1Tei Kaisarea tēta'i tangata ko Korenēlio te ingoa, 'e rangatira 'ānere aia nō te pupu va'e'au tei tuatua'ia ra ē “Te Pupu Va'e'au Ītālia.”
2Ko ia ē tōna ngutu'are tangata kātoatoa, 'e aronga 'ākono ē te mataku i te Atua rātou. Kua 'ōronga aia i te 'apinga aro'a 'e mānganui nā te tangata ē kua pure putuputu 'oki aia ki te Atua ra.
3Mei i te ora toru i te a'ia'i kua kite pū atura aia i tēta'i 'āngela a te Atua i te 'aere'anga mai ē i te tuatua'anga mai ki aia ra, “E Korenēlio.”
4Ē kua tīroi matariki atura aia ki te 'āngela ma te mataku, ē kua nā kō akera, “E te 'Atu, 'e a'a tēia?”
Kua pa'u maira taua 'āngela ra ki aia, “Ko tā'au pure ē tā'au au 'apinga aro'a ra, kua tae rava te reira ki mua i te aroaro o te Atua, ē kua 'akama'ara'ia mai 'oki.
5Ē tēianei, e tono atu koe i ēta'i tangata ki Iōpa e tiki mai i te tangata ko Simona, ko tei tapa katoa'ia maira ē ko Pētero.
6Tei te ngutu'are aia o Simona, te tangata rapakau kiri; tei te pae tai 'oki tōna 'are.”
7Ē kia 'akaruke atura te 'āngela tei tuatua mai ana ki aia ra, kua kāpiki maira aia i e tokorua o tōna au tāvini, ē pērā katoa i tēta'i va'e'au 'ākono Atua mei rotopū mai i te au tangata i tōna pae,
8e 'ope akera te au mea rava rāi i te 'akakite'anga'ia ki a rātou, kua tono atura aia i a rātou ki Iōpa.
9I tērā mai rā, tē 'ā'āere 'ua ra rātou i tō rātou tere, ē tē vaitata atura ki taua 'ōire ra, kua 'aere atura a Pētero ki runga a'o i te 'are e pure ei, ko te ora mei te avatea pū 'oki ia.
10Ē kua pongi ma'ata i'ora aia, ē kua kakī atura i te kai. Ē tē te'ate'amamao'ia ra 'oki te reira, kua tāre'u'ia i'ora te manako o Pētero,
11ē kite atura aia i te rangi i te 'akatu'era'anga'ia ē tēta'i 'āriki i te 'eke'anga mai, mei te kāka'u ma'atama'ata te tū i te tuku'anga'ia mai ki te ao nei ma tōna kautuai e 'ā i 'ītiki'ia ra.
12Tei roto i taua 'āriki ra te au tū manu vaevae 'ā rava rāi, te au mea torotoro 'aere ē te au manu o te reva.
13Ē kua tae maira tēta'i reo ki aia ē, “E Pētero, ka tū, ka tā, ka kai.”
14Kua pa'u atura a Pētero, “Auraka rava ia, e te 'Atu, kāre rava 'oki au i kai ana i tēta'i 'ua atu mea taukore ē te vi'ivi'i.”
15Kua tae 'aka'ou maira te reo ki aia, ko te rua ia o te taime, “Ko tā te Atua i tāmā ra, auraka koe e tuatua ē, 'e mea taukore ia.”
16E toru akera 'akapērā'anga mai, 'apai'ia atura taua 'āriki ra ki runga i te rangi ra.
17Ē tē 'ēumiumi 'ua ra a Pētero i roto i tōna 'ua'orāi ngākau i te 'āite'anga o taua 'ōrama ra tāna i kite, inā, ko te au tangata maira tei tonokia atu e Korenēlio ra, e uiui 'aere i te 'are o Simona, e tū maira ki mua i te ngūtupa;
18ē kua kāpiki maira ma te ui katoa mai ē, mē ko te ngā'i te reira i no'o ei a Simona tei tapa'ia ra ē ko Pētero.
