1Ko Saula rā, tē kī ra rāi 'oki tōna ngākau i te manako tāmataku ē te tāmate rava i te au pipi a te 'Atu ra, ē kua 'aere atura aia ki te Ta'unga Ma'ata ra
2ē kua pati atura ki aia i te au peapa 'akamana i aia ki te au sūnago i Dāmāseko ra, kia arataki tāpeka mai aia ki Iērūsalēma i te au tāne ma te au va'ine katoa tei kitea'ia e ia tei āru i te Mataara ra.
3Ē kia vaitata atura aia i tōna 'aerenga ki Dāmāseko ra, kua 'akapini rava'ia akera aia e tēta'i mārama kakā nō kō mai i te rangi ra.
4Kua topa i'ora aia ki raro i te one, e 'akarongo atura i tēta'i reo i te nā kō'anga mai ki aia, “E Saula, e Saula, 'e a'a koe i tākinga kino mai ei i āku?”
5Kua ui atura aia, “E te 'Atu, ko 'ai koe?”
Kua pa'u maira aia, “Ko au ko Iēsū, tā'au e tākinga kino mai nei.
6Ē tēianei, e tū ki runga, e 'aere ki roto i te 'ōire, ē ka 'akakite'ia mai rāi ki a koe 'e a'a tā'au ka rave e tikāi.”
7Ko te au tangata i tere atu ma ia katoa ra, tū 'ua i'ora rātou ma te mūtēkī. Kua 'akarongo 'oki rātou i te reo, kāre rā rātou i kite i tēta'i 'ua atu tangata.
8Kua tū akera a Saula ki runga mei raro mai i te one, tē pu'era 'ua ra tōna mata, kāre rā aia i kite i tēta'i mea. Kua taki rima atura rātou i aia e tae atura rātou ki Dāmāseko ra.
9E toru rā aia i te matapō'anga; ē kāre aia i kaikai, ē kāre i inu ra.
10Tei Dāmāseko tēta'i pipi, ko Ānania te ingoa. Ē kua tuatua maira te 'Atu ki aia i roto i tēta'i 'ōrama, “E Ānania!”
Kua pa'u atura aia, “E te 'Atu, tēia au.”
11-12Kua nā kō maira te 'Atu ki aia, “E tū, e 'aere atu ki te arāta'a i tuatua'ia ra ē, ko te Mataara tika, ē i reira, i roto i te ngutu'are o Iūda ra, e kimi atu koe i tēta'i tangata nō Tāreso mai, ko Saula te ingoa. Inā 'oki, tē pure ra aia, ē i roto i te 'ōrama kua kite aia i tēta'i tangata (ē ko koe 'oki taua tangata ra, e Ānania) i te tomo'anga ki roto ē te tuku atu'anga i te rima ki runga a'o i aia, kia kite 'aka'ou aia.”
13Kua pa'u atura a Ānania, “E te 'Atu, kua 'akarongo ake nei 'oki au nō runga i te reira tangata nā roto mai i te va'a o te tangata 'e mānganui, i te au kino 'e mānganui tāna i rave ki tō aronga tapu i Iērūsalēma ra,
14ē 'e mana 'oki tōna i konei nō kō mai i te kau ta'unga nunui ra nō te tāpeka i te au tangata kātoatoa tei 'aka'iki i tō ingoa na.”
15Kua pa'u maira te 'Atu ki aia, “E 'aere atu koe, nō te mea, 'e 'āriki 'iki'ia 'oki tēia tangata nāku 'ei 'apai atu i tōku nei ingoa ki mua i te aroaro o te au 'ētene, ē te 'ui ariki, ē te tamariki nā Īserā'ela ra.
16Nāku 'oki e 'akaāri atu ki aia i te au mate 'e mānganui tāna ka mamae nō tōku nei ingoa e tikāi.”
17Kua 'aere atura a Ānania, ē kua tomo atura ki roto i te 'are e no'o'ia ra e Saula, ē kua tuku atura i ōna rima ki runga a'o i a Saula, nā kō atura, “E taku taeake, kua tonokia mai au nei e te 'Atu, e Iēsū, tā'au i kite i te arāta'a i tō'ou 'aerenga mai, kia kite 'aka'ou koe ē kia 'akakī'ia koe i te Vaerua Tapu.”
18Ē i reira rāi, kua topa maira ēta'i mea mei runga mai i ōna mata, mei te una'i ika te tū; ē kua kite 'aka'ou atura aia. Tū akera aia ki runga ē kua bāpetīto'ia i'ora 'oki.
19Ē kia kai aia i te mānga, māro'iro'i 'aka'ou mai akera aia.
Tō Saula ako'anga i DāmāsekoNo'o i'ora a Saula i ēta'i rā ki te au pipi i Dāmāseko ra.
