1E te au taeake ē, i te mea tē tuatua atu nei au ki te aronga tei kite i te ture nei, kāre āinei kōtou i nakiro ē, 'e mana rāi tō te ture ki runga i te tangata i te tuātau tē ora 'ua ra aia?
2Mei tēia te tū: Ko te va'ine no'o tāne ra i tāpeka'ia aia e te ture ki tāna tāne koi ora ra aia; kia mate rā te tāne, kua matara aia i te ture tei tāpeka i aia ki tāna tāne ra.
3Nō reira, e karanga'ia aia ē, 'e va'ine 'akaturi i te piri'anga atu ki tēta'i tangata kē, mē tē ora ra tāna tāne. Kia mate rā tāna tāne, kua ti'amā aia i taua ture ra, ē kāre aia i te 'akaturi mē 'akaipoipo aia i tēta'i tane kē.
4Pērā katoa kōtou, e aku au taeake ē. Mē 'ākara tātou ki te pae o te Ture, kua mate katoa kōtou nā roto i te kōpapa o te Mesia. I tēianei rā, kua piri kōtou ki aia, ko tei 'akatū'ia mei te mate maira, kia 'aka'ua tātou i te 'ua nā te Atua.
5I te tuātau 'oki tē ora ra tātou i tō tātou tū tangata 'ua nei, tē 'anga'anga ra te au 'inangaro o te 'ara i roto i tō tātou au mero nā roto i te Ture i te 'aka'ua'anga i te 'ua e mate ei ra.
6Inārā i tēianei, kua tatara'ia tātou mei te Ture mai. Mē 'ākara tātou i te au mea tei mana ana i runga i a tātou, kua mate tātou. Kua ti'amā rā tātou i te tāvini'anga ma te tū 'ōu o te Vaerua, 'eia'a ma te tū ta'ito o te tuatua a te Ture ra.
Te Ture ē te 'ara7 Exo 20.17; Deut 5.21 Ka 'akapē'ea nei rā 'oki tātou? E 'āiteite āinei te Ture ki te 'ara? Kāre rava ia! Inārā, kāre au i kite ē, 'e a'a te 'ara, nāringa kāre 'e Ture. Mei tēia te tū: kāre au i kite ē, 'e a'a te morimori, nāringa kāre te Ture i 'akakite mai ē, “Auraka rava koe e morimori.”
8Kua rauka i'ora i te 'ara tāna rāvenga nā roto i te au 'akaue'anga ē kua 'akatupu i te au tū noinoi rava rāi ki roto i āku. I te kore'anga 'oki o te Ture ra, 'e mea mate te 'ara i reira.
9I ora ana 'oki au i muatangāna ma te turekore ra. Kia tae mai rā te 'akaue'anga ra, kua ora maira te mana o te 'ara,
10ē kua mate i'ora au. Ē te 'akaue'anga ra 'oki i 'ākono'ia 'ei tumu nō te ora, i āku rā 'e tumu ia nō te mate,
11Gen 3.13nō te mea ē, nā te 'ara tei rauka mai tāna rāvenga nā roto i te 'akaue'anga, i pikika'a mai i āku. Nā te 'ara rāi i tāmate mai i āku nā roto i taua 'akaue'anga rāi.
12Ē tēianei, 'e mea tapu te Ture, ē 'e mea tapu katoa te 'akaue'anga, ē te tika ē te meitaki.
13I riro mai āina taua mea meitaki ra 'ei mate nōku? Kāre rava ia! Inārā, nā te 'ara i 'akariro i te mea meitaki 'ei mate nōku, kia kitea te tū tikāi o te 'ara. Nō reira, nā roto i te 'akaue'anga i riro mai ei te 'ara 'ei mea kino ma'ata 'ua atu rāi.
Te taumārō'anga i roto i te tangata14Kua kite 'oki tātou ē, 'e 'apinga vaerua te Ture. Ko au rā, 'e tangata mate 'ua au, ko tei 'akariro'ia 'ei tuika'a nō te 'ara.
15Gal 5.17Kāre tākiri au e mārama ana ē, 'e a'a tāku e rave nei: ko tāku 'oki e 'inangaro ra, kāre au e rave ana; ko tāku rā e mākitakita ra, ko tāku ia e rave nei.
16Mē tē rave nei au i te mea kāre au e 'inangaro ana, tē 'akatika nei au ē, 'e mea meitaki te Ture.
17Nō reira, kāre ē ko au 'aka'ou tē rave ra i te reira, ko te 'ara rā e no'o i roto i āku nei.
18Kua kite 'oki au ē, kāre 'ua 'e mea meitaki e no'o i roto i āku nei, koia 'oki, i roto i tōku tū tangata 'ua nei, nō te mea, noa atu ē, tei roto i āku nei te 'inangaro nō te rave i te mea meitaki, kāre rā au i rave.
19Ko te meitaki 'oki tāku e 'inangaro ra, kāre ia au e rave ana, kāreka te kino 'inangarokore'ia e au ra, ko tāku ia e rave nei.
20Mē tē rave nei au i te mea kāre au e 'inangaro ana, kāre ē ko au 'aka'ou tē rave ra i te reira, ko te 'ara rā e no'o ra i roto i āku nei.
21Nō reira, tē kite nei au i tēta'i ture i roto i āku nei: noa atu ē, tē 'inangaro nei au i te rave i te mea meitaki, ka rauka 'ua rā i āku i te rave i te mea kino.
22Tē rekareka nei 'oki au i te ture a te Atua i te 'ō'onu'anga o tōku ngākau,
23tē kite nei rā au i tēta'i ture kē i roto i āku nei i te taumārō'anga mai ki taua ture ra tāku i 'āriki i roto i tōku ngākau. Ē tē 'akariro mai nei taua ture ra i āku 'ei tuika'a nō te ture o te 'ara i roto i āku nei.
24Auē 'oki au, te tangata mate ma'ata ē! Nā 'ai au e 'akaora i tēia kōpapa mate 'ua nei?
25Nā te Atua nā roto i a Iēsū Mesia, tō tātou 'Atu! Tē 'akameitaki atu nei au i aia!
Tēia tōku tū i reira: tē 'ākono nei au i te ture a te Atua ma tōku ngākau, kāreka tōku kōpapa ra, tē 'ākono ra ia i te ture o te 'ara.
Who We AreWhat We EelieveWhat We Do
2025 by iamachristian.org,Inc All rights reserved.