19Ē tē kimikimi ra a Pētero i te 'āite'anga o taua 'ōrama ra, kua tuatua maira te Vaerua ki aia, “Inā, e tokotoru tangata e ui maira i a koe.
20Ka tū, ka 'aere ki raro, ka āru atu i a rātou, auraka rava e 'ēkōkō, nāku 'oki rātou i tono mai.”
21Kua 'eke maira a Pētero ki raro ki aua tangata ra, ē kua nā kō atura, “Ko au tā kōtou e kimi nei. 'E a'a kōtou i 'aere mai ei?”
22Kua pa'u maira rātou, “Ko Korenēlio, 'e rangatira 'ānere aia, 'e tangata tiratiratū ē te mataku i te Atua, 'e rongo meitaki 'oki tōna ki te au Ngāti Iūda katoa ra, kua 'akaue'ia mai aia e tēta'i 'āngela tapu kia tiki mai i a koe kia 'aere atu ki tōna ngutu'are kia 'akarongo aia i te karere mei a koe maina.”
23Kua arataki maira a Pētero i a rātou ki roto i te 'are 'ei manu'iri nāna.
E pōpongi akera, kua tū akera aia ki runga, 'aere atura ma aua tangata ra, ē kua āru katoa atura ēta'i taeake nō Iōpa i aia.
24E ao 'aka'ou akera, kua tae atura rātou ki roto i a Kaisarea. Tē tāpapa 'ua maira 'oki a Korenēlio i a rātou. Kua oti 'oki i te 'akaputuputu'ia mai tōna kōpū tangata ē tōna au 'oa piri katoa ra.
25Ē tei te tomo'anga atu a Pētero ra, kua 'ārāvei maira a Korenēlio i aia, tūpou i'ora ki raro ki ōna vaevae, 'akangāteitei maira i aia.
26Kua 'akatū maira a Pētero i aia ki runga ma te tuatua atu ē, “Ka tū ki runga, 'e tangata 'ua 'oki au.”
27Ē tē tuatua ra a Pētero ki aia ra, kua tomo atura aia ki roto ē kite atura aia ē, 'e mānganui te au tangata i putuputu mai.
28Ē kua nā kō atura aia ki a rātou, “Kua mārama 'oki kōtou ē, kāre e 'akatika'ia te tangata Ngāti Iūda kia kāpiti atu ē kia 'ārāvei 'ua atu i tēta'i tangata e kāre i te Ngāti Iūda; inārā, kua 'akaāri mai ana te Atua ki āku ē, auraka rava tēta'i 'ua atu tangata e karanga'ia ē, 'e mea taukore ē te vi'ivi'i.
29Nō reira, i te tiki'anga'ia mai au nei, kua 'aere mai au ma te 'ēkōkōkore. Ē tēianei, ka ui atu au, nō te a'a kōtou i tiki mai i āku nei?”
30Kua pa'u maira a Korenēlio, “E toru rā i topa ake nei, mei tēia ora tikāi, kua pure au i te pure'anga ora toru i roto i tōku 'are, ē inā, kua tū 'ua maira tēta'i 'āngela ki mua i āku ma te kāka'u kakā,
31ē kua nā kō maira, ‘E Korenēlio, kua 'akarongo'ia mai 'oki tā'au pure ē kua ma'ara'ia mai tā'au 'apinga aro'a i mua i te aroaro o te Atua.
32Ē tēianei, e tono atu koe i ēta'i tangata ki Iōpa e tiki mai i te tangata ko Simona, ko tei tapa katoa'ia ra ē ko Pētero, tei te ngutu'are aia o Simona, te tangata rapakau kiri i te pae tai ra.’
33I reira rāi tōku tono'anga atu i te karere ki a koe na. 'E mea meitaki rava 'oki ko koe i 'aere mai. Ē tēianei, tēia anake mātou kātoatoa tei mua i te aroaro o te Atua nō te 'akarongo i te au mea kātoatoa tā te 'Atu i poroaki mai ki a koe na.”
