1 Kōrīnētia 14 - Cook Island Maori Revised New Testament(CIMRNT)

Ko ēta'i tao'ongā rima nō kō mai i te Vaerua

1E aruaru i te aro'a. E umuumu pakari tikāi i te tao'ongā rima a te Vaerua ra; ē ko te toto'u tikāi tā kōtou e umuumu.

2Ko tēta'i 'ua atu tei tuatua i tēta'i reo kē ra, kāre aia ē tē tuatua ra ki te tangata, māri rā ki te Atua, nō te mea, kāre 'e tangata e mārama atu i tāna tuatua. Tē tuatua ra 'oki aia i te au mea muna ngaro nā roto i te mana o te Vaerua.

3Kāreka tei toto'u ra, tē tuatua ra ia ki te tangata kia tupu te meitaki, kia 'akamāro'iro'i ē kia 'akapūma'ana i a rātou.

4Ko ia tei tuatua i tēta'i reo kē ra, tē 'akama'ata 'ua ra aia i tōna 'ua'orāi meitaki, kāreka aia tei toto'u ra, tē 'akama'ata ra aia i te meitaki o te 'ēkālēsia.

5Tē 'inangaro nei au i a kōtou kātoatoa kia tuatua i te au reo kekē, inārā, ka 'inangaro roa atu au kia toto'u kōtou. Ko ia tei toto'u ra, 'e ma'ata atu ia i tēta'i tei tuatua i te au reo kekē, māri 'ua, kia 'uri katoa aia i te reira, kia ma'ata atu te meitaki o te 'ēkālēsia.

6I tēianei, e te au taeake, mē 'aere atu au ki ō kōtou na ma te tuatua atu i roto i te au reo kekē ra, 'e a'a i'ora tōku pu'apinga ki a kōtou, māri 'ua, kia 'ōronga atu au ki a kōtou i tēta'i karere 'akamārama'anga, mē kāre ra i tēta'i kite 'ōu, mē kāre ra i tēta'i toto'u'anga, mē kāre ra i tēta'i 'āpi'i'anga ra.

7Koia katoa 'oki te au mea orakore e 'akatangi'ia ana, mei te vivo ko'e, mē kāre ra, te kītara ra. Ka 'akapē'ea tēta'i 'ua atu tangata e kite ei ē, 'e a'a te mea e 'akatangi'ia ra, māri 'ua, kia taka meitaki te 'akatangi'anga?

8Pērā katoa, mē kāre e taka meitaki te tangi o te pū ra, ko 'ai te ka 'akate'ate'amamao nō te tamaki?

9Koia katoa 'oki kōtou. Mē kāre kōtou e tuatua i te tuatua māramarama 'ua ra, ka 'akapē'ea tēta'i 'ua atu tangata e mārama ai ē, 'e a'a tā kōtou e tuatua ra? Tē tuatua 'ua ra kōtou i reira ki te matangi.

10I te mea 'oki ē, 'e mānganui 'ua atu rāi te au tū reo i te ao nei, 'e 'āite'anga pou roa ra tō rātou.

11Mē kāre au i reira e kite i te 'āite'anga o te reo o tēta'i tangata e tuatua maira, e riro au 'ei tangata kē ki te tangata e tuatua maira, ē e riro 'oki aia 'ei tangata kē ki āku.

12Koia katoa 'oki kōtou. I te mea 'oki ē, tē umuumu tikāi ra kōtou kia rauka mai te au tao'ongā rima a te Vaerua, e aruaru mārie kōtou i te kī 'ei 'akatupu i te meitaki o tā kōtou 'ēkālēsia.

13Nō reira, ko te tangata te ka tuatua i roto i te reo kē ra, e pure aia kia rauka katoa i aia i te 'uri i te reira.

14Mē pure 'oki au i roto i te reo kē ra, ko taku vaerua tē pure ra, kāreka tōku manako tē moe 'ua ra ia.

15E 'akapē'ea i reira? Kia pure au ma tōku vaerua, ē kia pure au ma tōku manako katoa rāi 'oki; kia 'īmene 'akameitaki au ma tōku vaerua, ē kia 'īmene 'akameitaki au ma tōku manako katoa rāi 'oki.

16Mē tē 'akapa'apa'a ra koe i te Atua ma te vaerua anake 'ua, ka 'akapē'ea tēta'i tangata kē e no'o ra i roto i a kōtou na i te karanga'anga ē, “Āmene” ki taua 'akameitaki'anga ra, nō te mea, kāre 'ua rāi aia i nakiro ē, 'e a'a tā'au e tuatua ra?

17Ko koe rāi e 'akapa'apa'a i te Atua, kāreka ko taua tangata kē ra, kāre āna meitaki i rauka mai.

18Tē 'akameitaki nei au i te Atua, nō te mea, 'e ma'ata atu tāku tuatua'anga i te au reo kekē i tā kōtou kātoatoa.

19I roto rā i te 'ēkālēsia ra, ka 'inangaro au i te tuatua e rima rāi kupu māramarama 'ua 'ei 'āpi'i atu i tēta'i pāpāki, 'eia'a rā kia ta'i nga'uru tauatini kupu i roto i tēta'i reo kē.

