Apokalupo Nō runga i tēia puka - Cook Island Maori Revised New Testament(CIMRNT)
Nō runga i tēia pukaKo tēia puka kua 'akakite mai te reira i te 'ōrama tā Ioane i kite nō runga i te karere a te Atua ē nō runga i tā Iēsū i tuatua ē i rave (1.2). Ko tēia karere e toru au tu'anga:1. 'E mānganui te au kino e 'anga'anga nei i roto i tēianei ao ē ka tākinokino'ia te au Keretitiāno ē ka mate rāi rātou.2. Ko Iēsū te 'Atu, ē ka 'autū aia ki runga a'o i te au tangata ē te au mana rava rāi tei pāto'i atu i te Atua.3. 'E au tūtaki mēmeitaki nā te Atua ki te au tangata 'ākono meitaki tei piri tāmou ki aia, nā mua i a rātou tei mate nō tō rātou tāvini'anga i aia. 'E karere mana tēia tei 'ōronga atu i te mānakonako'anga ki te au Keretitiāno i te 'akamata'anga o te 'ēkālēsia. Kua tākinokino'ia 'oki rātou, mē kāre, kua tāmate'ia nō tō rātou 'akarongo. Nā roto i tēia puka kua mārama rātou ē, noa atu te mana ma'ata o te 'au Rōma ē tōna tū kino, ka 'autū rāi te Punua Māmoe a te Atua i te 'openga ra. Kua rauka i a rātou te māro'iro'i i te tāmou i te 'ākono meitaki.'E mānganui te au manako ē te au 'ākara'anga mei roto mai i te kōreromotu ta'ito tei 'akaāri mai i te au mea te ka tupu. Nō reira kua riro tēia puka mei te karere muna rāi nō te au Keretitiāno. Kua mārama rātou i te reira, kāreka tēta'i tangata Rōma, kāre ia i mārama ana. Tēia tēta'i 'ākara'anga: tō Bābulōnia 'inga'anga (pene 18). Kua mārama te au Keretitiāno ē, tē to'u nei te reira ki te 'inga'anga o te 'au Rōma. Kua riro taua mārama ra 'ei punāvai ē te 'akapakari'anga o tō rātou mānakonako'anga.I te 'akamata'anga o tēia puka, e 'itu leta nō ngā 'ēkālēsia e 'itu. I roto i tēia au leta nei kua 'akaāri'ia mai ē, 'e a'a tā te au pupu tūkēkē tei 'āriki i te 'Atu ka rave i te tuātau e tākinokino'ia ai rātou (2.1—3.22).Ko te tangata tei tātā i tēia puka, kua rave mai aia i tēta'i au 'aka'āite'anga mana 'ei 'akamārama i te mana o te Atua ē tāna 'akavā'anga.1. Te 'ōrama nō te terōno o te Atua (4.1-11), te pōkaikai tuatua ē te Punua Māmoe (5.1-14), tei 'akakite mai ē, ko te Atua ē te Mesia 'e mana tō rāua ki runga i te au mea kātoatoa e tupu nei, mē nā roto mai i te au tangata, mē kāre, nā roto i te au mea i runga ake i te tangata nei.2. Te 'e'eu'anga i ngā 'akairo e 'itu (6.1—8.5), te 'akatangi'anga i ngā pū e 'itu (8.6—11.19), ē te riringi'anga i ngā kapu e 'itu (16.1-21), ko ēta'i 'ōrama ia tei 'akaāri mai i te tū rikarika o tō te Atua 'akavā'anga i tēianei ao (17.1—20.5). I muri ake i tēia au tūmatetenga nei, ka rauka i te aronga 'ākono meitaki i te Atua te 'akameitaki'anga ma'ata rava atu (21.1—22.21).“'Akarongo atura au i tēta'i reo ma'ata mei kō mai i te terōno i te nā kō'anga mai ē, ‘Inā, te pū'ākapa o te Atua tei rotopū ia i te tangata nei. Ka no'o aia i rotopū i a rātou; ko rātou tōna 'iti tangata, ē ko ia te Atua i rotopū i a rātou, koia 'oki, ko tō rātou Atua ia. Ka 'ōrei aia i te au roimata kātoatoa mei roto mai i tō rātou au mata, ē kāre 'aka'ou te mate, te mi'i, te auē ē te mamae. Kua kore 'oki te au mea ta'ito ra’ ” (21.3-4).Te 'akano'ono'o'anga o tēia puka1. Te 'e'eu'anga a Ioane ē te aro'a'anga 1.1-82. Te 'ākara'anga o te Mesia tei 'akatū'ia 1.9-203. Te karere ki ngā 'ēkālēsia toko'itu 2.1—3.224. Tō te rangi 'akamori'anga 4.1-115. Te pōkaikai tuatua ē te Punua Māmoe 5.1—6.176. 'Okota'i 'ānere e 'ā nga'uru mā 'ā tauatini i 'akairo'ia 7.1-177. Ngā pū e 'itu 8.1—11.198. Te va'ine ē te tā'ae 12.1—13.189. Te 'īmene a te ta'i 'ānere e 'ā nga'uru mā 'ā tauatini 14.1—15.810. Te au kapu o tō te Atua riri 16.1-2111. Te va'ine 'akaturi ma'ata ē te puaka tā'ae 17.1—20.1012. Te 'akavā'anga mei runga mai i te terōno ma'ata teatea 20.11-1513. Te rangi 'ōu ē te 'enua 'ōu 21.1-814. Ko Iērūsalēma 'ōu 21.9—22.515. Te 'aere'anga mai o te Mesia 22.6-21
