Tito 1 - Cook Island Maori Revised New Testament(CIMRNT)

Te aro'a'anga

1'E leta tēia nō kō mai i te tāvini o te Atua ko Paulo, 'e 'āpōsetolo rāi nā Iēsū Mesia nō te 'akarongo o te aronga i 'iki'ia e te Atua, kia kite 'oki rātou i te tuatua mou o te 'ākono Atua ra.

2'E 'akarongo 'oki ē te kite tei 'akatumu'ia ki runga i te mānakonako'anga o te ora mutukore tā te Atua i papa'u, 'ōu te 'akamata'anga mai o tēianei ao. Kāre rava te Atua i te pikika'a!

3E tae akera ki te 'ati'anga tau tikāi, kua 'akakitekite 'ua maira aia i te reira papa'u'anga nāna nā roto mai i te ako'anga i te karere. Ē kua tukuna'ia mai te reira ki āku nei mei tei tau i te 'akano'ono'o'anga a te Atua tō tātou 'Akaora.

4 2 Kōr 8.23; Gal 2.3; 2 Timo 4.10 Tē tātā nei au ki a Tito, taku tamaiti tikāi i roto i tō tātou 'akarongo 'okota'i nei.

Kia 'ōronga 'ua mai te Atua te Metua ē Iēsū Mesia tō tātou 'Akaora i te aro'a 'ua e te 'au ki a koe.

Tā Tito 'anga'anga i Kēreta

5Tēia te tumu i vao'o ei au i a koe i Kēreta na: kia 'akatikatika koe i te au 'anga'anga toe ē kia tuku 'oki koe i te aronga 'aka'aere i roto i te au 'ōire katoa ra mei tāku i 'iku'iku atu ki a koe na.

61 Timo 3.2-7Kia 'apakore 'oki te 'aka'aere e tikāi, 'ei tāne va'ine 'okota'i, ē tei te 'akarongo rāi tāna tamariki ma te kore i tāpepe'ia nō te tū kanga ē te kaurarokore.

7Kia 'apakore 'oki te tiaki 'ēkālēsia e tikāi mei tei tau i te tāvini tei 'ākono i tā te Atua ra. Auraka aia e mārō i tōna 'ua'orāi 'inangaro, auraka e riri vave, auraka 'e tangata inuinu uaina, te 'akatupu pekapeka ē te morimori 'apinga.

8'Ei tangata 'ō'ō rā i te tangata kekē, tē 'inangaro 'ua ra i te mea meitaki, te ngākau marū, te tiratiratū, te tapu ē te mako.

9'Ei tangata pirimou katoa i te karere mou tei 'āpi'i'ia ki aia ra, kia rauka i aia nā roto i te 'āpi'i'anga tika i te 'akamāro'iro'i atu i te au taeake, ē pērā katoa i te 'akaāri atu i te tārevakē o te aronga i pāto'i maira.

10'E mānganui te aronga tei 'akava'ava'a i te mana 'aka'aere, tei tuatua pu'apingakore 'ua ē tei tāpikipiki ra. Te ma'ata o rātou nō roto mai i te au taeake Ngāti Iūda.

11Kia 'akamūtēkī'ia rātou e tikāi. Tē tāruri kē nei rātou i te tangata kātoatoa i roto i te au ngutu'are nā roto i te 'āpi'i'anga i te au mea kāre e tano kia 'āpi'i'ia. Ko tēia tō rātou 'akakoro'anga, kia rauka i a rātou te 'apinga nui o tēianei ao.

12Kua tuatua rāi tēta'i o rātou, 'e peroveta 'oki aia nō rātou, i te nā kō ē, “'E pikika'a 'ua rāi tō Kēreta kāre e tīvata; 'e au puaka tā'ae kino rava; 'e aronga 'anga'angakore, e kaikai ma'ata rā.”

13'E tika rāi tēia tuatua! Nō reira 'oki, e ako pakari atu koe i a rātou kia rauka i a rātou te 'akarongo mou tikāi.

14Kia matakite katoa rātou i te au tuatua tā'eke 'ua o te au taeake Ngāti Iūda ra ē te au 'akaue'anga a taua aronga ra tei anga kē atu mei te tuatua mou.

15'E mea vi'ivi'ikore te au mea katoa ra ki te aronga vi'ivi'ikore, kāreka ki te aronga vi'ivi'i ē te 'akarongokore ra, kāre rava ia 'e mea vi'ivi'ikore. Kua tāvi'ivi'i'ia 'oki tō rātou manako ē tō rātou 'akavā ngākau.

16Tē karanga nei rātou ē, kua kite rātou i te Atua; tē 'u'una nei rā rātou i aia nā roto i tā rātou 'anga'anga. 'E aronga ngākau kino tākiri rātou ē te kaurarokore, ē kāre roa e rauka i a rātou i te rave i tēta'i 'ua atu 'anga'anga meitaki.