1Auraka e kauvae atu i te tangata pakari, e tuatua marū rā ki aia mei ki te metua tāne ra. Ē e tuatua ki te au tangata 'ōu ra mei ki te au tuakana ē te au teina 'aere.
2E tuatua ki te au va'ine pakari ra mei ki te metua va'ine ra, ē ki te au va'ine 'ōu ra mei ki te au tua'ine ra ma te tū ngākau mā tikāi.
Te 'anga'anga nō te au va'ine taka'ua3E 'ākono i te au va'ine taka'ua, mē 'e au taka'ua tikāi rātou.
4Mē 'e tamariki tā te va'ine taka'ua, mē kāre, 'e au mokopuna, kia 'āpi'i mai rātou i te rave nā mua i te 'ākono'anga e tau i te 'ēvangelia i roto i tō rātou 'ua'orāi ngutu'are. Kia 'aka'oki rātou i te meitaki ki tō rātou au metua. 'E mea mareka'ia 'oki te reira ki te Atua.
5Ko te va'ine taka'ua tikāi, kāre e 'ākono'ia e te tangata, tē mānakonako 'ua ra aia i te Atua ē te tāmou 'oki i te pati'anga ē te pure i te pō ē te ao.
6Kāreka te va'ine taka'ua tei 'akananave i te 'apinga nui, kua mate ia, noa atu ē tē ora 'ua nei.
7E 'āpi'i atu i tēianei au tuatua kia 'apakore rātou.
8Ko te tangata 'oki kāre i 'ākono i tōna kōpū tangata, ē e nā mua 'oki tōna ngutu'are tangata, kua 'akaruke'ia aia i te 'akarongo, ē e kino atu ia i te tangata 'akarongokore.
9Kia 'akatika'ia tēta'i va'ine taka'ua ki roto i te pupu “va'ine taka'ua,” kia tae tōna mata'iti ki te ono nga'uru, ē 'e va'ine aia nā te tāne 'okota'i,
10ē 'e rongo meitaki 'oki tōna nō tāna 'anga'anga meitaki ra, mei te 'ākono tamariki, te 'ō'ō mai i te tangata kekē, te 'ōrei vaevae o te aronga tapu, te tauturu i te aronga i roko'ia e te tūmatetenga, koia 'oki, kua māro'iro'i aia i te au tū 'anga'anga meitaki katoa ra.
11Auraka te au va'ine 'ōu e 'iki'ia nō taua pupu va'ine taka'ua ra, nō te mea, ka tupu 'aka'ou tō rātou 'inangaro kōpapa ē ka 'iu rātou i tā te Mesia ra, ē ka 'inangaro i te 'akaipoipo 'aka'ou atu,
12ē ka 'aka'apa'ia 'oki rātou i reira ē, kua 'a'ati rātou i tā rātou tia mua ra.
13Ka 'akamātau 'ua rātou i a rātou i te ora'anga 'anga'angakore ma te koka 'aere ki tērā 'are ē ki tērā 'are. Kāre rātou i te ora'anga 'anga'angakore anake 'ua, ka taritari tuatua katoa rā rātou ē te tāmanamanatā i te 'anga'anga a ēta'i kē ra, ma te tuatua 'oki i te au mea kāre e tau kia tuatua'ia.
14Nō reira, tē manako nei au ē, kia 'akaipoipo te au va'ine 'ōu ra kia 'ānau tamariki ē kia 'ākono meitaki i te ngutu'are. I reira, kāre e 'ōake'ia te rāvenga ki te 'enemi 'ei 'akakino i a tātou.
15Kua 'aere kē ana 'oki tēta'i pāpāki nā muri i a Sātani.
16Mē 'e tangata 'akarongo tēta'i, 'e taka'ua tō roto i tōna ngutu'are, e tauturu atu aia i a rātou, ē auraka e 'akariro i a rātou 'ei 'apainga nā te 'ēkālēsia. Nā te 'ēkālēsia e tauturu i te au va'ine taka'ua tikāi.
Te 'anga'anga nō te aronga 'aka'aere17Ko te aronga 'aka'aere tei arataki meitaki ra, kia 'akama'ara'ia rātou nō te takirua tūtaki'anga, nā mua rā aia tei 'anga'anga pakari i te ako'anga ē te 'āpi'i'anga.
18a: Deut 25.4; b: Māt 10.10; Luk 10.7Tē nā kō maira 'oki te tuatua i tātā'ia ra ē, “Auraka koe e tōpiri i te va'a o te puakatoro i takataka'i i te sītona ra,” ē pērā katoa ra, “E tau te rave 'anga'anga ki tāna tūtaki.”
19Deut 17.6; 19.15Auraka e 'āriki i tēta'i tāpepe'anga ki tēta'i tangata 'aka'aere, māri 'ua, kia 'akapāpū'ia e ngā kite e tokorua, mē kāre, e tokotoru.
20Ko tei tārevakē ra, e kauvae atu i a rātou ki mua i te aroaro o te kātoatoa kia mataku katoa te aronga kē atu.
21Tē 'akamatakite atu nei au i a koe i mua i te aroaro o te Atua ē te Mesia ra ko Iēsū ē te au 'āngela 'iki'ia ra ē, kia 'ākono koe i tēianei au poroki'anga ma te kore e 'aka'apa i mua ake, ē pērā katoa ma te kore e piripiri tangata.
22Auraka e rapurapu i te tuku i tō rima ki runga i tēta'i 'ua atu tangata. Auraka katoa e piri atu ki te au 'ara tei rave'ia e te aronga kē. Kia vai 'apakore rāi koe.
23Oti ra 'ua i te inu i te vai anake, e inu rā i tēta'i mānga uaina nō tō'ou kōpū ē nō tō'ou maki putuputu.
24Tē kite pū'ia nei te au 'ara a tēta'i pāpāki i mua ake ka arataki ei te reira i a rātou ki te 'akavā'anga. Ko tā tēta'i pāpāki rā 'ara ka kitea 'ua'ia ā muri ake.
25Koia katoa te au 'anga'anga meitaki ka kitea pū'ia. Kia kore rā i kitea pū'ia ake, kāre rāi e no'o ngaro 'ua.
Who We AreWhat We EelieveWhat We Do
2025 by iamachristian.org,Inc All rights reserved.
