1E te au taeake, kua 'āpi'i'ia kōtou e mātou i te tū 'aerenga e mareka ai te Atua. Ē tē pērā nei rāi kōtou! I tēianei rā, tē pati nei ē tē ako atu nei mātou i a kōtou i te ingoa o te 'Atu ra o Iēsū kia ma'ata atu rāi tō kōtou 'akapērā'anga.
2Kua kite 'oki kōtou i te au 'akaue'anga tā mātou i tuku atu ki a kōtou na ma te mana o te 'Atu ra o Iēsū.
3Tēia 'oki tō te Atua anoano: kia tapu kōtou, kia kore kōtou e 'akaturi,
4kia kite te tangata tātakita'i i ō kōtou na i te 'aka'aere i tōna 'ua'orāi kōpapa ma te tapu ē te ngāteitei,
5'eia'a ma te noinoi tikakore mei te au 'ētene rāi tei kore i kite i te Atua ra.
6I tēia au mea nei, auraka rava tēta'i e rave i te 'ara ki tōna taeake, ē e kimi 'ua i te meitaki nōna 'ua'orāi nō kō mai i aia. Kua 'akakite takere 'oki mātou ē kua 'akamatakite 'oki i a kōtou ē, nā te 'Atu e 'akautunga mai i te aronga tei rave i taua au mea ra.
7Kua kāpiki 'oki te Atua i a tātou kia tapu tātou, auraka kia taukore ē te tikakore.
8Nō reira, te tangata tei kōpae atu i tēia 'āpi'i'anga, kāre ia i te tangata tāna i kōpae, ko te Atua rā tē 'ōronga mai nei i tōna Vaerua Tapu ki a kōtou na.
9Kāre e umuumu'ia kia tātā atu au ki a kōtou na nō runga i te aro'a taeake. Ko kōtou 'ua'orāi 'oki te aronga tei 'āpi'i'ia e te Atua i te aro'a tēta'i i tēta'i.
10Ē tē pērā nei rāi kōtou ki te au taeake rava rāi i Mākedōnia katoa ra. Tē ako atu nei rā mātou i a kōtou kia ma'ata 'ua atu rāi.
11E tāmata pakari i te no'o mārie ē te 'ākono i tā kōtou 'ua'orāi au mea, ē e 'anga'anga ma tō kōtou 'ua'orāi rima mei tā mātou rāi i 'akaue atu ki a kōtou na.
12Ka tau meitaki i reira tō kōtou 'aerenga i te manako'anga o te aronga i va'o i te 'ēkālēsia, ē kāre kōtou i ngere i tēta'i mea.
Te tae'anga mai o te 'Atu13Tē 'inangaro nei mātou kia mārama meitaki kōtou, e te au taeake, nō runga i te aronga tei mate ra, kia kore 'oki kōtou e taitaiā mei te aronga kē kāre ō rātou mānakonako'anga.
14Tē 'irinaki nei 'oki tātou ē, kua mate a Iēsū ē kua tū 'aka'ou akera ki runga. Nō reira, tē 'irinaki katoa nei tātou ē, nā te Atua e 'aka'oki mai ma Iēsū katoa i te aronga tei mate i roto i aia.
15 1 Kōr 15.51,52 Ko tēia 'āpi'i'anga nā mātou, 'e karere ia nā te 'Atu, koia 'oki, ko tātou ko te aronga tē ora 'ua ra i tō te 'Atu tae'anga mai, kāre tātou e nā mua i te aronga i mate ra.
16I tō te Atua kāpiki'anga i tēta'i 'akaue'anga, i te reo o te 'āngela ma'ata ē i te kōkina'anga o te pū a te Atua, ka 'eke mai te 'Atu 'ua'orāi mei te rangi mai. Ē ko te aronga tei mate i roto i te Mesia ra ka tū mai rātou ki runga nā mua.
17Ē muri ake ko tātou nei, ko te aronga e ora 'ua ra ē rātou katoa e 'apai'ia ai ki runga ki roto i te tiao kia 'ārāvei atu i te 'Atu ki roto i te reva nei. Ka no'o tāmou atu ei tātou i te pae o te 'Atu i reira.
18Ē tēnā na, e 'akapūma'ana kōtou tēta'i i tēta'i ma tēianei ngā karere.
Who We AreWhat We EelieveWhat We Do
2025 by iamachristian.org,Inc All rights reserved.
