2 Kōrīnētia 3 - Cook Island Maori Revised New Testament(CIMRNT)

Tāvini nō te kōreromotu 'ōu

1E 'akamata 'aka'ou āinei mātou i te 'akameitaki i a mātou 'ua'orāi? Mē kāre rā, 'e mea umuumu'ia āinei kia 'apai atu mātou, mei ēta'i pāpāki ra i rave, i te au leta 'aka'ārāvei ki a kōtou na, mē kāre, nō ko nā mai te au leta 'aka'ārāvei i a kōtou na?

2Ko kōtou 'oki tā mātou leta i tātā'ia ki roto i tō mātou ngākau, kua kitea ē kua tatau'ia e te tangata kātoatoa.

3a: Exo 24.12; b: Ier 31.33; Ezek 11.19; 36.26Kua 'akaāri mai kōtou ē, kua riro tikāi kōtou ē ko te leta a te Mesia ra nā roto i tā mātou 'anga'anga 'ēvangelia, kāre rā i tātā'ia ki te 'inika, i tātā'ia rā e te Vaerua o te Atua ora ra; kāre katoa i tātā'ia ki runga i te papā toka, ki runga rā i te papa o te ngākau tangata.

4'E 'irinaki'anga tēia nō mātou ki te Atua nā roto mai i te Mesia.

5Kāre rā, mei te mea ē kua tūkatau mātou 'ua'orāi i te manako i tēta'i 'ua atu mea mei roto mai i tā mātou 'ua'orāi tika, nō kō mai rā i te Atua tō mātou tūkatau.

6Ier 31.31Ko ia rā tei 'akatūkatau i a mātou kia riro mai 'ei tāvini nō te kōreromotu 'ōu nei, koia 'oki, ko te kōreromotu a te Vaerua, kāre nō te ture i tātā'ia ra. Ko te ture i tātā'ia ra e 'apai mai ia i te mate, ko te Vaerua rā e 'ōronga mai ia i te ora.

7 Exo 34.29 Te Ture tei 'apai mai i te mate i tātā'ia ia ē i pao'ia ki runga i te toka, ē kua tukuna'ia te reira ma te kakā ki a Mōse. Ē kāre atura i rauka i te tamariki a Īserā'ela kia 'ākara tāmou ki tōna mata, nō te kakā 'oki. Ko taua kakā o tōna mata ra tē ngaro 'aere 'ua atura ia.

8Kāre āina e kakā atu te tuku'anga mai i te Vaerua i te reira?

9Mei te mea ē, 'e kakā tō te Ture tei 'aka'apa i te tangata, 'e kakā atu i reira te tāvini'anga i te mea tei 'akatikatika i te tangata.

10Ko te mea 'oki i 'akakakā'ia i mua ra, kāre ōna kakā 'aka'ou, nō te mea, ko te kakā i muri ake 'e ma'ata rava atu ia.

11Mei te mea ē, 'e kakā tō te mea e ngaro 'aere 'ua atura, 'e ma'ata rava atu ia te kakā o te mea vai tinamou.

12Ē tēianei, nō te mea tei a mātou taua mānakonako'anga ra, tē 'anga'anga mā'ora'ora 'ua nei mātou.

13Exo 34.33Kāre 'oki mātou mei a Mōse, ko tei pūroku i tōna mata kia kore te tamariki a Īserā'ela e 'ākara tāmou ki te ngaro 'aere'anga o taua kakā ra.

14Kua 'akapōiri rava'ia rā tō rātou ngākau, nō te mea, tē tāpoki nei rāi taua pūroku ra i tā rātou tatau'anga i te kōreromotu ta'ito ra e tae rava mai ki tēianei rā. Ē kāre 'oki e 'akaātea'ia taua pūroku ra, māri rā, nā te Mesia 'ua'orāi e 'akaātea i te reira.

15E tae rava mai ki tēianei rā, kia tatau'ia a Mōse ra, tē tāpoki nei rāi tēta'i pūroku i tō rātou ngākau.

16Exo 34.34Kia 'āriu rā tēta'i tangata ki te 'Atu ra, ka 'akaātea'ia taua pūroku ra.

17Ē tēianei, ko taua 'Atu ra ko te Vaerua ia; ē ko te tangata tei aia te Vaerua o te 'Atu ra, 'e tū rangatira tōna.

18Tē 'akaāri nei tātou pou roa i te kakā o te 'Atu ma te mata pūrokukore, ē te 'akatūkē'ia nei tātou 'ei tūtū nōna mei tēta'i kakā 'oki ki tēta'i kakā nā roto mai i te 'Atu, ko ia te Vaerua ra.