Apokalupo 5 - Cook Island Maori Revised New Testament(CIMRNT)

Te pōkaikai ē te Punua Māmoe

1 Ezek 2.9,10; Isa 29.11 E kite atura au i roto i te rima katau o tei no'o ki runga i te terōno ra i tēta'i pōkaikai i tātā'ia ā mua ē ā muri, kua tāpiri'ia ki ngā 'akairo e 'itu.

2E 'ākara atura au i tēta'i 'āngela ririnui i te 'akakite'anga ma te reo ma'ata, “Ko 'ai te ka tau kia tatara i te pōkaikai ē kia vāvā'i i te au 'akairo?”

3Kāre rava 'e tangata i runga i te rangi, mē kāre i te 'enua, mē kāre i raro ake i te 'enua nei, e tau kia tatara i taua pōkaikai nei, ē kāre katoa kia 'ākara i te reira.

4Kua auē ma'ata au, nō te mea, kāre rava 'e tangata i kitea e tau kia tatara i taua pōkaikai nei, mē kāre kia 'ākara i te reira.

5a: Gen 49.9; b: Isa 11.1,10Kua tuatua maira tēta'i o te aronga pakari ra ki āku, “Auraka e auē, nā te Liona o te kōpū o Iūda, te Aka o Dāvida, tei 'autū 'oki, nāna e tatara i taua pōkaikai nei ē e vāvā'i i ngā 'akairo ē 'itu ra.”

6 a: Isa 53.7; b: Zek 4.10 Tei rotopū i te terōno ma ngā mea ora e 'ā ra ē te aronga pakari, kite atura au i tēta'i Punua Māmoe, tē tū 'ua ra mei te mea ē kua tāmate'ia ana, e 'itu ōna tara ē e 'itu ōna mata. Ko te au vaerua 'oki ia e 'itu o te Atua i tonokia atu ki te ao katoa nei.

7Kua 'aere maira aia ē kua rave mai i te pōkaikai mei kō mai i te rima katau o tei no'o ki runga i te terōno ra.

8Sal 141.2Ē i aia i rave mai i taua pōkaikai ra, ko ngā mea ora e 'ā ē te aronga pakari e rua nga'uru mā 'ā, kua tīpapa i'ora ki raro ki mua i te Punua Māmoe, ē tē mou ra rātou tātakita'i 'e kītara ē te au kapu 'auro kī i te rākau kakara. Ko te au pure 'oki ia ā te aronga tapu ra.

9Sal 33.3; 98.1; Isa 42.10Kua 'īmene rātou i tēta'i 'īmene 'ōu i te nā kō'anga atu ē:

“Ko koe tei tau kia rave i te pōkaikai

ē kia vāvā'i i te au 'akairo.

I tāmate'ia ana 'oki koe, ē kua 'oko mai koe ki tō'ou toto nō te Atua

i te au tangata nō roto mai i te au kōpū rava rāi, te au reo katoa, te au 'iti tangata katoa ē te au pā 'enua katoa.

10 Exo 19.6; Apo 1.6 Ē kua 'akariro koe i a rātou nō tō mātou Atua

'ei bāsileia ē 'ei au ta'unga,

ē ka tūtara ai rātou i tēianei ao.”

11 Dan 7.10 'Ākara atura au, ē kua 'akarongo au i te reo o te au 'āngela 'e mānganui tei takapini i taua terōno ra, ē ngā mea ora ē te aronga pakari. Te ma'ata o taua au 'āngela ra kia tatau'ia, e manotini ia i te manotini'anga ē e tauatini ia i te tauatini'anga.

12Kua kāpiki maira rātou ma te reo ma'ata:

“'E tau te Punua Māmoe i tāmate'ia ana

i te 'āriki mai i te mana, te 'apinga nui, te pakari, te ririnui,

te ngāteitei, te kakā ē te 'akapa'apa'a'anga.”

13Kua 'akarongo atura au i te au mea kātoatoa tō runga i te rangi, tō runga i te 'enua nei, tō raro ake i te 'enua nei, tō runga i te moana ē te au mea rava rāi i roto ra i reira i te nā kō'anga ē:

“Tei aia tei no'o i runga i te terōno ē i te Punua Māmoe ra

te 'akameitaki'anga, te ngāteitei, te kakā

ē te mana e tuātau, e tuātau 'ua atu.”

14Kua nā kō atura ngā mea ora e 'ā: “Āmene!” Kua tīpapa i'ora te aronga pakari ki raro ē kua 'akamori atura.