'Anga'anga 17 - Cook Island Maori Revised New Testament(CIMRNT)

Te manamanatā i Tēsālōnia

1Kua 'aere atura a Paulo rāua ko Sila nā roto i a Āmephīpoli ē Āpolōnia, e tae atura rāua ki Tēsālōnia; ē tei reira tēta'i sūnago o te Ngāti Iūda ra.

2Kua tomo atura a Paulo ki roto i te sūnago ki a rātou, ko tāna 'oki ia peu. Ē, e toru akera ōna Sābati i te taumārō'anga ki a rātou i te tuatua i tātā'ia ra,

3nā roto i te 'akamārama'anga ē te 'akapāpū'anga atu ē e mate rāi te Mesia, ē e tū 'aka'ou rāi mei te mate maira e tikāi. “Ē ko tēia Mesia nei ko Iēsū rāi ia, tāku e 'akakite atu nei ki a kōtou na,” i nā Paulo ei.

4Kua 'irinaki maira tēta'i pāpāki o rātou, ē kua kāpiti katoa maira ki a Paulo rāua ko Sila; pērā katoa tēta'i pupu ma'ata o te au Eleni 'ākono Atua, ma te au va'ine pāpānunui 'e mānganui katoa ra.

5Kua vare'ae atura rā te Ngāti Iūda, ē kua 'akaputuputu maira rātou i ēta'i aronga kanga tārevakā 'ua, ē kua 'akatupu atura i tēta'i urupū tangata ma'ata 'ei tāoriori 'aere atu i te 'ōire. I reira, kua 'aere atura rātou ki te 'are o Iāsona, ē kua tāmata atura i te 'apai mai i a rāua ki va'o ki mua i te tangata.

6Nō te mea rā ē kāre rāua i kitea, kua kika maira rātou i a Iāsona ma ēta'i taeake ki mua i te au tūtara o te 'ōire ma te kāpikipiki'anga ē, “Ko taua ngā tangata ra tei tāruri kē i te ao katoa, ē kua 'aere mai nei rāua ki konei,

7ē nā Iāsona 'oki i 'ō'ō mai i a rāua. Ē tē rave nei rātou kātoatoa i te au mea kāre i 'akatika'ia e Kaisara, nō te mea, tē tuatua nei rātou ē, tē vai nei tēta'i ariki kē atu ko Iēsū.”

8Kō'iri'iriā atura te tangata rava rāi ē te au tūtara o te 'ōire i te 'akarongo'anga i te reira.

9Ē kia rauka maira tēta'i moni vavao, tei tūtakina'ia atu e Iāsona mā, kua tukuna'ia atura rātou kia 'aere.

Te manamanatā katoa i Bērea

10Kia pō akera, kua tuku atura te au taeake i a Paulo rāua ko Sila ki Bērea. E tae atura rāua ki reira, kua tomo atura rāua ki roto i te sūnago o te Ngāti Iūda.

11Kāre ō rātou manako piripiri mei tō Tēsālōnia rāi, kua 'āriki 'ua maira rātou i te karere ma te ngākau mā'ora'ora ē te kimikimi'anga i te au tuatua i tātā'ia ra, ē kāre e rā i tukua, mē 'e tika tā rāua i ako maira.

12'E mānganui o rātou i 'irinaki atu i te karere a te 'Atu; ē pērā katoa te au Eleni pāpānunui 'e mānganui, te au va'ine ma te au tāne.

13Kite akera te Ngāti Iūda i Tēsālōnia ra ē, tē ako'ia ra e Paulo te karere a te Atua i Bērea, kua 'aere katoa maira rātou ki reira, ē kua tāoriori maira ē te tāmanamanatā mai i te tangata.

14I reira rāi, kua tuku atura te au taeake i a Paulo kia 'aere tika aia ki tai, kāreka a Sila rāua ko Tīmōteo, no'o i'ora rāua i taua ngā'i rāi.

15Ē te aronga i āru atu i a Paulo ra, kave atura i aia e tae 'ua atura ki Ātene, ē kua 'oki maira rātou ma tēia poroaki'anga nō Sila rāua ko Tīmōteo: “E 'aere viviki rava mai kōrua ki āku.”

Ko Paulo i Ātene

16I tō Paulo ra 'oki tāpapa'anga mai i a Sila rāua ko Tīmōteo i Ātene, tangi rava i'ora tōna vaerua i roto i aia i te 'ākara'anga atu i taua 'ōire ra ē, kua kī rava i te au 'ītoro.

17Kua taumārō atura aia i roto i te sūnago ki te Ngāti Iūda ē te aronga 'ākono Atua, ē pērā katoa i te ngā'i 'oko'oko'anga ki te au tangata tāna i 'ārāvei atu, kāre 'e rā i vata.

