1 Timōteo 6 - Cook Island Maori Revised New Testament(CIMRNT)

Te 'anga'anga nō te aronga tuika'a

1Ko te aronga tuika'a ra, kia manako rātou ē, e tau rāi tō rātou au pū i te 'akangāteitei'anga kātoatoa, kia kore e 'akakino'ia te ingoa o te Atua ē tā mātou 'āpi'i'anga.

2Ko te au tuika'a 'e au pū 'akarongo tō rātou, auraka e 'akava'ava'a i a rātou, nō te mea, 'e au taeake rātou. Inārā, kia tāvini ma'ata atu rāi, nō te mea, ko te aronga tei rauka mai te meitaki nō kō i tā rātou 'anga'anga tāvini, 'e aronga 'akarongo rātou ē te 'akaperepere'ia.

Te 'āpi'i'anga tārevakē ē te 'apinga nui tika tikāi

E 'āpi'i atu ē e ako atu i tēia au mea.

3Mē tē 'āpi'i ra tēta'i 'ua atu tangata i tēta'i karere kē atu, ē kāre mei tei tau i te tuatua ora a tō tātou 'Atu ra ko Iēsū Mesia, ē te taukore katoa i te 'ākono i tā te Atua ra,

4kua 'akateitei'ia taua tangata ra e te ngākau parau. 'E kitekore aia, tei kimikimi 'ua i te tau'ētono'anga pu'apingakore nō runga i te kupu 'ua. Ē mei roto mai i te reira e tupu ei te vare'ae, te pae kē, te au 'akakino'anga, te au tārotokakā kino,

5ē te au taumārōrō'anga o te aronga tei tākore i tō rātou manako tika. Kāre rātou e āru i te tuatua mou. Tē manako 'ua nei rātou ē, ka rauka mai te 'apinga nui nā roto i te 'ākono Atua.

6'E 'apinga nui tikāi te ka rauka mai nā roto mai i te 'ākono Atua, mē mareka rāi tātou i tei rauka mai.

7Kāre 'ua 'oki a tātou 'apinga i 'apai mai ki roto i tēianei ao, ē kāre katoa ā tātou 'apinga e rauka i te 'apai atu.

8Mē 'e kai ē te kāka'u tā tātou, kua rava rāi te reira nā tātou.

9Ko rātou rā tei umuumu kia aronga 'apinga nui rātou, e roko'ia ia e te tīmata'anga, ē e mouria ia e te 'ere'ere ē te au noinoi nēneva; ka 'akakino'ia ē 'akamaremo'ia atu ei te tangata ki roto i te pou ē te mate nā roto i te reira.

10Ko te noinoi moni 'oki, ko te tumu ia o te au kino katoa nei. I te umuumu'anga i te reira, i takakē rava ai ēta'i aronga i te 'akarongo, ē puta akera tō rātou au ngākau i te au mate 'e mānganui.

Te tuatua 'akamāro'iro'i

11Ko koe rā, e te tangata o te Atua na, e kōpae atu i taua au mea kātoatoa ra. E aruaru rā i te tuatua tika, te 'ākono Atua, te 'akarongo, te aro'a, te 'akakoromaki ē te tū marū.

12E kukumi i te kukumi'anga meitaki o te 'akarongo, e 'opu i te ora mutukore i kāpiki'ia ai koe, ē tā'au i 'akakite ana nā roto i te 'a'aki'anga meitaki ki mua i te aroaro o te au kite 'e mānganui.

13Ioa 18.37Ē tēianei, ki mua i te aroaro o te Atua tei 'ōronga mai i te ora ki te au mea katoa nei, ē ki mua i te aroaro o te Mesia ra ko Iēsū, ko tei 'akakite ana i tēta'i 'a'aki'anga meitaki ki mua i a Ponotio Pilato ra, te poroaki atu nei au ki a koe ē:

14e 'ākono i tēia poroaki'anga nei, 'eia'a 'e ngā'i kino, 'eia'a 'e 'apa, e tae 'ua atu ki te mama'anga mai o tō tātou 'Atu ra ko Iēsū Mesia.

15Ka 'akaāri pū'ia mai aia i te 'ati'anga tau tikāi ē te 'aka'aere 'okota'i ē tei 'akameitaki'ia, koia 'oki te Ariki o te au ariki ē te 'Atu o te au 'atu.

16Tei aia anake 'oki te ora'anga matekore, ko ia rāi tē no'o ra i roto i te mārama taeakore'ia, ē tei kore i 'ākara'ia e tēta'i 'ua atu tangata, ē kāre rāi e rauka kia 'ākara'ia. 'Ei aia te ngāteitei ē te mana mutukore. Āmene.

17E ako atu i te aronga 'apinga nui o tēia tuātau nei, 'eia'a 'e ngākau teitei, 'eia'a e 'irinaki 'ua i te 'apinga nui pāpūkore. Kia 'irinaki rā rātou i te Atua ko tei 'ōronga ma'ata 'ua mai ki a tātou i te au mea katoa nei 'ei mareka'anga nō tātou.

18E ako katoa atu i a rātou i te rave i te meitaki, i te tākinga meitaki ē te 'ōronga 'ua, kia 'apinga nui rātou.

19Mē pērā, kua 'akaputuputu 'oki rātou i te meitaki nō rātou 'ua'orāi 'ei tango mou nō te tuātau ā muri atu, kia rauka i a rātou te ora mou tikāi.

20E Tīmōteo ē, e 'ākono meitaki i tei tuku'ia atu ki a koe na. E 'āriu kē atu koe mei te tuatua 'akanoa ē te pu'apingakore, ē te pāto'i'anga i te tuatua mou nā roto i tēta'i tū kite kāre tākiri e tau kia karanga'ia ē 'e kite.

21Kua 'a'aki ēta'i aronga i te reira ē kua ngere rātou i te 'akarongo.

'Ei a kōtou na te aro'a 'ua.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help