'Anga'anga 21 - Cook Island Maori Revised New Testament(CIMRNT)

Te tere o Paulo ki Iērūsalēma

1E takakē maira mātou mei te aronga pakari mai o Ēphēsia, kua tere atura mātou i te 'aere tika 'ua'anga ki Koso; e ao akera, kua tae atura mātou ki Roda, ē mei reira 'oki ki Pātara.

2Kitea atura e mātou tēta'i pa'ī te ka 'ano atu ki Phēnia, kua kake atura mātou ki runga a'o, e tere atura.

3E kite atura mātou i a Kūpero, kua vao'o 'ua mātou i te reira ki te pae kaui, ē kua tere atura ki Sūria, e tāpae atura ki Tūria, 'ei reira 'oki e 'uri'ia ai te au 'apinga mei taua pa'ī ra ki uta.

4E kitea atura te aronga pipi e mātou, kua no'o atura mātou ki reira e 'itu akera pō. Kua 'akakite maira rātou i tā te Vaerua ki a Paulo ē, auraka aia e 'aere atu ki Iērūsalēma.

5E 'ope akera taua au rā ra, kua 'aere atura mātou i tō mātou tere, ē kua āru maira rātou kātoatoa ma te au va'ine ē te au tamariki katoa 'oki i a mātou ki va'o i taua 'ōire ra, ē kua tuturi i'ora mātou ki raro i ta'atai, pure i'ora;

6ē kia takakē maira mātou mei a rātou maira, kua 'aere atura mātou ki runga i te pa'ī, ē kua 'oki atura rātou ki tō rātou ngutu'are.

7Kua tinamou atura tō mātou tere mei Tūria mai, tāpae atura ki Pētolemai. Kua aro'a atura mātou i te au taeake i reira, e no'o atura ki ō rātou ra 'e 'okota'i akera rā.

8Anga 6.5; 8.5E ao akera, kua 'aere atura mātou, ē kua tae atura mātou ki Kaisarea. Ē kua tomo atura mātou ki roto i te 'are o Philipa, 'e tangata 'āpi'i 'ēvangelia, ko tēta'i 'oki ia o ngā tangata toko'itu ra. Kua no'o atura mātou ki ōna ra.

9Toko'ā āna tamā'ine kāre i 'akaipoipo'ia ake, ē tē toto'u ra rātou.

10Anga 11.28'E mānganui te au rā tō mātou no'o'anga i reira, ē kua 'aere maira tēta'i peroveta mei Iūdea mai, ko Āgabo tōna ingoa.

11E tae maira aia ki a mātou, kua rave maira aia i te tātua o Paulo, kua ruru i'ora aia i tōna 'ua'orāi rima ma te vaevae, ē kua tuatua maira, “Tē nā kō maira te Vaerua Tapu, ‘Mei tēianei te tū e ruru ei te Ngāti Iūda i Iērūsalēma i te tangata nōna tēia tātua nei, ē ka tuku 'oki rātou i aia ki roto i te rima o te au 'ētene ra.’ ”

12Kia 'akarongo mātou i te reira, kua pati 'akatenga atura mātou ē te au taeake o Kaisarea katoa ki a Paulo, 'eia'a aia e 'aere atu ki Iērūsalēma.

13Kua pa'u maira aia, “'E a'a kōtou i tangi mai ei, ē i 'akaparukā 'ua mai ei i tōku ngākau? Kua tika 'oki i āku, kāre anake 'ua ē kia riro mai au 'ei mou'āuri, māri katoa kia mate atu au ki Iērūsalēma nō te ingoa o te 'Atu ra ko Iēsū.”

14Ē nō te mea 'oki ē kāre rava akera aia i 'āriki mai, kua mūtēkī i'ora mātou, nā kō akera, “Kia tupu tō te 'Atu ra anoano.”

15I muri akera i taua au rā ra, kua 'ākonokono i'ora mātou, ē kua 'aere atura ki Iērūsalēma.

16Kua 'aere katoa atura ēta'i pipi nō Kaisarea ē mātou katoa, ē kua arataki atura rātou i a mātou ki ō Nāsona, 'e tangata Kūpero ē 'e pipi ta'ito 'oki aia. 'Ei ōna mātou no'o ei.

Tē 'ātoro nei a Paulo i a Iākōbo

17I tō mātou tae'anga atu ki Iērūsalēma, kua 'āriki maira te au taeake i a mātou ma te rekareka.

18E ao akera, 'aere atura a Paulo ē mātou katoa ki a Iākōbo ra, ē tei reira katoa te aronga pakari rava rāi ra.

19E oti akera tōna aro'a'anga atu i a rātou, kua 'akakite mārie atura aia i te au mea rava rāi tā te Atua i rave ki ō te 'ētene ra nā roto i tāna 'āpi'i'anga.

20Ē i tō rātou 'akarongo'anga mai i te reira, kua 'akakakā atura rātou i te Atua, ē kua tuatua maira rātou ki aia, “Kua kite koe, ē tō mātou taeake ē, e tauatini, e tauatini 'ua atu o te tangata tei 'irinaki i te 'Atu ra nō roto mai i te Ngāti Iūda ra rātou, ē 'e māro'iro'i pou roa 'oki rātou nō te Ture ra.

21Ē kua 'akakite'ia mai ki a rātou ē, tē 'āpi'i nei koe i te Ngāti Iūda rava rāi e no'o ki ō te 'ētene ra ē, e 'akaruke rātou i te Ture a Mōse, i te nā kō'anga atu 'oki ē, auraka rātou e peritome i te tamariki, ē auraka katoa 'oki e 'ākono i te au peu Ngāti Iūda ra.

22Ē tēianei, 'e a'a te rāvenga? 'E mea pāpū ē, ka 'akarongo rātou ē, kua tae mai koe.

