Ebera 10 - Cook Island Maori Revised New Testament(CIMRNT)

1Ko te Ture 'e ata 'ua ia nō te au mea mēmeitaki te ka tae mai, ē kāre i te tū tika tikāi o te au mea mou. Kua 'apai tāmou'ia rāi taua au 'ātinga ra i tērā mata'iti ē i tērā mata'iti i raro ake i te Ture. Ko taua au mea ra kāre tākiri e rauka i te 'akariro i a rātou tei 'akavaitata ki te Atua 'ei au tangata tau meitaki tikāi.

2Nāringa 'oki te aronga 'akamori i tāmā'ia i te tāmā'anga 'okota'i, ē kāre tō rātou 'akavā ngākau i 'aka'apa 'aka'ōu i a rātou, kāre āina rātou i 'akamutu i te 'apai i te au 'ātinga?

3Tē 'akamā'ara'ara 'ua nei rā te 'apai'anga 'ātinga i tērā mata'iti ē i tērā mata'iti i te tangata i tā rātou au 'ara.

4Kāre rava 'oki e rauka i te toto puakatoro ē te toto puakani'o kia 'apai kē atu i te 'ara.

5 Sal 40.6-8 Nō reira 'oki kua karanga mai te Mesia, i aia ka 'aere mai ei ki te ao nei, ē,

“Kāre koe i 'inangaro i te tārangā'ara ē te 'ātinga,

kua 'ākono rā koe i tēta'i kōpapa nōku.

6Kāre 'oki koe i mareka ana i te au 'ātinga ta'una'ia

ē te au mea i 'ōronga'ia nō te au 'ara.

7Kua karanga atura au i reira, ‘Inā, e taku Atua,

tēia au nei 'ei 'ākono i tō'ou anoano,

mei te tuatua 'oki i tātā'ia nōku i roto i te Puka o te Ture.’ ”

8I reira, tē tuatua nei aia nā mua ē, “Kāre koe i 'inangaro ē kāre koe i mareka ana i te au 'ātinga taia'ia, te au pūpū'anga 'apinga, te au 'ātinga ta'una'ia ē te au tārangā'ara.” 'E au mea 'oki te reira tei 'apai'ia ana mei tei tau i te Ture.

9Ē kua nā kō akera aia i reira, “Inā, e taku Atua, tēia au nei 'ei 'ākono i tō'ou anoano.” Kua 'akakore'ia te 'ākono'anga mua kia 'akatupu'ia te rua.

10I 'akatapu'ia 'oki tātou, nō te mea, kua 'ākono a Iēsū Mesia i te anoano o te Atua nā roto i te pūpū'anga 'okota'i i tōna kōpapa.

11 Exo 29.38 Tē rave nei 'oki te kau ta'unga i tā rātou 'anga'anga i tērā rā ē i tērā rā, ē tē 'apai putuputu ra rāi i taua tū tārangā'ara ra tei kore e rauka i te 'apai kē atu i te au 'ara.

12Sal 110.1Kāreka te Mesia, oti akera aia i te 'apai i tāna 'ātinga 'okota'i 'ei tārangā'ara, tē no'o atura ia i te rima katau o te Atua ra.

13Ē tē tāpapa 'ua ra aia kia 'akariro'ia tōna au 'enemi 'ei pange vaevae nōna.

14Nā roto i taua 'ātinga 'okota'i ra i 'akariro ei aia i te aronga tāna i 'akatapu 'ei aronga meitaki tikāi e tuātau 'ua atu.

15Kua 'akapāpū katoa te Vaerua Tapu i te reira ki a tātou nā roto i te tuatua i tātā'ia ē,

16 Ier 31.33 “Tēia te kōreromotu tāku e papa'u mai ki a rātou

i muri ake i taua tuātau ra, tē nā kō maira te 'Atu,

e tuku au i tāku au ture ki roto i tō rātou ngākau,

ē e tātā au i te reira ki runga i tō rātou manako.”

17 Ier 31.34 Ē kua pērā katoa aia ē, “Ē tā rātou au kino ē tā rātou au 'ara kāre rava au e 'akama'ara 'aka'ou.”

18Mē kua 'apai kē'ia atu te au 'ara, kāre atu rāi 'e tārangā'ara 'aka'ou.

'Akamāro'iro'i'anga ē te 'akamatakite'anga

19E aku au taeake, 'e tika'anga tō tātou i te tomo ki roto i te Ngā'i Tapu Rava, nō te mea, kua mate a Iēsū nō tātou.

20Kua 'akatu'era aia i te mataara 'ōu nā roto i te ārai, 'e mataara ora 'oki nā roto i tōna kōpapa.

