Apokalupo 16 - Cook Island Maori Revised New Testament(CIMRNT)

Te au kapu o tō te Atua riri

1Kua 'akarongo atura au i tēta'i reo ma'ata nō roto mai i te nao ra i te tuatua'anga ki ngā 'āngela e 'itu ē, “I tō kōtou 'aerenga e riringi i ngā kapu e 'itu o tō te Atua riri ki runga a'o i te 'enua nei.”

2 Exo 9.10 Kua 'aere atura te 'āngela mua ē kua riringi i tāna kapu ki runga a'o i te 'enua. Kua tupu i'ora te 'une rikarika ē te mamae ki runga a'o i te au tangata tei a rātou te tāpa'o o te puaka tā'ae ra ē tē 'akamori nei i tōna tiki.

3Kua riringi atura te rua o ngā 'āngela i tāna kapu ki roto i te tai. Kua riro i'ora te tai 'ei toto mei te toto o tēta'i tangata i taia'ia ra, ē te au mea ora rava rāi i roto i te tai kua mate.

4 Exo 7.17-21; Sal 78.44 Kua riringi atura te toru o ngā 'āngela i tāna kapu ki roto i te au kauvai ē te au punāvai. Kua riro i'ora rātou 'ei toto.

5Kua 'akarongo atura au i te 'āngela o te au vai i te tuatua'anga ē: “'E tuatua tika tā'au, ko tē vai nei ē tei vai ana, e te Mea Tapu ē. Ko tēia 'oki tā'au tukungā tika.

6Kua 'ōronga koe i te toto 'ei inu nā rātou ko tei 'akamaringi i te toto o te aronga tapu ē te au peroveta. 'E mea tano 'oki ia nā rātou.”

7Kua 'akarongo katoa atura au i tēta'i reo nō kō mai i te 'atarau tei nā kō maira, “E te tika, e te 'Atu, te Atua Mana Kātoatoa; ko tā'au tukungā tika 'e mea mou ia ē te tau tikāi.”

8Kua riringi atura te 'ā o ngā 'āngela i tāna kapu ki runga a'o i te rā. Kua 'ōronga'ia mai te tika ki te rā i te 'akapakapaka i te tangata ki tōna veravera ma'ata.

9Pakapaka i'ora te au tangata i te veravera ma'ata. Kua 'akakino atura rātou i te ingoa o te Atua, tei aia 'oki te mana nō runga i tēia au mate. Kāre rā rātou i tatarā'ara, ē kāre rāi i 'akapa'apa'a atu i aia.

10 Exo 10.21 Kua riringi atura te rima o ngā 'āngela i tāna kapu ki runga a'o i te terōno o te puaka tā'ae ra. Kako rava akera tōna bāsileia i te pōiri. Kua katikati i'ora te tangata i tō rātou arero nō te mamae 'oki.

11Kua 'akakino rātou i te Atua o te rangi nō tō rātou au mate ē te au 'une, kāre rāi rātou i 'akaruke i tā rātou 'anga'anga kino.

12 Isa 11.15 Kua riringi atura te ono o ngā 'āngela i tāna kapu ki runga a'o i te kauvai ma'ata ko Eupharāti. Kua 'akamarō tākiri'ia tōna vai, ē i 'akapērā te 'akate'ate'amamao'anga'ia o te mataara nō te ui ariki mei te 'itinga mai o te rā.

13Kua kite atura au e toru vaerua vi'ivi'i, mei te rana te tū, i te 'aere'anga mai mei roto mai i te va'a o te tā'ae, te puaka tā'ae ē te peroveta pikika'a.

14'E au vaerua dēmoni 'oki rātou tei rave i te au 'akairo. Tē 'aere nei rātou ki te ui ariki o te ao katoa nei i te tā'okota'i mai i a rātou nō tēta'i tamaki i te rā ma'ata o te Atua Mana Kātoatoa.

15 Māt 24.43,44; Luk 12.39,40; Apo 3.3 “Inā, ka 'aere atu au mei te keiā. 'E ao tō tei matakite ē tei 'ākono i tōna kāka'u, kia kore aia e 'aere ta'ākā 'ua, ē kāre te au tangata e kite i tōna 'akamā.”

16 2 Arik 23.29; Zek 12.11 Kua 'akaputuputu i'ora taua ngā vaerua ra i te ui ariki ki te ngā'i tei tapa'ia ē ko Aramagido i te reo 'Ēbera.

17Kua riringi atura te 'itu o ngā 'āngela i tāna kapu ki roto i te māreva. Ko tēta'i reo ma'ata maira i reira nō roto mai i te nao mei kō mai i te terōno ra, i te nā kō'anga ē, “Kua oti!”

18Apo 8.5; 11.13,19I reira te kōraparapa uira, te au reo ē te māngūngū. Ē 'e ngāruerue'anga 'enua ma'ata katoa, kāre ake rāi 'e ngāruerue'anga 'enua e 'āite i te ma'ata i tupu ana mei tō te tangata o te 'enua nei 'anga'ia'anga mai.

19Isa 51.17Kua kokoti'ia te 'ōire ma'ata ra e toru kōtinga, ē te au 'ōire o te au 'iti tangata kua 'inga ki raro. Kua ma'ara te Atua i a Bābulōnia ma'ata nā roto i te 'ōronga'anga atu ki aia i te kapu uaina o tōna riri ma'ata.

20Apo 6.14Kua ngaro te au pā 'enua kātoatoa, ē te au maunga kāre e kitea 'aka'ou ia.

21Exo 9.23; Apo 11.19Ko te ua toka ma'ata, mei te ta'i 'ānere paunu rāi te teia'a i te toka 'okota'i, kua topa te reira mei runga mai i te rangi ki runga a'o i te tangata. Ē kua 'akakino atura te au tangata i te Atua nō taua mate o te ua toka ra. 'E mate ma'ata rava 'oki te reira.