2 Kōrīnētia 11 - Cook Island Maori Revised New Testament(CIMRNT)

Ko Paulo ē te au 'āpōsetolo pikika'a

1Tē 'inangaro nei au kia 'akakoromaki mai ana kōtou i tōku mānga nēneva; e 'akakoromaki katoa mai i āku.

2Tē 'akaaro'a atu nei au i a kōtou i te 'akaaro'a Atua ra, nō te mea, nāku i momoko i a kōtou ki te Mesia ra mei te pāretēnia vi'ivi'ikore ra i tukuna'ia ki te tāne 'okota'i.

3Gen 3.1-5,13Tē mataku nei rā au ko te arataki kē'ia tō kōtou ngākau mei te tū tāvaita'i mai ē te vi'ivi'ikore ki te Mesia mei a Eva i pikika'a'ia e te karape o te 'ōvī ra.

4Mē 'aere mai 'oki tēta'i tangata ma te tūtū 'aere i tēta'i Iēsū kē, tei kore i tūtū 'aere'ia e mātou; mē kāre, kua rauka mai i a kōtou mei taua tangata ra tēta'i vaerua kē kāre i rauka ana i a kōtou; mē kāre, tēta'i 'ēvangelia kē kāre i mouria ana e kōtou, tē 'akakoromaki mārie ra kōtou i aia.

5Tē manako nei 'oki au ē, kāre rava au i ngere i tēta'i 'ua atu mea a taua au 'āpōsetolo tūkē rava atura.

6Mei te mea ē, e kamakura au i te tuatua, kāre rā au i kamakura i te kite. Kua 'akaāri pāpū tikāi 'oki mātou i te reira ki a kōtou nā roto i te au mea kātoatoa i te au 'ati'anga rava rāi.

7Kua tūtū 'aere atu au i te 'ēvangelia a te Atua ki a kōtou na ma te tūtakikore. Kua tārevakē āina au i te tā'aka'aka'anga i āku 'ua'orāi kia 'akateitei'ia kōtou?

8Kua kainga'ia 'oki e au te au meitaki o te au 'ēkālēsia kē nō te rave i te 'anga'anga 'ēvangelia i rotopū i a kōtou na.

9Phil 4.15-18I āku 'oki i no'o ki ō kōtou na ē tē ngere ra au, kāre rava au i 'akateia'a atu ana i tēta'i 'ua atu tangata. Nā te au taeake rā i 'aere mai ana nō Mākedōnia mai i turu mai i āku i taua ngere nōku ra. Kua matakite au ē ka matakite 'ua atu rāi au, auraka au kia riro 'ei 'apainga teia'a ki a kōtou na, noa atu ē 'e a'a te tū.

10Tēia te tuatua mou a te Mesia ra i roto i āku nei: kāre rava tēta'i tangata i roto i te au ngā'i rava rāi i Ākaia na e 'akakore i tēia 'akaparau'anga nāku.

11Nō te a'a ra? Kāre āina au i aro'a i a kōtou? Ko te Atua 'oki tei kite ē kua aro'a au i a kōtou.

12Ko tāku e rave nei, ka rave 'ua atu rāi au 'ei 'akakore atu i te rāvenga a te aronga kimi rāvenga kia 'āiteite mai rātou mei a mātou katoa nei rāi te tū i roto i taua mea tā rātou e 'akaparau ra.

13Ko taua tū tangata ra, 'e au 'āpōsetolo pikika'a rātou, 'e aronga rave 'anga'anga tāpikipiki nā roto i te 'akatūtū'anga 'āpōsetolo i a rātou nā te Mesia.

14Kāre e pō'itirere! Ko Sātani 'ua'orāi 'oki tei 'akatūtū 'āngela i aia nō te mārama.

15'E mea ngō'ie i reira nō tōna au tāvini i te 'akatūtū tāvini i a rātou nō te tuatua tika. Tō rātou 'openga ka 'akatau'ia ia ki tā rātou au 'anga'anga.

Tō Paulo au mate nō tōna tūranga 'āpōsetolo

16Tē tuatua 'aka'ou atu nei au ē, auraka rava tēta'i tangata e manako i āku ē 'e nēneva. Mē kua pērā rā kōtou, e 'āriki mai i āku mei te nēneva rāi, kia 'akaparau iti 'ua ana au.