21Ē ko ia tō tātou Ta'unga Ma'ata i roto i tō te Atua 'are i te rangi.

22Lev 8.30; Ezek 36.25E 'akavaitata atu tātou ki te Atua ma te ngākau pikika'akore ē te 'irinaki'anga mou tikāi, nō te mea, kua 'akati'amā'ia tō tātou au 'akavā ngākau kikino, ē kua 'ōrei'ia tō tātou au kōpapa ki te vai mā.

23E mou piri tikāi tātou i te mānakonako'anga tā tātou e 'a'aki nei, nō te mea, ka rauka i te 'irinaki ē, ka 'ākono rāi te Atua i tāna i papa'u mai.

24E 'akamanako tātou tēta'i i tēta'i, kia māro'iro'i tātou i te 'akaāri i te aro'a ē te au 'anga'anga meitaki tēta'i ki tēta'i.

25Auraka e 'akatau i te 'aere ki te putuputu'anga 'akarongo mei tā tēta'i pāpāki e mātau i te rave, e 'akamāro'iro'i rā. Ē kia ma'ata atu rāi tō kōtou māro'iro'i i a kōtou e kite atu nei ē, tē vaitata mai nei te rā o te 'Atu.

26Mē kua oti te tuatua mou i te 'akakite'ia mai ki a tātou ē tē rave nei rāi tātou i te 'ara ma te 'inangaro mou tikāi, kāre atu 'e tārangā'ara toe nō tā tātou au 'ara.

27Isa 26.11Ka toe 'ua mai rā te tāpapa mātakutaku'anga i te 'akavā'anga ē te a'i kakai te ka 'akapou i te aronga tei pāto'i atu i te Atua.

28Deut 17.6; 19.15Ko tēta'i 'ua atu tei 'akava'ava'a i te Ture a Mōse ra e tāmate'ia ia ma te aro'akore, mē 'akapāpū'ia e ngā kite e tokotoru, mē kāre e tokorua.

29Exo 24.8I tō kōtou manako'anga, kāre āinei 'e utunga kino ma'ata atu e tau ki te tangata tei 'akava'ava'a i te Tamaiti a te Atua? Ē pērā katoa nō tei 'akanoa i te toto o te kōreromotu tei tāmā i aia mei tāna 'ara? Ē pērā katoa nō tei 'akakino i te Vaerua nōna te aro'a 'ua?

30a: Deut 32.35; b: Deut 32.36Kua kite 'oki tātou ē ko 'ai tei karanga ē, “Tei āku te 'aka'oko, ē nāku e tūtaki atu.” Ē kua kite katoa tātou ē ko 'ai tei karanga ē, “Nā te 'Atu e 'akavā i tōna 'ua'orāi 'iti tangata.”

31'E mea mataku'ia kia roko'ia mai e te rima o te Atua ora ra.

32E 'akama'ara kōtou i te tuātau i 'akamārama'ia ai kōtou. Kua 'akakoromaki rāi kōtou i te kukumi'anga roa ē te mamae ma'ata.

33I tēta'i taime 'oki kua 'akariro'ia kōtou 'ei mātakitaki'anga nā te kātoatoa nā roto i te au 'akakino'anga'ia ē te au tākinga kino'anga'ia. I tēta'i taime rā, kua piri tikāi kōtou ki a rātou tei 'akapērā'ia ra.

34Kua mamae kāpipiti kōtou ē te aronga mou'āuri, ē kua 'āriki rekareka kōtou kia noni'ia tā kōtou au 'apinga. Kua nakiro 'oki kōtou ē, 'e au 'apinga meitaki atu ē te tinamou rāi tā kōtou.

35Nō reira, auraka kia paruparu tō kōtou māro'iro'i; 'e tūtaki ma'ata 'oki tō te reira.

36'E mea umuumu'ia kia 'akakoromaki kōtou. Mē pērā, ka 'ākono rāi kōtou i tō te Atua anoano, ē ka rauka mai tei papa'u'ia maira.

37Hab 2.3,4Kua tātā'ia 'oki ē,

“Kia roa poto iti ake 'oki,

e tae mai ei te ka tae mai,

ē kāre rava e tāvare.

38Ko tōku tangata tuatua tika ka ora ia nā roto i tōna 'irinaki'anga i āku,

kāreka rā, ko te ka 'oki ki muri,

kāre rava au e mareka i aia.”

39Ko tātou 'oki, kāre tātou i te aronga tei 'oki ki muri ē ka roko'ia mai ei e te mate, i te aronga rā tei 'irinaki ē e rauka 'ua atu te ora.