1 Timōteo 4 - Cook Island Maori Revised New Testament(CIMRNT)

Te au pū'āpi'i pikika'a

1Tē 'akakite pū tikāi ra te Vaerua ē, ka 'akaruke tēta'i pāpāki i te 'akarongo i te tuātau ā muri atu, nō te āru'anga i te au vaerua tārurikē ē te au 'āpi'i'anga a te au dēmoni ra.

2Nā roto mai te reira i te tū tāpikipiki o te aronga kana'ete tei tā ana i tō rātou 'ua'orāi 'akavā ngākau,

3ē tē ārairai nei i te 'akaipoipo'anga ē te kai i ēta'i tū kai, tā te Atua i 'anga kia 'āriki'ia mai ma te 'akameitaki'anga e te aronga 'akarongo tei kite i te tuatua mou.

4Te au mea kātoatoa 'oki i 'anga'ia e te Atua 'e meitaki anake ia, ē kāre e tau kia kōpae'ia tēta'i 'ua atu mea mē 'āriki'ia mai ma te 'akameitaki'anga.

5Kua 'akatapu'ia 'oki te reira nā roto i te tuatua a te Atua ē te pure.

Te tāvini meitaki o te Mesia ra ko Iēsū

6Mē tē 'akaāri nei koe i tēianei au tuatua ki te au taeake, 'e tāvini meitaki koe nō te Mesia ra ko Iēsū; 'e tāvini tei 'āngai'ia ki te au tuatua o te 'akarongo ē te 'āpi'i'anga meitaki tā'au i mātau i te āru.

7Auraka rava koe e 'āriki i te au tua pu'apingakore ē te nēneva o te tangata 'ua nei. E 'akamātau 'ua rā i a koe i te 'ākono i tā te Atua.

8Ko te 'akamātau 'oki i a koe i tā te kōpapa ra, 'e pu'apinga meangiti 'ua tō te reira; kāreka ko te 'ākono i tā te Atua ra, 'e pu'apinga ma'ata roa atu tōna; 'e pu'apinga 'oki nō tēia ora'anga nei, ē pērā katoa nō te ora'anga ā muri atu.

9'E mea tau kia 'irinaki'ia tēia karere ē kia 'āriki'ia e te kātoatoa.

10Nō te reira 'oki tē 'anga'anga pakari nei tātou ē tē ro'iro'i nei, nō te mea, kua 'akatumu'ia tō tātou mānakonako'anga ki roto i te Atua ora, ko te rāvenga ora ia o te tangata kātoatoa nei, i a rātou tikāi tei 'irinaki i aia.

11E 'akaue 'ua atu ē e 'āpi'i 'ua atu i tēia karere.

12Kia kore rava tēta'i tangata e 'akava'ava'a i a koe nō tō'ou tū 'ōu, kia riro rā koe 'ei 'ākara'anga tau ki te aronga 'akarongo i tā'au tuatua, te 'aerenga tau, te aro'a, te 'irinaki'anga ē te ngākau mā.

13Kia māro'iro'i koe i te tatau'anga i te tuatua tapu ki mua i te kātoatoa, i te ako'anga ē te 'āpi'i'anga atu e tae 'ua atu au.

14'Aua e manako meangiti 'ua i te 'apinga aro'a vaerua i roto i a koe na, tei 'ōronga'ia ki a koe nā roto i tei toto'u'ia i tuku ei te aronga pakari i tō rātou rima ki runga i a koe.

15Kia 'akamanako 'ua rāi koe i tēianei au tuatua. Kia mako meitaki koe. I reira ka kite te kātoatoa ē, tē ma'ata 'aere nei tō'ou tū meitaki.

16E 'ākara meitaki 'ua rāi koe i a koe 'ua'orāi ē tā'au 'āpi'i'anga. E tāmou tikāi ki te reira. Tei te 'akapērā'anga 'oki e ora ai koe ē te aronga katoa e 'akarongo mai i a koe na.