1 Petero 2 - Cook Island Maori Revised New Testament(CIMRNT)

Te toka ora ē te 'iti tangata tapu

1Ē tēnā na, e 'akaātea i te au kino rava rāi, te tāpikipiki ē te tū tāpikipiki ē te 'akakino.

2Mei te tamariki 'ānau 'ōu, e kakī i te ū vaerua kā'irokore'ia, kia tupu kōtou ē kia ora i te inu'anga i te reira,

3Sal 34.8mē kua kite tikāi kōtou ē e meitaki te 'Atu.

4E 'akavaitata ki te 'Atu, te toka ora i kōpae'ia e te tangata, i 'iki'ia rā e te Atua 'ei meitaki ma'ata.

5E 'akavaitata ki aia, kia patu'ia kōtou 'ei au toka ora ki roto i tēta'i 'are vaerua, kia riro kōtou 'ei kau ta'unga tapu i te 'apai atu nā roto i a Iēsū Mesia i te au 'ātinga vaerua e mareka mai ei te Atua.

6Isa 28.16Kua tātā'ia 'oki i roto i te Tuatua Tapu ē,

“Inā, tē 'akamou atu nei au i tēta'i toka i Siona,

'e toka ti'avā 'iki'ia 'oki ē te meitaki ma'ata,

ē ko tei 'irinaki ki te reira, kāre rava ia e 'akamā.”

7 Sal 118.22 Ko taua toka ra 'e mea meitaki ma'ata ia ki a kōtou, te aronga tei 'irinaki ra; kāreka ki te aronga tei kore i 'irinaki ra,

“Ko ia te toka i kōpae'ia e te aronga patu 'are ra;

kua 'akariro'ia ra 'ei toka ti'avā.”

8 Isa 8.14,15 Ē pērā katoa,

“kua 'akariro'ia aia 'ei toka tūrori'anga

ē 'ei toka e 'inga ai te tangata.”

Tē 'inga nei rātou, nō te mea, kāre rātou i āru i te karere. I 'ākono'ia 'oki rātou nō te reira.

9 a: Exo 19.5,6; Isa 43.20; b: Exo 19.5; Deut 4.20; 7.6; 14.2; Tito 2.14; c: Isa 43.21; d: Isa 9.2 Ko kōtou rā, 'e uki 'iki'ia kōtou, 'e kau ta'unga ariki, 'e 'iti tangata tapu, ē 'e au tangata nō te Atua anake. Kua kāpiki 'oki aia i a kōtou mei roto mai i te pōiri ki roto i tōna mārama ūmere'ia kia 'akakite kōtou i tāna 'anga'anga ūmere ma'ata'ia.

10Hos 2.23Ko kōtou, kāre i te 'iti tangata i muatangāna, i tēianei rā ko te 'iti tangata ia o te Atua. Ko kōtou tei kore i aro'a'ia mai i muatangāna, kua aro'a'ia mai rā i tēianei.

Kia tau te ora'anga mei tō te au tāvini o te Atua

11E aku au 'akaperepere ē, tē ako atu nei au i a kōtou, mei te aronga kē ē te tuitārere i te ao nei, auraka e āru i tō te kōpapa nei au 'inangaro koia tē tamaki mai nei i te vaerua.

12Kia meitaki te tū o tō kōtou ora'anga i rotopū i te au 'ētene, noa atu ē tē 'akakino nei rātou i a kōtou mei te aronga rave 'anga'anga kino ra, ka 'akakakā rā rātou i te Atua i te rā o tōna tae'anga mai nō tā kōtou au 'anga'anga meitaki tā rātou e kite nei.

13E 'akamōraro i a kōtou ki te au tangata mana 'aka'aere rava rāi nō te 'Atu; koia 'oki, ki te ariki, nō te mea, tei aia te mana ma'ata rava atu,

14mē kāre ra ki te au tūtara, nō te mea, kua tonokia mai rātou e ia 'ei 'akautunga i te aronga rave 'anga'anga kino ē 'ei 'akameitaki i te aronga rave 'anga'anga meitaki.

15Ko tō te Atua anoano 'oki kia 'akamūtēkī'ia te tuatua tikakore o te aronga nēneva e tā kōtou au 'anga'anga meitaki.

16'E aronga rangatira kōtou, inārā, 'e au tāvini rāi kōtou nō te Atua. Auraka e 'akariro i tō kōtou tū rangatira 'ei tāpoki i te 'anga'anga kino.

17E 'akangāteitei i te tangata rava rāi, e aro'a atu i te au taeake. Ka mataku i te Atua, ka 'akangāteitei i te ariki.

Ko te Mesia tō tātou 'ākara'anga

18E te au tāvini ra, e kauraro mārie i tō kōtou au pū ma te mataku, 'eia'a i te au pū meitaki anake 'ua ē te marū, i te au pū roto riri katoa rā.

19Mē mate 'oki tēta'i tangata i te mamae nō te tumu tikakore ē tē 'akakoromaki nei rāi aia nō te Atua, ka 'akameitaki te Atua i aia.

20Mē kua rave kōtou i te mea tikakore ē tē 'akakoromaki nei kōtou mē 'akautunga'ia, 'e a'a te meitaki i roto i te reira? Kia 'akakoromaki rā kōtou mē tāmamae'ia kōtou nō te au mea tika tā kōtou i rave, ka 'akameitaki'ia kōtou e te Atua.

21I kāpiki'ia 'oki kōtou e te Atua nō te reira. Kua nakiro 'oki kōtou ē, kua mate te Mesia nō kōtou, ē kua vao'o i tēta'i 'ākara'anga nō kōtou kia āru kōtou i tōna taka'inga vaevae.

22Isa 53.9Ko te Mesia 'oki “tei kore roa i rave i te 'ara, ē kāre 'ua 'e pikika'a i kitea i tōna va'a,”

23Isa 53.7ko tei 'akakino'ia mai ē kāre i 'akakino atu; ko tei kore i tuatua tāmataku kia tāmamae'ia aia ra, kua 'irinaki 'ua rā ki te 'akavā tuatua tika ra.

24Isa 53.5,6Ko te Mesia 'oki tei 'apai i tā tātou au 'ara i tōna 'ua'orāi kōpapa ki runga i te sātauro, kia riro tātou 'ei aronga tei ti'amā i te au 'ara, te ka ora nō te tuatua tika. Nā roto 'oki i tōna au kāravarava i ora ai kōtou.

25Mei te au māmoe i 'aere kē ra 'oki kōtou, kua 'oki mai rā i tēianei ki te tiaki ē te arataki o tō kōtou au vaerua.