1 Kōrīnētia 15 - Cook Island Maori Revised New Testament(CIMRNT)

Te tū'aka'ou'anga o te Mesia

1E te au taeake ē, tē 'akama'ara atu nei au i a kōtou i te 'ēvangelia tāku i tūtū atu ki a kōtou na, ē tei 'āriki'ia ē tei mou piri'ia e kōtou.

2Nā te reira e ora ai kōtou, mē mou piri tikāi kōtou ki tēnā karere tāku i tūtū atu ki a kōtou; mē kore rā, ka riro tō kōtou 'akarongo 'ei mea pu'apingakore.

3 , ē i muri mai ki te nga'uru mā rua ra.

6Ē i muri akera 'oki i mama maira aia i te 'ati'anga 'okota'i ki te au taeake tei tere atu i te rima 'ānere, tē ora 'ua nei rāi te ma'ata'anga o taua aronga ra, kua moe rā tēta'i pāpāki.

7Ē i muri akera kua mama maira aia ki a Iākōbo, ē i muri ake ki te au 'āpōsetolo rava rāi.

8 Anga 9.3-6 Ē i te 'openga i'ora i mama katoa maira aia ki āku, mei te mea ra ē, 'e ma'emo au.

9Anga 8.3Ko au 'oki tei iti rava i te au 'āpōsetolo rava rāi, ē kāre 'oki au e tau kia karanga'ia ē 'e 'āpōsetolo, nō te mea, kua tākinga kino au i te 'ēkālēsia a te Atua.

10Ē tēianei, ko au nei ko au rāi ia nā roto i te aro'a 'ua o te Atua, ē ko tōna aro'a 'ua i roto i āku nei kāre ia i te mea pu'apingakore. Inārā, 'e ma'ata atu tāku 'anga'anga i rave i tā rātou rava rāi, kāre rā ē ko au, ko te aro'a 'ua rā o te Atua i roto i āku nei.

11Noa atu rā ē, mē ko au, mē ko rātou, ko tēnā ia te karere tā mātou rava rāi i ako, ē tā kōtou i 'irinaki ra.

Te 'akatū'anga'ia te aronga mate

12Nō reira, mē tē ako'ia nei nō runga i te Mesia ē, kua 'akatū'ia mei te mate mai, 'e a'a tēta'i pāpāki o kōtou na i tuatua ai ē, kāre 'e tū'aka'ou'anga o tei mate ra?

13Mei te mea ē, kāre 'e tū'aka'ou'anga o tei mate ra, kāre katoa te Mesia i 'akatū'ia.

14Mē kāre te Mesia i 'akatū'ia, 'e mea pu'apingakore i reira tā mātou ako'anga, ē 'e mea pu'apingakore rāi tō kōtou 'irinaki'anga.

15Ē kua riro katoa mātou 'ei au kite pikika'a nō te Atua, nō te mea, kua 'akakitekite mātou ē, kua 'akatū te Atua i te Mesia tei kore i 'akatū'ia, mē e tika te tuatua ē kāre te aronga mate e 'akatū'ia.

16Mē kāre 'oki te aronga mate e 'akatū'ia, kāre katoa te Mesia i 'akatū'ia.

17Ē mē kāre te Mesia i 'akatū'ia, 'e mea pu'apingakore tō kōtou 'irinaki'anga, ē tei roto rāi kōtou i te 'ara.

18Ē te aronga katoa 'oki i mate i roto i te Mesia ra, ka ngaro tākiri rava rātou i reira.

19Mē tē tatari 'ua nei tātou i te Mesia ra i tēianei ao anake 'ua, ko tātou tikāi tei tau kia 'akaaro'a ma'ata rava'ia mai i te au tangata rava rāi.

20Kua 'akatū tikāi'ia mai rā te Mesia mei te mate maira, koia 'oki te mōmua o te aronga mate ra.

21Kua nā roto mai 'oki i tēta'i tangata te mate, ē kua nā roto katoa mai i tēta'i tangata te tū'aka'ou'anga o tei mate ra.

22Mei te tangata rava rāi i 'ope i te mate, nō te mea, nō Ādamu rātou, pērā katoa e rauka mai ei i te kātoatoa te ora, nō te mea, nō te Mesia rātou.