18Kua taumārō maira ki aia ēta'i o te aronga pakari ō Ēpikuro ē te Tetōiko. Kua nā kō akera tēta'i pae, “'E a'a rā tā tēia tangata tuatua tārevakā 'ua e 'akakite mai nei?” Ko tēta'i pae rā, kua nā kō akera, “Tūtū rāi ē, 'e karere aia nō te au atua kēkē,” nō te mea 'oki ē, kua tūtū 'aere a Paulo i te karere nō Iēsū ē te tū'aka'ou'anga.

19Kua mou akera rātou i aia, e arataki atura i aia ki te Areōpago, nā kō maira ki aia, “Ka rauka āinei i a mātou i te kite ē, 'e a'a tēnā 'āpi'i'anga 'ōu tā'au e 'akakite mai nei?

20'E mea tūkē tākiri 'oki tā'au e 'apai mai nei ki tō mātou nei taringa. Tē 'inangaro nei mātou i te kite i te 'āite'anga o taua au mea ra.”

21Kāre 'oki 'e 'anga'anga kē ā te aronga Ātene rava rāi ē te au tangata kē e no'o ki ō rātou ra, māri rā, ko te 'akakite atu ē te 'akarongo mai i te tuatua 'ōu anake ra.

22Kua tū akera a Paulo ki runga i rotopū i te au kōnitara o te Areōpago ra, ē kua nā kō atura, “E tama mā ē te au tangata Ātene nei, tē kite i'o nei au nā roto i te au mea rava rāi ē, 'e aronga 'akamorimori atua kōtou.

23I āku 'oki i 'ā'āere 'ua i'o nei ē te tūtaka 'ua'anga atu i tō kōtou au ngā'i 'akamori'anga nei, kite atura au i tēta'i 'atarau ē te tuatua i tātā'ia ki runga a'o ra: ‘Nā te atua kiteakore'ia e te manako tangata.’ Ko tā kōtou 'oki e 'akamori 'ua nei, noa atu ē, kāre tō kōtou manako i kite i aia, ko ia tāku e 'akakite atu nei ki a kōtou na.

241 Arik 8.27; Isa 42.5; Anga 7.48Ko te Atua tei 'anga i tēianei ao ē te 'apinga tini rava rāi i roto ra, te 'Atu 'oki o te rangi ē te 'enua nei, kāre ia i no'o i roto i te nao i 'anga'ia e te rima tangata nei.

25Kāre katoa ē nā te rima tangata e tauturu i aia, mei te mea ra ē, tē ngere ra aia i tēta'i mea. Ko ia 'ua'orāi 'oki tei 'ōronga mai i te ora ē te a'o ē te au mea katoa ki te au tangata rava rāi.

26Ē nāna i 'anga i te au 'iti tangata rava rāi mei roto mai i te tangata 'okota'i ra 'ei no'o i te pā 'enua kātoatoa nei. Nāna 'oki i 'akataka i te au tuātau ē te au kōtinga o tō rātou au kāinga.

27E 'akapērā aia kia kimi katoa rātou i te Atua, pēnei ake, i tō rātou 'ā'āere'anga atu i te kimi'anga i aia, e kitea'ia atura aia, nō te mea, kāre aia i mamao kē atu i a tātou kātoatoa nei.

28Mei tā tēta'i i tuatua ē, ‘I nā roto mai 'oki i aia tātou i ora ai, i 'ā'āere ei, ē i no'ono'o ei 'oki.’ Mei tā ēta'i 'atu pe'e nō kōtou i tuatua maira ē, ‘'E tamariki katoa tātou nāna.’

29Nō te mea ē, 'e tamariki tātou nā te Atua ra, kāre e tika kia manako tātou ē, e 'āite te Atua ki te 'auro, te 'ārio ē te toka i tarai'ia e te kāraperape ē te kimikimi'anga manako o te tangata nei.

30Kāre atura te Atua i 'akautunga i te tangata te tuātau i kamakura ai rātou; i tēianei rā, tē 'akaue mai nei aia i te tangata ē, kia 'akatūkē rātou kātoatoa i tō rātou ora'anga i te au ngā'i rava rāi.

31Nō te mea, kua 'akano'o aia i te rā ka 'akavā mai ei aia i tō te ao nei ma te tuatua tika nā roto i te tangata tāna i 'akataka ra. Kia 'āriki te kātoatoa i te reira ē, kua 'akatū mai te Atua i aia mei te mate maira.”

32I tō rātou 'akarongo'anga i taua tuatua ra o te tū'aka'ou'anga o tei mate ra, kua tā'ito'ito maira tēta'i pae i aia; ko tēta'i pae rā, kua nā kō maira, “Ka 'akarongo 'aka'ou atu mātou i a koe nō te reira.”

33Ē kua 'aere atura a Paulo mei rotopū atu i a rātou.

34Kua kāpiti maira ēta'i tangata ki aia, ē kua 'irinaki atura i te Atua, koia 'oki ko Dionūsio tēta'i nō te Areōpago, ē tēta'i va'ine ko Dāmari te ingoa, ē pērā katoa ēta'i tangata kē atu.