Iakobo 3 - Cook Island Maori Revised New Testament(CIMRNT)

Te arero

1E aku au taeake ē, auraka kia ma'ata i ō kōtou na te pū'āpi'i. Kua kite 'oki kōtou ē, ka ma'ata atu te 'akavā'anga i a mātou te au pū'āpi'i i te aronga kē atu.

2Tē 'apa anake nei tātou pou roa i te au mea 'e mānganui. Ē kia kore tēta'i tangata e 'apa i te tuatua ra, 'e tangata meitaki rava aia, ē ka rauka i aia i te 'aka'aere i tōna kōpapa katoa ra.

3Inā, tē tuku nei tātou i te 'āuri tāva'a ki roto i te va'a o te 'oro'enua kia kauraro mai i a tātou, ē ka rauka i a tātou i te 'aka'aere i a rātou.

4Ka 'ākara na i te au pa'ī, mama'ata 'ua rāi rātou ē kua pū'ia rāi e te matangi viviki ra, tē tīoi 'aere'ia nei rā rātou e te 'oe meangiti po'epo'e ki te au ngā'i tā te 'akatere i 'akakoro ra.

5Pērā katoa te arero, noa atu ē 'e mero meangiti 'ua, tē 'akati'eti'e nei aia i te au mea ma'ata.

E 'akamanako, e meangiti 'ua te a'i, 'e vao rākau ma'ata rā tei tutungi'ia e ia.

6Ko te arero 'oki mei te a'i ra te tū, 'e putunga nō te au mea tikakore. Tē no'o nei ia i rotopū i tō tātou au mero ē tē 'akatupu nei i te kino ki te kōpapa katoa ra. Kua rauka i aia tōna a'i nō kō mai i te pō ē te tutungi nei aia i tō tātou ora'anga katoa mei te 'ānau'anga e tae 'ua atu ki te mate'anga.

7'E rauka kia 'akavī'ia te au tū manu tā'ae rava rāi ē te au manu rere, te au 'ōvī ē te au mea o te tai ra; ē kua 'ope 'oki i te 'akavī'ia e te tangata nei.

8Kāre 'ua rā 'e tangata i rauka ana i te 'akavī i te arero, ko tēta'i kino ia kāre e rauka i te tākore, kua kī ia i te kavangia mate roa.

9 Gen 1.26 Tē 'akameitaki nei tātou i te 'Atu ē te Metua ki tō tātou arero, ē tē tao katoa atu nei tātou ki te reira i te tangata tei 'anga'ia mei tō te Atua rāi tū.

10Tē puroro nei te 'akameitaki ē te tao nō roto mai i taua va'a 'okota'i ra. E te au taeake, auraka rava kōtou kia 'akapērā.

11Ka riringi mai āina te punāvai i te vai māngaro ē te vai kavakava nō roto mai i te va'arua 'okota'i ra?

12'E aku au taeake ē, e rauka āina i te pū suke kia 'aka'ua mai i te 'ōlive, mē kāre ra, i te pū vine kia 'aka'ua mai i te au suke? Kāre katoa e rauka i te punāvai taitai i te 'ōronga mai i te vai māngaro.

E rua tū pakari

13Ko 'ai te tangata pakari ē te kite i roto i a kōtou na? Kia 'akaāri aia i te reira nā roto i te tū meitaki o tōna ora'anga, koia 'oki nā roto i te 'anga'anga i rave'ia ma te marū tei nā roto mai i te pakari.

14Mei te mea rā ē, tei roto i tō kōtou ngākau te vare'ae kavakava ē te karo, auraka e ngākau parau, ē auraka e 'u'una i te tuatua mou.

15Kāre 'oki te reira i te tū pakari nō runga mai, nō tēia ao nei rā ia, nā te tangata 'ua te reira, ē 'e 'anga'anga nā te dēmoni katoa.

16I te ngā'i 'oki o te vare'ae ē te karo, tei reira katoa te oripū ē te au tū 'anga'anga kikino katoa ra.

17Kāreka te mea ma'ata o te tū pakari nō runga maira kua 'irokore'ia ia, 'e mea 'au katoa ia ē te marū. Kua viviki aia i te 'āriki i te manako meitaki, kua kī i te aro'a, ē 'e ma'ata tāna au 'anga'anga meitaki. Kāre aia e 'ākara i te tū o te tangata, ē kāre 'oki e 'akatūtū 'ua i te meitaki.

18Ko te tuatua tika 'oki te ka rūrū'ia ma te 'au e te aronga 'akamoe'au.