23Inārā, 'e 'akano'ono'o'anga tō te tangata tātakita'i: ko te Mesia te mōmua; ē i muri ake, ko te aronga tei piri ki te Mesia ra i tōna 'oki'anga mai.

24Ē i muri ake, ko te 'openga ia. I reira ka 'akakore 'ei te Mesia i te au 'akatere 'au rava rāi, ē te au mana rava rāi, ē te manārangi, ē ka tuku atu ei i te bāsileia ki te Atua te Metua ra.

25 Sal 110.1 Ka tūtara 'oki te Mesia e tikāi e tae 'ua atu ki te tuku'anga'ia mai o tōna au 'enemi rava rāi ki raro ake i ōna vaevae.

26Ko te 'enemi 'openga te ka tākore'ia, ko te mate ia.

27Sal 8.6Kua tātā'ia 'oki ē, “Kua tuku te Atua i te au mea rava rāi ki raro ake i aia.” Kia karanga'ia ē, “Kua tuku'ia te au mea rava rāi ki raro ake i aia,” kua mārama i reira ē, kāre te Atua i roto i “taua mea rava rāi.” Nā te Atua 'oki i tuku mai i te au mea rava rāi ki raro ake i te Mesia ra.

28Ē kia oti te au mea rava rāi i te tuku'ia ki raro ake i aia, nā te Tamaiti e tuku katoa i aia 'ua'orāi ki raro ake i te Atua tei tuku mai i te au mea rava rāi ki raro ake i aia, kia riro ki te Atua te rangi o te au mea rava rāi ē nō te au tangata rava rāi.

29E 'akapē'ea i reira te aronga i bāpetīto'ia nō te aronga mate ra? Mē kāre tākiri e 'akatū'ia te aronga mate ra, 'e a'a i reira i bāpetīto'ia ai ēta'i tangata nō te aronga mate ra?

30'E a'a rā mātou i ō ei ki roto i te au mea mate i te au 'ati'anga rava rāi?

31E te au taeake, tei mua 'oki i āku te mate i te au rā tātakita'i. 'E tika tēia! Mē 'e tika rāi tō kōtou riro'anga mai 'ei 'akaparau'anga nāku i roto i te Mesia ra i a Iēsū tō tātou 'Atu.

32Isa 22.13Mē kua kukumi ana au i te au manu tā'ae i Ēphēsia nei i tō te tangata nei manako'anga, 'e a'a rā tāku pu'apinga i rauka mai? Mei te mea ē kāre te aronga i mate ra e 'akatū'ia, “E kai 'ua tātou, ē e inu 'oki, nō te mea, āpōpō tātou e mate ei.”

33Auraka kōtou e vāvare: “Ko te au peu meitaki ka kore ia i te au piri'anga kikino ra.”

34E 'āriu mai i tō kōtou manako kia meitaki mai, ē kua oti 'ua te rave 'ara. Tē 'akakite atu nei au 'ei 'akamā nō kōtou ē, kua kitekore tēta'i pāpāki o kōtou i te Atua.

Te tū o te kōpapa i te tū'aka'ou'anga

35Ka ui 'oki tēta'i pāpāki ē, “Ka 'akapē'ea tei mate ra i te 'akatū'anga'ia? Mei te a'a i reira te tū o tō rātou kōpapa?”

36E tērā nēneva ē! Ko tā'au e rūrū ra, kāre ia e 'ōronga mai i te ora, māri 'ua kia mate ra.

37Ē kāre 'oki koe e rūrū i te mea tikāi te ka tupu mai, ko te 'ua anake ra, mei te 'ua sītona, mē kāre tēta'i 'ua kē atu.

38Nā te Atua rā i 'ōronga mai i tō rātou tū tikāi mei tāna i anoano, ē ki te au 'ua tūkēkē i tō rātou 'ua'orāi tū.

39Kāre 'oki i 'āiteite te tū o te au kōpapa: 'e kōpapa kē rāi tō te tangata, 'e kōpapa kē rāi tō te 'ānimara, 'e kōpapa kē rāi tō te au manu rere, 'e kōpapa kē rāi tō te au ika.

