te ma'ara meitaki ē, ko te tu'anga paruparu rātou. Kia 'akangāteitei kōtou i a rātou, nō te mea, ka tū katoa rātou i tā te Atua 'akameitaki'anga o te ora mutukore. I reira, kāre 'e mea e ārai i tā kōtou au pure.

Te au mate nō te tuatua tika

8'Ei tā'openga atu, kia 'okota'i rāi ō kōtou manako kātoatoa, kia ngākau 'okota'i, kia aro'a i te au taeake, kia ngākau marū, ē kia manako 'aka'aka.

9Auraka e tūtaki i te kino ki te kino ē te 'akakino mai ki te 'akakino atu, 'e ngari ake rā kia 'akameitaki atu. Nō te reira 'oki i kāpiki'ia ai kōtou, 'ei reira e rauka mai i a kōtou te 'akameitaki'anga nō kō mai i te Atua.

10Sal 34.12-16Nō te mea 'oki ē,

“Ko te 'inangaro tikāi i te ora

ē kia kite aia i te au rā meitaki,

e tāpū aia i tōna arero i te au tuatua kino,

ē i tōna ngutu i te au tuatua pikika'a.

11E 'uri kē atu aia mei te au mea kino ma te rave i te meitaki,

e kimi katoa aia i te 'au ē e aruaru i te reira.

12Tei te aronga tuatua tika 'oki te mata o te 'Atu,

ē tei tā rātou pati'anga tōna taringa;

tē kōpae nei rā aia i te aronga i rave i te kino.”

13Nā 'ai kōtou e tākinga kino mai, mē aruaru 'ua kōtou i te meitaki?

14Māt 5.10

Isa 8.12,13Mei te mea rā ē, i mate rāi kōtou nō te tuatua tika ra, 'e ao tō kōtou i reira. Auraka e mataku, mē kāre ra e taitaiā nō te tāmataku'anga a te tangata.

15E 'akangāteitei rā i te Mesia 'ei 'Atu i roto i tō kōtou ngākau.

Kia meitaki tō kōtou 'akavā ngākau

E vai te'ate'amamao 'ua rāi i te 'akakite atu ki te tangata rava rāi tei ui mai ki a kōtou ē, 'e a'a te tumu o tō kōtou mānakonako'anga.

16E rave rā i te reira ma te marū ē te 'akangāteitei, ē ma te 'akavā ngākau meitaki. I reira, ko te aronga tei 'akakino i te tū meitaki o tō kōtou ora'anga i roto i te Mesia nei, ka tā'akamā'ia rātou nō tā rātou 'akakino'anga.

17Nō te mea 'oki ē, mē 'akapērā tō te Atua anoano, 'e mea meitaki atu kia mate nō te rave i te 'anga'anga meitaki i te rave i te 'anga'anga kino.

18I mate ana 'oki te Mesia i te mate'anga 'okota'i nō te au 'ara a te tangata kātoatoa, ko te tangata tuatua tika 'oki tei mate nō te aronga tuatua tikakore. I pērā aia i te arataki i a kōtou ki mua i te aroaro o te Atua. Kua tāmate rava'ia aia i te pae o te kōpapa, kua rauka rā i aia te ora i te pae o te vaerua.

19I roto i taua Vaerua ra i 'aere ei aia 'ei ako atu ki te au vaerua i roto i te ao o te maru mate.

20Gen 6.1—7.24Ko rātou 'oki tei kaurarokore ki te Atua i muatangāna, ka tatari ei aia i a rātou ma te 'akakoromaki'anga roa i te tuātau i a Noa e tarai ra i te 'āraka. Tokoiti 'ua, koia 'oki ngā tangata tokovaru ra, tei ora i roto i te reira nā roto i te vai.

21Ko taua vai ra, 'e 'akairo te reira nō te bāpetīto'anga. Ko te bāpetīto'anga e 'akaora nei i a kōtou i tēianei. Kāre 'oki ia i te tāmā'anga i te repo mei te kōpapa mai, i te kōreromotu rā o te 'akavā ngākau meitaki ki te Atua nō te tū'aka'ou'anga o Iēsū Mesia

22e no'o nei i te rima katau o te Atua. I tōna 'aere'anga ki te rangi, kua 'akamōraro te au 'āngela ē te au manārangi tūkēkē i a rātou 'ua'orāi ki raro ake i aia.