23Num 6.13-21Nō reira, e rave koe i tā mātou e karanga atu ki a koe na. E toko'ā tangata i ō mātou nei, 'e tia tā rātou.

24E arataki koe i a rātou, ē kia tāmā katoa'ia koe ma rātou katoa, ē nā'au e tūtaki i te 'ātinga nō rātou kia varu rātou i tō rātou ūpoko; 'ei reira e nakiro ei te tangata rava rāi ē, 'e tuatua tā'eke 'ua tei 'akakite'ia mai nō'ou ki a rātou, ē tē tika ra tō'ou 'aerenga, ē tē 'ākono katoa ra koe i te Ture.

25Anga 15.29Nō te 'ētene rā tei 'irinaki i te 'Atu ra, kua tātā ana 'oki tātou ki a rātou i tā tātou tuku'anga tika ē, auraka rātou e kai i te mānga i 'apai'ia ana nō te au 'ītoro ra ē te toto, ē te kiko o te manu i kukumi'ia ra, ē auraka 'oki rātou e 'akaturi.”

26Kua arataki i'ora a Paulo i aua tangata ra, ē i tērā mai rā, kua tāmā'ia i'ora aia ma rātou katoa; ē kua tomo atura aia ki roto i te 'iero ra, ē kua 'akakite atura i te 'openga o te au rā tāmā'anga ra, ko te tuātau katoa te reira e 'apai'ia ai te 'ātinga nā rātou rava rāi.

Tē 'opu'ia nei a Paulo i roto i te 'iero

27Kia vaitata aua 'itu rā ra i te pou, kua kite i'ora ēta'i Ngāti Iūda nō Āsia maira i a Paulo i roto i te 'iero ra; kua 'akakeu i'ora rātou i te tangata rava rāi, ē kua 'opu atura i aia

28ma te kāpiki'anga ē, “E te au tangata Īserā'ela nei, e tūpae mai! Ko te tangata tēia i 'āpi'i i te tangata rava rāi i te au ngā'i kātoatoa i te au mea taukore ki te 'iti tangata nei, ē te Ture ē tēianei ngā'i. Ē kua arataki katoa mai 'oki aia i ēta'i tangata Eleni ki roto i te 'iero nei, ē kua tāvi'ivi'i aia i tēianei ngā'i tapu.”

29Anga 20.4Kua kite ana 'oki rātou i a Terōphimo, 'e tangata Ēphēsia ra, i te kāpiti'anga ki aia i roto i te 'ōire i mua ake, ē kua manako rātou ē, kua arataki a Paulo i aia ki roto i te 'iero ra.

30Kua keu atura taua 'ōire katoa ra, ē kua 'oro maira te tangata tini rava rāi ki te 'iero ra; kua 'opu maira rātou i a Paulo, ē kua kika atura i aia ki va'o mai i te 'iero ra. Ē kua tōpiri'ia akera te au ngūtupa i taua 'ati'anga rāi.

31Ē tē 'akakoro ra rātou i te tāmate i a Paulo, kua tae atura te rongo ki te rangatira ma'ata o te pupu va'e'au ē, “Tē keu 'ua nei a Iērūsalēma kātoatoa nei!”

32I reira rāi, kua rave maira aia i te au va'e'au ē te au rangatira 'ānere, ē 'oro atura ki a rātou. I tō rātou kite'anga mai i te rangatira ma'ata ē te au va'e'au, kua 'akamutu i'ora rātou i te pāpā i a Paulo.

33Kia tae atu te rangatira ma'ata ki reira, kua 'opu atura aia i a Paulo, ē kua 'akaue atura kia tāpeka'ia aia ki ngā piri'anganaoa e rua ra, ē kua ui atura aia kia rātou, ko 'ai aia, ē 'e a'a tāna i rave.

34Ko ēta'i i roto i taua urupū tangata ra i kāpiki i tēta'i mea, ē ko ēta'i i tēta'i mea. Nō te mea ē kāre i rauka i aia i te 'akapāpū meitaki ē, 'e a'a tikāi tei tupu nō te māniania 'oki, kua 'akaue atura aia kia kave'ia atu a Paulo ki roto i te pūnanga.

35E tae atura aia ki te kākenga ki runga, kua tākina'ia akera aia ki runga e te au va'e'au nō te kōnoninoni'anga mai o te tangata.

36Tē āru maira 'oki te tangata tini i muringa a'o i te kāpiki'anga mai ē, “E tāmate atu i aia!”

Tē pāruru nei a Paulo i aia 'ua'orāi i mua i te tangata

37E vaitata akera a Paulo i te kave'ia ki roto i taua pūnanga ra, kua pati atura aia ki te rangatira ma'ata, “'E tika āinei i a koe kia tuatua atu au ki a koe?”

Kua pa'u maira aia, “Ka kite āinei koe i te reo Eleni?

38Kāre āinei koe i reira te tangata Aiphiti tei tāruri kē i te 'enua i muatangāna, ē ko tei arataki 'oki e 'ā tauatini tangata tā tangata ki roto i te mēdēbara?”

39Kua pa'u atura a Paulo ki aia, “'E tangata Ngāti Iūda tikāi au nō Tāreso i Kilikia ra, ē kāre i te tangata nō tēta'i 'ōire 'aka'aka 'ua. Tē pati atu nei au ki a koe, e 'akatika mai koe i āku kia tuatua atu au ki te 'iti tangata nei.”

40Ē kia tika maira i aia, kua kamokamo atura a Paulo ki tōna rima ki taua 'iti tangata ra, tū 'ua ai aia i runga i taua kākenga ra. Ē kia mūtēkī tākiri akera, kua tuatua atura aia ki a rātou nā roto i te reo 'Ēbera, nā kō atura: