Apokalupo 8 - Cook Island Maori Revised New Testament(CIMRNT)

Te 'itu o te 'akairo ē te tūmiāma 'auro

1Kia vāvā'i te Punua Māmoe i te 'itu o te 'akairo, 'e mūtēkī'anga tei te rangi mei tēta'i 'āpa ora te roa.

2Kua kite au i ngā 'āngela e 'itu tei tū i mua i te aroaro o te Atua ē kua 'ōronga'ia e 'itu pū ki a rātou.

3 a: Amo 9.1; b: Exo 30.1,3 Ē kua 'aere mai tēta'i 'āngela kē, ē kua tū i'ora i te pae o te 'atarau ma tēta'i tūmiāma 'auro i te mouranga. Ē 'e ma'ata te rākau kakara i 'ōronga'ia mai ki aia kia tuku atu aia i te reira ma te au pure a te aronga tapu ki runga i te 'atarau 'auro i mua i te terōno.

4Ē kua peke kāpiti atura te au o te rākau kakara mei roto mai i te rima o te 'āngela ma te au pure a te aronga tapu ki mua i te aroaro o te Atua.

5a: Lev 16.12; Ezek 10.2; b: Exo 19.16; Apo 11.19; 16.18Kua rave i'ora te 'āngela i te tūmiāma, kua 'akakī ki te a'i mei runga mai i te 'atarau ē kua titiri maira ki raro ki runga i te 'enua. Kua tupu i'ora te 'aruru, te māngūngū, te uira ē te ngāruerue 'enua.

Ngā pū e 'itu

6Ko ngā 'āngela e 'itu tē mou ra i ngā pū e 'itu, kua 'akate'ate'amamao i'ora i te reira nō te 'akatangi.

7 Exo 9.23-25; Ezek 38.22 Kua 'akatangi te 'āngela mua. Kua topa mai te ua toka i reira ē te a'i kā'iro'ia ki te toto, ē kua titiri'ia ki raro ki runga i te 'enua. Kua pou i'ora te toru o te tu'anga o te 'enua nei i te pakapaka, kua pou te toru o te tu'anga o te au rākau i te pakapaka, ē kua pou te matie mata kātoatoa i te pakapaka.

8Kua 'akatangi i'ora te rua o te 'āngela i tāna pū. Tēta'i mea mei te maunga ma'ata te kā ra i te a'i i tīria'ia ki roto i te tai. Kua riro te toru o te tu'anga o te tai ra 'ei toto.

9Kua mate atura te toru o te tu'anga o te au mea ora ra i roto i te tai, ē kua tākore'ia te toru o te tu'anga o te au pa'ī ra.

10 Isa 14.12 Kua 'akatangi i'ora te toru o te 'āngela i tāna pū. Kua topa tēta'i 'ētū ma'ata, tē mura ra mei te lāmepa rāi mei te rangi mai. Kua topa ki runga i te toru o te tu'anga o te au kauvai ē ki runga i te toru o te tu'anga o te au punāvai.

11Ier 9.15Kua tapa'ia te ingoa o taua 'ētū ra ko Maramara ia. Kua maramara te toru o te tu'anga o te au vai. 'E mānganui te tangata i mate nō te vai 'oki, nō tōna tū maramara.

12 Isa 13.10; Ezek 32.7; Ioel 2.10,31; 3.15 Kua 'akatangi i'ora te 'ā o te 'āngela i tāna pū. Kua pāpā'ia te toru o te tu'anga o te rā, te toru o te tu'anga o te marama ē te toru o te tu'anga o te au 'ētū, kia 'akapōiri'ia te toru o tō rātou tu'anga. Kua ngere i'ora te ao i te toru o te tu'anga o tōna mārama, ē pērā katoa te pō.

13Kua 'ākara atura au, e kua 'akarongo atura i tēta'i 'āeto e rere teitei ra nā runga i te māreva ra i te nā kō 'anga atu ē, “Auē, auē, auē tō te aronga e no'o nei i te ao nei i te tangi'anga o te au pū tā ngā 'āngela e toru e vaitata nei i te 'akatangi.”