Tē tuatua mai a Pētero i roto i te ngutu'are o Korenēlio34 Deut 10.17 Kua 'akamata atura a Pētero i te tuatua, nā kō atura, “Kua nakiro mou tikāi 'oki au ē, kāre te Atua e piripiri ki tēta'i 'iti tangata 'ua,
35inārā, ko tei mataku i aia ē tei rave i te mea tika i roto i te au 'iti tangata rava rāi, ka 'āriki'ia mai aia e te Atua.
36Kua kite 'oki kōtou i te tuatua tāna i tuku mai ki te au tamariki a Īserā'ela ra, i te tūtū 'aere'anga i te tuatua meitaki o te 'au nā roto i a Iēsū Mesia, koia 'oki te 'Atu o te au mea rava rāi.
37-38Kua kite katoa 'oki kōtou i te tuatua i 'akakite'ia nō runga i a Iēsū o Nāzarēta e pini rava ake a Iūdea katoa ra, i 'akamata'ia mei Galilea maira i muri ake i te bāpetīto'anga tā Ioane i ako ra. Kua kite katoa rāi 'oki kōtou ē, i 'akapē'ea te Atua i te 'akatā'inu'anga i a Iēsū o Nāzarēta ki te Vaerua Tapu ē te mana. Ē kua 'ā'āere 'ua aia ma te rave i te meitaki ē te 'akaora i a rātou rava rāi tei tīnaimate'ia e te Tiāporo; nō te mea, tei aia 'oki te Atua.
39Ko mātou 'oki te au kite i te au mea rava rāi tāna i rave i te 'enua o te Ngāti Iūda ē i Iērūsalēma katoa. Nā rātou 'oki i tāmate atu i aia nā roto i te pātiti'anga i aia ki runga i te rākau.
40Kua 'akatū rā te Atua i aia ki runga i te pō toru ra, ē kua 'akaāri ātea 'ua maira i aia,
41kāre rā ki te au tangata kātoatoa, ki a mātou 'ua nei rā tei 'iki'ia i mua ake e te Atua 'ei kite; ko mātou 'oki tei kai ē tei inu ma ia katoa i muri ake i tōna tū'anga mai mei te mate maira.
42“Ē kua 'akaue mai 'oki aia i a mātou kia ako 'aere atu i te tangata rava rāi, ē ma te 'akakite atu ē, ko ia tei 'akataka'ia e te Atua 'ei 'akavā i tei ora ra ē tei mate ra.
43Kua 'akakite 'oki te au peroveta kātoatoa i aia ē, ko te tangata rava rāi tei 'irinaki i aia ra ka rauka te 'akakore'angā 'ara nā roto i tōna ingoa.”
Te tae'anga mai o te Vaerua Tapu ki runga a'o i te au 'ētene44Ē tē tuatua 'ua ra a Pētero i aua tuatua ra, kua tae maira te Vaerua Tapu ki runga a'o i te tangata kātoatoa i 'akarongo mai i taua karere ra.
45Ē te au pipi Ngāti Iūda tei āru mai i a Pētero ra, kua vāvāria 'ua i'ora rātou, nō te mea, ko te 'apinga aro'a a te Vaerua Tapu ra, kua riringi katoa'ia mai ia ki runga a'o i te au 'ētene ra,
46nō te mea, kua 'akarongo 'oki aua pipi ra i a rātou i te tuatua'anga i te au reo kēkē ē te 'akapa'apa'a'anga i te Atua. Kua ui atura a Pētero,
47“Ka rauka āinei i tēta'i tangata i te ārai i te vai kia kore e bāpetīto'ia tēia au tangata tei 'āriki mai i te Vaerua Tapu mei a tātou katoa nei?”
48Kua 'akaue atura aia kia bāpetīto'ia rātou i te ingoa o Iēsū Mesia. Kua pati maira rātou i a Pētero kia no'o 'ua mai ana nō ēta'i rā.
Who We AreWhat We EelieveWhat We Do
2025 by iamachristian.org,Inc All rights reserved.