40Tē vai nei te au mea o te rangi, ē tē vai nei te au mea o te 'enua nei. 'E kakā kē rāi tō te au mea o te rangi, ē 'e kakā kē rāi tō te au mea o te 'enua.

41'E kakā kē tō te rā, 'e kakā kē tō te marama, 'e kakā kē tō te au 'ētū, ē 'e tūkē 'oki te kakā o tēta'i 'ētū i tō tēta'i.

42Koia katoa te tū'aka'ou'anga o tei mate ra: ko tei rūrū'ia ra kua riro 'ei mea pē 'ua, ko tei 'akatū'ia rā kua riro 'ei mea pēkore.

43I rūrū'ia ma te kakākore, i 'akatū'ia ma te kakā. I rūrū'ia ma te paruparu, i 'akatū'ia ma te māro'iro'i.

44I rūrū'ia 'ei tūranga tangata, i 'akatū'ia 'ei tūranga vaerua. Mei te mea ē 'e tūranga tangata tēta'i, 'e tūranga vaerua katoa rāi tēta'i.

45Gen 2.7Kua oti 'oki i te tātā'ia ra ē, “Ko te tangata mua ko Ādamu, kua riro mai ia 'ei tangata ora”; kāreka ko te Ādamu 'openga rā, kua riro mai ia 'ei Vaerua 'ōronga ora.

46Kāre rā te au mea vaerua i nā mua mai, māri rā ko te au mea kōpapa; ē i muri akera, ko te au mea vaerua.

47Te tangata mōmua, 'e one pue'u ia nō te 'enua nei, kāreka te rua o te tangata, nō te rangi mai ia.

48Mei taua tangata one pue'u ra, pērā katoa te tangata rava rāi 'e one pue'u rāi rātou; ē mei taua tangata nō te rangi maira, pērā katoa te tangata rava rāi nō te rangi mai rātou.

49Mei a tātou 'oki i 'āite ki te tūtū o te tangata one pue'u ra, ka 'āite katoa tātou ki te tūtū o te tangata nō te rangi maira.

50Ko tēia 'oki te 'āite'anga, e te au taeake: kāre te bāsileia o te Atua ē nō te kiko ē te toto, kāre katoa nō te au mea pēkore ē te au mea pē 'ua.

51 1 Tesa 4.15-17 Inā, tē 'akakite atu nei au ki a kōtou i tēta'i tuatua ngaro: kāre tātou e 'ope i te moe, ka 'ope rā tātou i te 'akatūkē'ia,

52kāre e mamia, mei te kamo'angā mata nei, kia tae ki te pū 'openga ra. Ka tangi 'oki te pū, ē e 'akatū'ia ai tei mate ra ma te pēkore, ē ka 'akatūkē'ia tātou.

53Ko tēia kōpapa pē 'ua nei, kia 'akakāka'u'ia ia 'ei mea pēkore e tikāi; ē ko tēia kōpapa mate 'ua nei, kia 'akakāka'u'ia 'ei mea matekore e tikāi.

54Isa 25.8Mē 'akakāka'u'ia te mea pē 'ua 'ei mea pēkore, ē te au mea mate 'ei au mea matekore, ka tupu te tuatua i tātā'ia ra ē,

“Kua 'āpuku'ia te mate ē kua rauka mai te rē.”

55 Hos 13.14 “E te mate ē, tei 'ea tō'ou rē?

E te mate ē, tei 'ea tō'ou tara?”

56Tō te mate nei tara ko te 'ara ia, ē tō te 'ara nei mana ko te Ture ia.

57Kia 'akameitaki'ia rā te Atua ko tei 'ōronga mai i te rē ki a tātou nā roto i tō tātou 'Atu ko Iēsū Mesia!

58Nō reira, e aku au taeake 'akaperepere, kia mātūtū ē kia ngāueuekore, e rave 'aka'ope rā i te 'anga'anga a te Atua ma te tukumoekore, ma te kite pāpū ē, kāre tā kōtou 'anga'anga i te mea pu'apingakore i roto i te 'Atu.