1 Timōteo 2 - Cook Island Maori Revised New Testament(CIMRNT)

Te 'akamori'anga a te 'ēkālēsia

1I mua roa, tē 'akamāro'iro'i nei au kia rave'ia te au pure: te pati'anga 'akatenga, te pati'anga tauturu ē te 'akameitaki'anga nō te au tangata kātoatoa;

2nō te 'ui ariki ē te aronga rava rāi 'e mana tō rātou, kia rauka i a tātou te ora'anga 'au ē te kangakore'ia, ma te 'ākono i tā te Atua ē te au mea tau meitaki.

3'E mea meitaki 'oki te reira ē te mareka'ia e te Atua, tō tātou rāvenga ora,

4ko tei anoano i te tangata kātoatoa kia 'akaora'ia ē kia rauka te kite i te tuatua mou.

5'Okota'i 'oki Atua, ē te tangata i rotopū i te Atua ē te au tangata e 'okota'i rāi ia, koia 'oki, ko te Mesia ra ko Iēsū i tōna tū tangata,

6ko tei 'ōronga i aia 'ua'orāi 'ei 'oko nō te tangata rava rāi, ē tei riro 'ei kite tikāi nō te reira anoano o te Atua i te tuātau tau tikāi.

72 Timo 1.11I 'ākono'ia ai au nei 'ei karere ē 'ei 'āpōsetolo kia 'āpi'i au i te au 'ētene i te 'akarongo ē te tuatua mou. 'E tuatua mou tāku e 'akakite nei, ē kāre i te pikika'a.

Tā te au tāne ē tā te au va'ine 'ākono'anga i roto i te 'ēkālēsia

8Tē 'inangaro nei au i te au tāne kia pure rātou i te au ngā'i katoa ma te tāki'anga i te rima mā ki runga ma te ririkore ē te taumārōkore.

91 Pet 3.3Ē tē 'inangaro katoa nei au i te au va'ine kia 'akamānea rātou i a rātou ki te kāka'u meitaki ma te 'akateiteikore, ma te tū tau tikāi ra; auraka ma te rauru 'akamānea'ia i te tū tūkē; auraka ō rātou 'auro, mē kāre te poe, mē kāre te kāka'u 'oko ma'ata.

10Kia mānea rā rātou nā roto i te au 'anga'anga meitaki mei tei tau i te au va'ine tei 'akakite ē, tē 'ākono nei rātou i tā te Atua.

11Kia 'āpi'i te au va'ine ma te mūtēkī ē te tū kauraro tikāi.

12Kāre au e 'akatika kia 'āpi'i atu te va'ine ē kia 'akateitei ki runga i te tāne ra, kia mūtēkī 'ua rā.

13a: Gen 2.7; b: Gen 2.21,22Ko Ādamu 'oki tei 'anga'ia nā mua, i muri ake a Eva.

14Gen 3.1-6Kāre 'oki a Ādamu i arataki kē'ia ana, ko te va'ine rā tei arataki kē'ia ē tei rave i te 'ara.

15Ko te 'ānau tamariki, ko tō te va'ine rāvenga ora ia, mē tinamou rātou i te 'akarongo, te aro'a ē te 'akatapu'anga ma te tū tau tikāi.