20E te au taeake, kua oti 'ua i te mānakonako'anga mei te tamariki rāi te tū. Kāreka i te kino ra, 'ei tamariki varevare rāi kōtou; i tō kōtou mānakonako'anga rā, 'ei aronga mama'ata rāi i a kōtou.

21Isa 28.11,12Kua tātā'ia ki roto i te Tuatua Tapu ē,

“Nā roto mai i te au tangata reo kekē

ē te va'a o te aronga mānene ra,

e tuatua ai au ki tēianei 'iti tangata,

kāre rāi rā 'oki rātou e 'akarongo mai i āku,

tē tuatua maira te 'Atu.”

22'E 'akairo i reira te au reo kekē nō te aronga 'akarongokore ra, kāre ē nō te aronga 'akarongo ra; ko te toto'u rā, nō te aronga 'akarongo ia, ē kāre ē nō te aronga 'akarongokore.

23Ē kia putuputu te 'ēkālēsia katoa ki te ngā'i 'okota'i ra, ē tē tuatua ra te kātoatoa i roto i te au reo kekē ra, ē mē tomo mai ēta'i tangata kē, mē kāre ra, 'e aronga 'akarongokore, kāre āina rātou e karanga ē, kua nēneva'ia kōtou?

24Mei te mea ē, tē toto'u ra te kātoatoa, ē mē tomo mai tēta'i tangata 'akarongokore, mē kāre ra, tēta'i tangata kē, ka kimikimi'ia tōna tū e te kātoatoa, ē ka riro aia i te 'akapāpū'ia e te kātoatoa ē, 'e tangata rave 'ara aia,

25ē ka 'akaāri ātea 'ua'ia mai te au muna i tōna ra ngākau. I reira aia e tīpapa ai ki raro ē te 'akamori atu i te Atua ma te kāpiki'anga ē, “Tei rotopū tikāi te Atua i a kōtou!”

Kia rave'ia te au mea kātoatoa i roto i te 'ēkālēsia ma te tau meitaki

26E 'akapē'ea i reira, e te au taeake? Kia putuputu kōtou ra, 'e salamo tā te tangata tātakita'i, ē te tuatua 'āpi'i, ē te tuatua 'e'eu'ia, ē te tuatua reo kē, ē te tuatua 'akamārama'anga. Kia rave'ia rāi ēia mea kātoatoa nei 'ei 'akamātūtū i te 'ēkālēsia.

27Mē ka tuatua tēta'i tangata i roto i te reo kē ra, mē e tokorua rāua, mē kāre ra e tokotoru, 'eia'a rā kia ma'ata atu, kia tuatua tātakita'i rā rātou ē kia 'akamārama katoa'ia te reira e tēta'i tangata e tikāi.

28Mē kāre rā 'e tangata 'akamārama ra, kia mūtēkī 'ua te va'a tuatua i roto i te 'ēkālēsia, ē kia tuatua 'ua aia ki aia 'ua'orāi ē ki te Atua.

29Kia tuatua 'ua 'e tokorua, mē kāre ra 'e tokotoru peroveta ra, ē nā te tangata rava rāi e kimi matatio mai ē, 'e a'a e tuatua'ia ra.

30Ē, mē 'e tuatua 'e'eu'ia tā tēta'i tangata e no'o 'ua ra i te 'akarongo'anga kia mūtēkī te va'a tuatua mua.

31Kia pērā kōtou ra, e rauka ai i a kōtou kia toto'u tātakita'i, kia 'āpi'i'ia 'oki ē kia 'akamāro'iro'i'ia te kātoatoa rava.

32Ko te au vaerua peroveta ra, ko te au peroveta 'ua'orāi te mana i runga i a rātou.

33Kāre 'oki te Atua i te Atua o te kōnoninoni pū 'ua, māri rā nō te 'au.

Mei tei te au putuputu'anga 'ēkālēsia kātoatoa ra o te aronga tapu,

34kia mūtēkī 'ua te au va'ine i roto i te au 'ēkālēsia. Kāre 'oki rātou e tika'ia kia tuatua, kia kauraro mārie rā rātou, mei tā te Ture e tuatua maira.

35Mē 'inangaro rātou i te uiui 'aere nō runga i tēta'i mea, kia ui rāi rātou ki tā rātou au tāne i te ngutu'are ra. 'E mea taukore 'oki kia tuatua tēta'i va'ine i roto i te 'ēkālēsia ra.

36I kāpua mai ana te tuatua a te Atua i ko nā i tā kōtou 'ēkālēsia na? Mē kāre rā, ko kōtou anake 'ua āina te 'iti tangata tei taeria atu e taua tuatua ra?

37Mē tē manako ra tēta'i tangata ē 'e peroveta aia, mē kāre ra, tei aia tēta'i tao'ongā rima a te Vaerua ra, e 'āriki aia ē, ko tāku e tātā atu nei ki a kōtou na 'e 'akaue'anga ia nā te 'Atu ra.

38Mē kāre aia e 'āriki mai i tēia, kāre rāi aia 'ua'orāi e 'āriki'ia mai.

39Ē nō reira, e aku au taeake, kia umuumu ma'ata rāi kōtou i te toto'u, auraka rā e ārairai atu i te tuatua i roto i te au reo kekē.

40E rave rā i te au mea kātoatoa ma te tau ē te mako meitaki tikāi.