'Anga'anga 24 - Cook Island Maori Revised New Testament(CIMRNT)

Tō Paulo 'aka'apa'anga'ia e te Ngāti Iūda

1E pō rima akera, 'aere atura te Ta'unga Ma'ata ko Ānania ma ēta'i aronga pakari, ē tēta'i tumu kōrero katoa ko Teretulo ki Kaisarea, ē kua 'akakite atura rātou i tā rātou 'aka'apa'anga i a Paulo ki te tūtara ra i a Fēliki.

2E tiki'ia atura a Paulo, kua 'akamata atura a Teretulo i te tāpepe atu i aia, nā kō atura, “E Fēliki Ngāteitei ē, 'e 'au ma'ata tō mātou i a koe, ē nā te 'anga'anga tei rave'ia ma tō'ou tū kite i meitaki mai ei tēianei 'iti tangata.

3Tē rekareka nei mātou ē tē 'akameitaki ma'ata rava atu nei mātou i a koe kāre 'e ngā'i toe, kāre 'oki i tīvata.

4Ē tēianei, kia kore au e tāmanamanatā ma'ata atu i a koe, tē pati 'akatenga atu nei au ki a koe kia 'akarongo iti 'ua mai ana koe i a mātou ma tō'ou ngākau meitaki ra.

5Kua kite ana mātou ē, ko tēia tangata nei, 'e tangata 'akatupu pekapeka ia, ē te 'akakeu nei aia i te tāoriori'anga i rotopū i te Ngāti Iūda rava rāi e pini 'ua ake tēianei ao, ē ko te arataki katoa 'oki aia o te pupu o te tangata Nāzarēta ra.

6Ē kua 'opu atura mātou i aia i tōna tīmata'anga atu i te 'akanoa katoa i te 'iero.

8Ka rauka i a koe 'ua'orāi i te kite i tēianei au mea kātoatoa tā mātou e tāpepe atu nei i aia, mē uiui atu koe i aia ra.”

9Kua kāpiti katoa atura te Ngāti Iūda i te 'aka'apa'anga i a Paulo nā roto i te 'akakite'anga ē, kua tika te reira.

Tē pāruru nei a Paulo i aia 'ua'orāi

10I tō te tūtara tūngou'anga mai ki a Paulo e tuatua aia, kua nā kō atura aia,

“Nō te mea kua kite au ē, 'e 'akavā koe nō tēianei 'iti tangata 'e mānganui te au mata'iti ra, tē pa'u atu nei au i te au mea tei 'akakite'ia mai nō runga i āku ma te matakukore.

11Ka rauka i a koe i te kite pāpū ē, 'e 'okota'i nga'uru mā rua 'ua rā i topa ake nei, i 'aere atu ei au ki Iērūsalēma e 'akamori i te Atua.

12Ē kāre 'oki rātou i kite mai ana i āku i te taumārō'anga ki tēta'i 'ua atu tangata i roto i te 'iero, ē kāre katoa i te 'akakeu'anga i te au tangata i roto i te au sūnago, mē kāre ra i roto i taua 'ōire ra.

13Kāre 'oki e rauka i a rātou kia tuku mai i te au kite nō te au mea tā rātou e tāpepe mai nei i āku.

14Inārā, tē 'a'aki atu nei au ki a koe i tēia mea: koia 'oki, tē 'akamori nei au i te Atua o tō mātou 'ai tupuna, ma te 'āriki i te au tuatua rava rāi i tātā'ia i roto i te Ture ē te au peroveta ra; ē tē 'akapērā nei au nā roto i te āru'anga i te Mataara, tā rātou e tuatua nei ē, ‘'e karere tārevakē’.

15Ē i roto i te Atua 'e 'irinaki'anga tōku, mei a rātou 'ua'orāi 'oki, ē 'e tū'aka'ou'anga tēta'i nō te aronga tuatua tika ē nō te aronga tuatua tikakore.

16Nō reira, tē tāmata pakari nei au kia 'apakore tōku 'akavā ngākau i mua i te Atua ē te tangata katoa nei kāre i tukumoe.

17 Anga 21.17-28 “I muri ake i te au mata'iti 'e mānganui, i tae atu ei au ki Iērūsalēma e 'apai atu i te au 'apinga aro'a nā tōku 'iti tangata ē te au 'ātinga nā te Atua.

18I te 'akapērā'anga au, kua kitea'ia au i roto i te 'iero, kua oti 'oki au i te tāmā'ia, ē kāre i ma'ata roa te tangata, ē kāre katoa 'oki i koma.

19Ē ko rātou tei kite mai i āku, 'e Ngāti Iūda rātou nō Āsia mai, ē te tika'anga kia 'aere katoa mai rātou i mua i a koe e tāpepe mai i āku nei, mei te mea ē, 'e tuatua tā rātou i āku nei.

20Inārā, ko tēia aronga i konei, nā rātou e 'akakite mai ē, 'e a'a te 'apa tā rātou i kite i roto i āku nei i tōku tū'anga i mua i te aroaro o te Sūnēderi:

21Anga 23.6koia 'oki, nō tēia tuatua anake 'ua 'oki tāku i kāpiki atu i tōku tū'anga i rotopū i a rātou ē, ‘Nō te tū'aka'ou'anga o tei mate i 'akavā'ia ai au e kōtou i tēianei rā.’ ”

22Kua kite meitaki 'oki a Fēliki i te au mea o te Mataara, ē kua tuku atura aia i te 'akavā'anga ki tēta'i rā kē, nā kō akera, “Kia tae mai te rangatira ma'ata ko Lusia, ka kimikimi ei au i tā kōtou 'oro'anga.”

23Kua 'akaue atura aia ki te rangatira 'ānere kia tiaki'ia a Paulo, auraka rā e tāpeka'ia, ē auraka tēta'i 'ua atu o tōna au 'oa e ārai'ia i te mātuāpuru atu i aia.

Tei mua a Paulo i a Fēliki rāua ko Derusila

24E topa akera ēta'i puke rā ki muri, kua tae maira a Fēliki ē tāna va'ine ko Derusila, 'e va'ine Ngāti Iūda 'oki aia; kua tiki maira a Fēliki i a Paulo, ē kua 'akarongo atura i aia nō runga i te 'irinaki'anga i a Iēsū Mesia.

25I tāna tuatua'anga ra nō runga i te tuatua tika, te 'ākono meitaki ē te 'akavā'anga ā muri ake, kua mataku atura a Fēliki, ē kua karanga atura, “E 'aere atu ana koe i tēianei, ka tiki 'aka'ou mai au i a koe i te vā e tau.”

26Kua manako katoa 'oki aia ē, ka 'ōronga mai a Paulo i tēta'i moni nāna; nō reira i tiki putuputu mai ei aia i a Paulo e tuatua ki aia.

27E 'ope akera e rua mata'iti, kua tūpa'u'ia akera a Fēliki e Pōkio Fēsito. Nō tōna 'inangaro 'oki i te 'akareka i te Ngāti Iūda, kua vai'o mou'āuri atura a Fēliki i a Paulo.