Ebera 5 - Cook Island Maori Revised New Testament(CIMRNT)

1Ko te Ta'unga Ma'ata tātakita'i i 'iki'ia nō roto mai i te tangata nei ē i 'ākono'ia 'ei mata nō rātou ki mua i te Atua, 'ei 'apai i te au 'ātinga ē te au tārangā'ara.

2Ka rauka i aia i te tangi i te aronga kitekore ē te tārevakē, nō te mea, kua kako aia 'ua'orāi i te paruparu.

3Lev 9.7Ē nō reira, mei tāna i 'apai i te au tārangā'ara nō te 'iti tangata, kia pērā katoa aia nōna 'ua'orāi e tikāi.

4Exo 28.1Ē kāre rava 'e tangata e rave 'ua i tēia tao'onga ngāteitei nōna 'ua'orāi, māri rā kia kāpiki te Atua i aia, mei tāna i kāpiki ana i a Āārona.

5 Sal 2.7 Kāre katoa te Mesia i rave 'ua i te ngāteitei i te riro'anga mai 'ei Ta'unga Ma'ata. Nā te Atua rā i karanga ki aia ē,

“Ko koe, ko taku Tamaiti koe;

i nakōnei i riro ei au 'ei Metua nō'ou.”

6 Sal 110.4 Ē kua karanga katoa mai aia i tēta'i ngā'i kē ē,

“'E ta'unga koe e tuātau 'ua atu,

mei a Melekizedeka te tū.”

7 Māt 26.36-46; Mār 14.32-42; Luk 22.39-46 I tōna ora'anga i raro nei, kua tuku te Mesia i te au pure ē te au pati'anga 'akatenga, i te kāpiki'anga ma te reo ma'ata ē te roimata ki te Atua tei rauka i te 'akaora i aia mei te mate mai. Ē kua 'āriki'ia mai tāna pati'anga nō tōna tūranga 'ākono Atua.

8Noa atu ē ko te Tamaiti tikāi a te Atua aia, kua kite tikāi aia ē, 'e a'a ia mea e kauraro nā roto mai i tōna ra au mate.

9Ē i 'akapērā i tau meitaki rava ai aia kia riro mai ki te kātoatoa tei kauraro mai i aia 'ei tumu nō te ora mutukore.

10Ē nā te Atua i 'akariro i aia 'ei Ta'unga Ma'ata mei a Melekizedeka te tū.

Te 'akamatakite'anga ē auraka e 'akaruke i te 'irinaki'anga

11'E ma'ata tō mātou manako nō runga i tēia au mea, inārā, 'e mea ngatā i te 'akamārama atu i te reira ki a kōtou, nō te mea, 'e ngākau mārie tō kōtou i te 'āriki mai.

121 Kōr 3.2Te tika'anga tikāi, kua riro takere mai kōtou 'ei au pū'āpi'i. Tē anoano'ia nei rā kōtou ē, nā mātou e 'āpi'i 'aka'ou atu i a kōtou i te au 'āpi'i'anga mōmua o te karere a te Atua. Kua riro mai kōtou 'ei aronga tei kai 'ua i te ū e tikāi, kāre i te kai pakari.

13Ko tēta'i 'ua atu 'oki tei kai 'ua i te ū, 'e pēpe varevare rāi ia, ē kāre i kite ake ē, 'e a'a tikāi te mea tika.

14Kāreka rā te kai pakari nō te aronga pakari ia, nō te aronga 'oki tei 'akamātau i a rātou 'ua'orāi i te 'uri'uri putuputu i roto i tō rātou ngākau i te au mea kātoatoa, ē nō reira rātou i kite meitaki ei ē, 'e a'a te mea meitaki, ē 'e a'a te mea kino.