2 Kōrīnētia Nō runga i tēia leta - Cook Island Maori Revised New Testament(CIMRNT)

Nō runga i tēia letaI te 'akamata'anga o tēia leta, kua pa'u a Paulo i te au manako o te au Keretitiāno i Kōrīnētia tei 'aka'apa i aia, i te mea ē kāre aia i 'ārāvei i a rātou mei tāna i papa'u ana. Kua 'akatūkē 'oki a Paulo i tōna 'akakoro'anga nō tēta'i tumu meitaki. Ko te tumu 'oki i kore ei aia i tā'oki 'aka'ou ki Kōrīnētia, kia kore e umuumu'ia kia tuatua pakari aia ki a rātou ē kia kore rātou e taitaiā i aia (1.23). Tē 'inangaro katoa nei aia kia kite aia ē, mē ka āru rātou i tāna 'āpi'i nō runga i te 'akakore'angā 'ara ē te 'akapūma'ana i te aronga rave 'ara (2.5-11).Tē 'akama'ara katoa nei a Paulo ki tō Kōrīnētia i te tākinga meitaki o te Atua ē tōna anoano kia 'akaāri katoa rātou i te tākinga meitaki nā roto i te tauturu nā te 'iti tangata o te Atua i Iērūsalēma ē Iūdea (8.1—9.15).Ko Paulo, 'e tāvini ia nō te kōreromotu 'ōu a te Atua (13.1-17). Kua tāmou tikāi aia i tāna 'anga'anga, koia 'oki, te kimi rāvenga i te 'akariro i te tangata rava rāi 'ei au pipi nō Iēsū, noa atu ē, ka roko'ia aia 'ua'orāi e te tūmatetenga ma'ata nō te reira (4.1—6.13; 10.1—12.10). Ē 'e a'a tā te Atua i rave i rauka ai i a tātou i te piri atu ki aia?“Nō kō mai tēia au mea kātoatoa i te Atua tei 'aka'au i a tātou ki aia 'ua'orāi nā roto mai i te Mesia, ē kua tuku mai aia i te 'anga'anga 'aka'au ki a mātou nei. Ko te Atua 'oki tei 'aka'au nā roto i te Mesia i te tangata rava rāi ki aia 'ua'orāi, ma te kore aia e 'akamou i tō rātou au tārevakē i mua i aia. Ē kua tuku mai aia i te karere o te 'aka'au ki a mātou” (5.18,19).Te 'akano'ono'o'anga o tēia leta1. Te 'akameitaki'anga a Paulo i te Atua 1.1-112. Te 'anga'anga a te 'āpōsetolo nō te 'Iti Tangata o te Atua 1.12—2.173. Kua arataki'ia a Paulo nā roto i te aro'a o te Mesia 3.1—7.164. Te 'apinga aro'a nā te puta'ua 8.1—9.155. Ko Paulo, 'e 'āpōsetolo tika tikāi 10.1—13.106. Te ve'eve'e'anga aro'a 'openga 13.11-13