Ephesia 5 - Cook Island Maori Revised New Testament(CIMRNT)

Te 'aerenga mei tā te aronga o te mārama

1Ē tēianei, e āru kōtou i te Atua mei te tamariki 'akaperepere'ia ra.

2Exo 29.18; Sal 40.6Ē 'ei 'aerenga aro'a tō kōtou, mei te Mesia i aro'a katoa mai i a tātou, ē kua 'ōronga mai i tōna ora nō tātou 'ei 'apinga aro'a ē te 'ātinga mareka'ia e te Atua.

3'E aronga tapu kōtou. Nō reira, kāre te 'akaturi, te au mea vi'ivi'i rava rāi ē te noinoi kino i 'aka'iki'ia ki ō kōtou na.

4Ē te kanga, te tuatua rikiriki nēneva ē te tākatakata kino ra, kāre ia e tau i a kōtou, e tau rā te tuatua 'akameitaki.

5Kia kite pāpū tikāi 'oki kōtou ē, kāre tākiri 'e tu'anga i te bāsileia o te Mesia ē te Atua nō te tangata 'akaturi, te tangata vi'ivi'i ē te tangata noinoi. 'E 'akamori 'ītoro 'oki taua tū tangata ra.

6Auraka rava kōtou kia arataki kē'ia e tēta'i 'ua atu tangata nā roto i te au tuatua pu'apingakore. Nō taua au kino ra 'oki e tae mai ei te riri o te Atua ki runga a'o i te aronga kaurarokore.

7Auraka kōtou e piri atu ki a rātou ra.

8I muatangāna i pōiri ana 'oki kōtou mei te pō ra, i tēianei rā e mārama kōtou mei te ao ra nō tō kōtou piri'anga ki te 'Atu ra. Kia tau i reira tō kōtou 'aerenga ki te aronga o te mārama.

9Nō kō mai 'oki i te mārama te au 'anga'anga meitaki rava rāi, te tuatua tika ē te tuatua mou.

10E kimikimi rāi i te mea e mareka ai te 'Atu.

11Ē auraka e piri atu ki te au 'anga'anga pu'apingakore a te pōiri ra. 'E ngari ake rā kia 'akaāri kōtou i tō rātou tū tikāi.

12'E mea 'akamā rā 'oki te tuatua nō runga i te au mea tā rātou e rave ra i te pōiri.

13Te au mea rava rāi i 'akaāri'ia i roto i te mārama, ka kitea'ia tō rātou tū tikāi.

14Te mea tātakita'i 'oki kua kitea'ia tōna tū tikāi nā roto rāi i te mārama. Nō reira i tuatua'ia ai ē,

“E ara maina, e tēnā na tangata moe,

ka tū mai ki runga mei te mate maira,

ē nā te Mesia e 'ōronga mai i te mārama ki a koe.”

15Ē tēnā na, e matakite kia meitaki tō kōtou 'aerenga, 'eia'a mei tā te aronga kitekore, mei tā te aronga pakari rā,

16Kol 4.5ma te tāporoporo mārie rāi i te au rāvenga nō te 'aerenga meitaki, nō te mea, 'e tuātau kino tēia.

17Nō reira, auraka kōtou kia riro mei te nēneva rāi te tū, e kimi mārie rā ē 'e a'a tō te 'Atu ra anoano.

18Ē auraka e kona i te uaina, ko te tumu ia o te kanga ma'ata; kia 'akakī'ia rā kōtou ki te Vaerua.

19Kol 3.16,17E tuatua kōtou tēta'i ki tēta'i ma te tuatua o te au salamo, te au 'īmene ē te au pe'e a te Vaerua. E 'īmene ē e 'akapa'apa'a i te 'Atu ma tō kōtou ngākau katoa.

20I te ingoa o tō tātou 'Atu nei ko Iēsū Mesia, e 'akameitaki i te Atua Metua nō te au mea rava rāi ma te tīvatakore.

Tā te tāne ē tā te va'ine 'ākono'anga

21E tātomo mārie kōtou tēta'i ki tēta'i nō tō kōtou 'akangāteitei'anga i te Mesia.

22 Kol 3.18; 1 Pet 3.1 E te au va'ine no'o tāne ra, e kauraro kōtou i tā kōtou 'ua'orāi au tāne, mei te mea ē, tē kauraro ra kōtou i te 'Atu.

23Ko te tāne 'oki te ūpoko o te va'ine, mei te Mesia katoa ra ko te ūpoko ia o te 'ēkālēsia. Nāna 'oki te rāvenga ora o tōna kōpapa, te 'ēkālēsia.

24Nō reira, mei te 'ēkālēsia e kauraro i te Mesia ra, e pērā katoa te au va'ine i te kauraro'anga i te au tāne i te au mea rava rāi.

25 Kol 3.19; 1 Pet 3.7 E te au tāne ra, e aro'a atu kōtou i tā kōtou au va'ine, mei te Mesia rāi i aro'a i te 'ēkālēsia, ē kua 'ōronga i aia 'ua'orāi nōna.

26I pērā aia kia 'akatapu aia i te 'ēkālēsia. Kua tāmā 'oki te Mesia i aia nā roto i te 'ōrei'angā vai ē tāna ra tuatua,

27kia tuku atu i aia ki mua i tōna aroaro 'ei 'ēkālēsia kakā, ma te kore ōna tōpata ē te korokoromingo, ē tēta'i 'ua atu mea mei te reira te tū, kia tapu rā aia ē kia 'apakore.

28Kia aro'a te au tāne i tā rātou au va'ine e tikāi mei tō rātou 'ua'orāi kōpapa. Ko tei aro'a i tāna 'ua'orāi va'ine, tē aro'a ra rāi aia i aia 'ua'orāi.

29Kāre 'oki tēta'i 'ua atu tangata e mākitakita i tōna 'ua'orāi kōpapa e tēia noa ai, inārā, te 'āngai ra ē te 'ākono mārie ra i te reira, mei te Mesia rāi e 'ākono mārie i te 'ēkālēsia.

30'E au mero 'oki tātou nō tōna kōpapa.

31Gen 2.24Kua tātā'ia 'oki ē, “Nō reira e 'akaruke ei te tangata i tōna metua tāne ē te metua va'ine, ka tōpiri atu ei ki tāna va'ine ē ka riro 'oki rāua 'ei kōpapa 'okota'i.”

32'E mea muna ngaro ma'ata 'oki tēia. Tē 'aka'āiteite nei au i te reira ki te Mesia ē te 'ēkālēsia.

33E pērā katoa kōtou: e aro'a atu te tāne tātakita'i i tāna 'ua'orāi va'ine mei aia 'ua'orāi; ē te va'ine ra, e 'akangāteitei atu aia i tāna tāne.