Rōma 5 - Cook Island Maori Revised New Testament(CIMRNT)

Kua 'āriki'ia 'ei aronga tuatua tika

1Nō reira, nō te mea ē kua 'akatika'ia tātou nā roto i te 'akarongo, 'e 'au tō tātou i te Atua ra nā roto i tō tātou 'Atu i a Iēsū Mesia ra.

2Nōna 'oki tātou i ō atu ei ki tēianei aro'a 'ua i no'o'ia e tātou nei. Ē tē rekareka nei tātou i roto i te tatari'anga atu i te kakā o te Atua.

3Kāre rā ē nō te reira anake 'ua, tē rekareka katoa nei rāi tātou i roto i te au tūmatetenga i te kite'anga ē, nā te tūmatetenga e 'akatupu i te 'akakoromaki,

4ē nā te 'akakoromaki e 'akatupu i te tūranga māro'iro'i, ē nā te tūranga māro'iro'i e 'akatupu i te tatari'anga.

5Kāre 'oki te tatari e tā'akamā mai i a tātou, nō te mea, kua riringi'ia mai te aro'a o te Atua ki roto i tō tātou au ngākau nā roto i te Vaerua Tapu tei 'ōronga'ia mai ki a tātou nei.

6I tō tātou nei 'oki vai paruparu'anga ra, i mate ei te Mesia i te tuātau tika ra nō te aronga 'ākonokore Atua.

7'E mea ngatā tikāi i tēta'i kia mate aia nō tēta'i tangata 'ākono ture, pēnei ake rā, tē vai te'ate'amamao ra tēta'i tangata i te mate nō tēta'i tangata meitaki tikāi.

8Inārā, kua 'akaāri mai te Atua i tōna aro'a ki a tātou nei i te mea ē, tē vai tangata 'ara 'ua nei rāi tātou, i mate ei te Mesia nō tātou nei.

9Mē kua 'akatikatika'ia mai tātou i tēianei i roto i tōna toto, 'e ma'ata 'ua atu te tumu ka 'akaora'ia ai tātou e ia mei te riri mai o te Atua ra.

10Mē kua 'aka'ongi'ia tātou ki te Atua nā roto i te matenga o tāna Tamaiti i tō tātou no'o 'enemi'anga, 'e ma'ata 'ua atu rāi te tumu ka 'akaora'ia ai tātou e tōna ora, nō te mea, kua 'aka'ongi'ia tātou.

11Kāre rā ē ko te reira anake 'ua, tē rekareka katoa nei rā tātou i roto i te Atua, nā roto i tō tātou 'Atu i a Iēsū Mesia ra, nōna i rauka ai i a tātou i tēianei taua 'aka'ongi'anga ra.

Ko Ādamu ē Iēsū Mesia

12 Gen 3.6 Nō reira, mei te 'ara i tae mai ki te ao nei nā roto i te tangata 'okota'i ē te mate nā roto mai i te 'ara, i pērā katoa te mate i te toto'a'anga ki te tangata rava rāi, nō te mea, kua 'ara te kātoatoa.

13I vai ana 'oki te 'ara i te ao nei i mua ake ka 'ōronga'ia mai ei te Ture. Kāre rā te 'ara i 'akariro'ia 'ei 'ara tikāi, nō te mea, kāre 'oki 'e ture.

14I mana 'oki te mate mei a Ādamu mai rāi e tae roa mai ki a Mōse nō runga katoa i te aronga kāre i 'ara i te kaurarokore i tēta'i 'akaue'anga takakē mei a Ādamu ra.

'E tūtū 'oki a Ādamu nō te ka tae mai.

15Kāre rā te tā'ongā rima a te Atua i 'āite ki te 'ara a Ādamu. I te mea 'oki ē, 'e mānganui tei mate i te 'ara a te tangata 'okota'i ra, 'e ma'ata 'ua atu rāi te aro'a 'ua o te Atua ē te tā'ongā rima tei tae mai ki te tangata rava rāi 'e mānganui nā roto mai i te aro'a 'ua o taua tangata 'okota'i ra, ko Iēsū Mesia.

16Kāre 'oki te tā'ongā rima i 'āite ki te kino i 'akatupu'ia e te 'ara a te tangata 'okota'i ra: nā te 'akavā'anga i muri ake i te 'ara 'okota'i i 'akatupu ei i te 'akautunga'anga, kāreka te tā'ongā rima i muri ake i te au 'ara 'e mānganui, nāna i 'akatupu i te 'akatikatika'anga.

17Mei te mea ē, nā te 'ara a te tangata 'okota'i ra i mana ai te mate nō taua tangata 'okota'i ra, 'e ma'ata 'ua atu rāi te aronga te ka 'āriki i te aro'a tūmatatini ē te tā'ongā rima o te tuatua tika, ē 'e mana tō rātou i te ora'anga nei nō tēta'i tangata 'okota'i ra, ko Iēsū Mesia.

18Ē tēianei, mei te tangata rava rāi i taea e te utunga nō te 'ara a te tangata 'okota'i ra, i pērā katoa 'oki te tangata rava rāi i te 'āriki'anga'ia 'ei aronga tuatua tika nō te 'akatikatika'anga o tēta'i tangata 'okota'i ra kia ora rātou.

19Nō te 'ākonokore o te tangata 'okota'i ra, 'e mānganui tei 'akariro'ia 'ei aronga 'ara, pērā katoa 'oki nō te 'ākono o te tangata 'okota'i ra, 'e mānganui te ka 'akariro'ia 'ei aronga tuatua tika.

20I 'akaō maira 'oki te Ture kia ma'ata atu te 'ara; i te ngā'i rā i ma'ata ai te 'ara ra, kua tūmatatini 'ua mai rāi te aro'a 'ua i reira.

21Mei te 'ara 'oki i mana nā roto mai i te mate, ka pērā katoa 'oki te aro'a 'ua e mana ai nō tō tātou 'Atu ra, ko Iēsū Mesia, nā roto i te tuatua tika e tae 'ua atu ki te ora mutukore.