Kolosa 3 - Cook Island Maori Revised New Testament(CIMRNT)

1 Sal 110.1 Ē tēnā na, kua 'akatū katoa'ia ake nei kōtou ma te Mesia. Ka kimi kōtou i reira i te au mea i runga ra, te ngā'i e no'o'ia e te Mesia i te rima katau o te Atua ra.

2E 'akamou i tō kōtou ngākau ki te au mea i runga ra, auraka ki te au mea o tēianei ao.

3Kua mate 'oki kōtou, ē tō kōtou ora'anga tika tikāi i 'u'una katoa'ia ake nei ma te Mesia i roto i te Atua.

4Ko te Mesia 'oki tō kōtou ora'anga tika tikāi, ē kia mama maira aia i tōna kakā, ka kitea'ia mai rāi kōtou ma ia katoa.

Te ora'anga ta'ito ē te ora'anga 'ōu

5Ē tēnā na, ka tāmate i tō tēianei ao 'inangaro 'ara i roto i a kōtou, koia 'oki: te 'akaturi, te kanga vi'ivi'i, te noinoi vi'ivi'i ē te noinoi kino, ē pērā katoa te morimori 'apinga, 'e tū 'akamori 'ītoro 'oki te reira.

6Nō taua au mea ra 'oki ka tae mai ei te riri o te Atua ki runga i te aronga kaurarokore.

7Ē i tō kōtou no'o'anga i rotopū i a rātou ra i muatangāna, kua rave ana rāi kōtou i taua au mea ra.

8I tēianei rā, ka kōpae atu kōtou i tēia au mea, koia 'oki te riri, te mākitakita, te tū ngākau kavakava, te 'akakino ē te tuatua vi'ivi'i.

9Eph 4.22Auraka e pikika'a atu tēta'i ki tēta'i, nō te mea, kua 'akaruke kōtou i tō kōtou tū ta'ito ma tāna au peu,

10a: Eph 4.24; b: Gen 1.26ē kua 'āriki kōtou i te tū 'ōu. Kua 'anga te Atua i te tangata i tōna 'ua'orāi tū, ē tē 'akatinamou nei aia i te 'aka'ōu i te reira, kia rauka i a kōtou te kite mou tikāi.

11Nō reira, kāre 'aka'ou 'e Eleni ē te Ngāti Iūda, kāre 'e peritome ē te peritomekore, kāre 'e tangata kē ē te Sēkuti, kāre 'e tū tuika'a ē te tū rangatira. Ko te Mesia anake rā tā tātou e ma'ara atu e tikāi, ko te Mesia 'oki i roto i a tātou rava rāi.

12 Eph 4.2 Ko kōtou te aronga tapu tei 'iki'ia ē tei 'akaperepere'ia e te Atua. Nō reira, ka 'akangākau aro'a kōtou ē te tākinga meitaki, te 'aka'aka, te marū ē te 'akakoromaki.

13Eph 4.32E 'āriki 'ua i te tū o tēta'i ē tēta'i. E 'akakore i te 'apa tēta'i ki tēta'i mē 'e tāpepe'anga tā tēta'i ki tēta'i. Mei te Mesia i 'akakore i tā kōtou na, e pērā katoa kōtou.

14Ē i runga rava ake, kia 'akakāka'u'ia kōtou ki te aro'a tei tā'okota'i i te au mea rava rāi kia rauka i a rātou tō rātou tū meitaki tikāi.

15Ē nā te 'au o te Mesia e 'aka'aere i tō kōtou ngākau. Nō taua 'au ra 'oki i kāpiki'ia ai kōtou kia riro 'ei kōpapa 'okota'i. Ē e 'akameitaki kōtou i te Atua.

16Eph 5.19,20Kia no'o tika rāi te au meitaki rava rāi o te karere nō runga i te Mesia i roto i tō kōtou ngākau. E 'āpi'i ē e ako atu tēta'i i tēta'i ma te pakari mou. E 'īmene i te au salamo, te au 'īmene ē te au pe'e nō kō mai i te Vaerua ma te 'akameitaki i te Atua i roto i tō kōtou ngākau.

17Ē te au mea katoa tā kōtou e rave ra, nā roto i te tuatua, mē kāre i te 'anga'anga, e rave rāi i te reira i te ingoa o te 'Atu ra ko Iēsū, ma te 'akameitaki i te Atua Metua nā roto i aia.

Te au riri'anga tangata i roto i te ora'anga 'ōu

18 Eph 5.22; 1 Pet 3.1 E te au va'ine ra, e kauraro atu kōtou i tā kōtou au tāne mei tei tau i tō kōtou piri'anga ki te 'Atu ra.

19 Eph 5.25; 1 Pet 3.7 E te au tāne ra, e aro'a atu i tā kōtou au va'ine, ē auraka e 'akariri atu i a rātou.

20 Eph 6.1 E te au tamariki ra, e kauraro atu i tō kōtou au metua i te au mea katoa nei. 'E mea mareka 'oki te reira i te 'Atu.

21 Eph 6.4 E te au metua ra, auraka e 'aka'aere i tā kōtou tamariki ma te rima teima'a roa, ko te 'akatae 'au ā'ea rātou.

22 Eph 6.5-8 E te au tuika'a ra, e kauraro atu i tō kōtou au pū i te pae kōpapa i te au mea rava rāi, auraka anake mē 'ākara'ia kōtou mei te aronga tārekareka tangata ra, ma te tāvaita'i rā o te ngākau nō te mataku i te 'Atu.

23Ē te au mea katoa tā kōtou e rave ra, e rave rāi i te reira ma te ngākau tae, mei te mea rāi ē, tē 'anga'anga nei kōtou nō te 'Atu, ē kāre nō te tangata.

24Kua nakiro 'oki kōtou ē, nā te 'Atu e 'ōronga mai i tō te aronga tapu tu'anga 'ei tūtaki nō kōtou. Tē tāvini nei 'oki kōtou i te 'Atu, i te Mesia.

25Deut 10.17; Eph 6.9Ko te tangata 'anga'anga kino ka tūtaki'ia mai ia kia tau ki te kino tāna i rave, nō te mea, kāre tākiri a te Atua e piripiri tangata.