17Ko tēia tū 'akaparau 'oki tāku e tuatua atu nei, kāre au e tuatua ana mei tā te 'Atu e 'inangaro ra, mei tā te nēneva rā.

18Nō te mea rā ē, 'e mānganui tei 'akaparau i te au mea o tēianei ao, ka 'akaparau katoa rāi au.

19Nō tō kōtou tū pakari 'oki te 'akatika 'ua nei kōtou ki tā te nēneva.

20I te mea 'oki ē, tē 'akakoromaki ra kōtou kia tā'ao'ia e tēta'i, kia kainga'ia tō kōtou meitaki e tēta'i, kia 'aru'ia mai kōtou e tēta'i, kia 'akateitei tēta'i i aia 'ua'orāi, ē kia moto'ia mai 'oki tō kōtou mata e tēta'i.

21Tē 'akamā nei au i te karanga atu ē, kāre mātou i māro'iro'i i te 'akapērā!

Mei te mea rā ē, tē tau ra tā tēta'i 'akaparau'anga — 'e tuatua nēneva rāi tēia nāku — e tau katoa rāi kia 'akaparau au.

22'E Ngāti 'Ēbera āina rātou? Koia katoa au! 'E Ngāti Īserā'ela āina rātou? Koia katoa au! 'E 'uānga āina rātou nō Āberahāma? Koia katoa au!

23Anga 16.23'E au tāvini āina rātou nō te Mesia? Tē tuatua nei au mei te nēneva rāi te tū. Ko au rāi te tāvini meitaki rava atu. 'E ra'i rava atu tāku 'anga'anga i rave, 'e ra'i rava atu tōku titiri'anga'ia ki roto i te 'are 'āuri, 'e ra'i rava atu tōku pāpā kāravarava'anga'ia, kua vaitata putuputu au ki te mate.

24Deut 25.3E rima ōku pāpā'anga'ia e te Ngāti Iūda takitoru nga'uru mā iva i te pāpā'anga 'okota'i,

25a: Anga 16.22; b: Anga 14.19e toru ōku pāpā'anga'ia ki te rākau, 'okota'i ōku pē'i'anga'ia ki te toka. E toru ōku ō'anga ki roto i te pararī'anga pa'ī, 'okota'i ōku pō ē 'okota'i ao i te pāpānu 'aere'anga nā te moana.

26a: Anga 9.23; b: Anga 14.5'E mānganui ōku teretere'anga, 'e mānganui ōku mate i roto i te au kauvai, te mate nō kō mai i te 'ānana keiā, te mate nō kō mai i tōku 'ua'orāi 'iti tangata, te mate nō kō mai i te au 'ētene; te mate i roto i te 'ōire, te mate i te mētēpara, te mate i roto i te moana, te mate i rotopū i te au taeake pikika'a;

27te ro'iro'i 'anga'anga ē te 'ākia kōpapa, te putuputu i te ngere i te moe, te pongi ē te kakī vai, te 'akakore'angā kai 'e mānganui, te anu ē te kāka'u ravakore.

28Kāre 'oki ē, ko taua au mea i va'o anake 'ua ra. Ko tēia apiapi rā i roto i āku i te rā tātakita'i, ko te kimi'anga i te meitaki nō te au 'ēkālēsia kātoatoa ra.

29Ko 'ai tei paruparu, ē kāre katoa au i paruparu? Ko 'ai tei tūrori, ē kāre tōku ngākau i kā?

30Mē 'inangaro'ia au kia 'akaparau, ka 'akaparau au i te au mea tei 'akaāri mai i tōku nei paruparu.

31Ko te Atua ē te Metua o te 'Atu ra ko Iēsū — tei aia te 'akameitaki'anga mutukore ra! — tei nakiro ē kāre au i pikika'a.

32Anga 9.23-25I āku i Dāmāseko ra, nā te tūtara o te ariki ra ko Āreta i tuku i te tiaki i taua 'ōire ra 'ei 'opu i āku;

33inārā, i tuku'ia au i roto i tēta'i tāpora ma'atama'ata ki raro nā te pae patu nā roto i tēta'i māramarama, e ora atura au mei tōna rima.