20Ē i taua au rā rāi, kua 'akamata atura aia i te tūtū'aere i roto i te au sūnago nō runga i a Iēsū ē, ko te Tamaiti aia nā te Atua.
21Kua vāvāria i'ora te au tangata rava rāi i te 'akarongo ra, ē kua nā kō akera rātou, “Kāre āinei ē, ko te tangata tēia i tāmate i te aronga i 'aka'iki i tēianei ingoa i Iērūsalēma ra, ē ko tei 'aere mai 'oki ki konei e arataki tāpeka i a rātou ki te kau ta'unga nunui ra?”
22Kua ma'ata 'ua atura tō Saula mana, ē kua tā'ī'ī i'ora te manako o te Ngāti Iūda i no'o i Dāmāseko ra nā roto i tāna 'akapāpū'anga ē ko Iēsū rāi te Mesia.
23 2 Kōr 11.32,33 'E mānganui akera te au rā i topa, kua kotikoti kupenga i'ora te Ngāti Iūda e tāmate i a Saula.
24I 'akakite'ia rā ki a Saula tā rātou moetāpapa'anga. Kua 'ākara matariki atura 'oki rātou i te au ngūtupa o te 'ōire ra i te pō ē te ao e tāmate i a Saula.
25Kua rave i'ora rā tāna au pipi ra i aia, ē kua tuku atura rātou i aia ki raro mei runga mai i te patu 'ōire nā roto i te tāpora ma'ata i te pō ra.
Tei Iērūsalēma a Saula26E tae atura a Saula ki Iērūsalēma, kua tīmata atura aia i te kāpiti atu ki te au pipi ra. Kua mataku i'ora rātou kātoatoa i aia, nō te mea, kāre rātou i 'irinaki ē 'e pipi aia.
27Ko Bānaba rā, kua rave akera aia i a Saula ē kua arataki atura i aia ki te au 'āpōsetolo ra, ē kua 'akamārama atura aia ki a rātou ē, i 'akapē'ea a Saula i te kite'anga i te 'Atu i te arāta'a ra, ē i tā te 'Atu i tuatua mai ki aia ra, ē i 'akapē'ea katoa aia i te ako'anga i te ingoa o Iēsū i Dāmāseko ma te matakukore.
28Kua 'akamata atura a Saula i te 'ā'āere ma rātou katoa i Iērūsalēma, ē i te ako i te ingoa o te 'Atu ma te matakukore.
29Ē kua tuatua katoa atura aia ki te Ngāti Iūda reo Eleni ma te taumārō atu ki a rātou. Ko rātou rā, kua tīmata rātou i te tāmate i aia.
30Kia kite akera te au taeake i te reira, kua arataki atura rātou i aia ki Kaisarea, ē kua tono atura i aia ki Tāreso.
31E 'au atura te 'ēkālēsia e pini rava ake a Iūdea, ē Galilea, ē Sāmāria kātoatoa, ē kua tupu atura ki te ma'ata. Kua 'ā'āere te 'ēkālēsia ma te mataku i te 'Atu ē kua pararauare nā roto i te tauturu o te Vaerua Tapu.
Tei Luda ē Iōpa a Pētero32Tē tāpini 'aere ra a Pētero nā taua au tu'anga 'enua katoa ra, kua tae katoa atura aia ki te aronga tapu i no'o i Luda ra.
33Ē kua kitea atura e ia tēta'i tangata i reira, ko Ainea te ingoa, ka varu akera mata'iti i te 'aka'āvai 'ua'anga ki runga i te ro'i; 'e 'akangoru 'oki aia.
34Kua karanga atura a Pētero ki aia, “E Ainea, nā Iēsū Mesia i 'akaora mai i a koe. E tū ki runga, e ma'ani koe 'ua'orāi i tō'ou ro'i.” Ē kua tū akera a Ainea ki runga i reira rāi.
35Ē te aronga kātoatoa tei no'o i Luda ē Sārona ra, kua kite atura rātou i aia, ē kua 'āriu atura ki te 'Atu.
36Tei Iōpa tēta'i pipi va'ine, ko Tābita te ingoa, ko Dōreka 'oki kia 'akatau'ia. Kua ma'ata rava 'oki tā taua va'ine ra 'anga'anga meitaki ē te 'ōronga'anga 'apinga aro'a.
37Kua roko'ia i'ora aia e te maki i taua ngā rā ra, ē mate rava atura. E oti akera aia i te 'ōrei'ia, vai'o atura rātou i aia ki roto i tēta'i pi'a i runga.
38Nō te vaitata 'oki i a Luda ki Iōpa, kua 'akarongo akera te au pipi ē, tei reira a Pētero. Kua tono atura rātou i e tokorua tangata ki aia e pati ki aia, “E 'aere mai ki a mātou, 'eia'a e tāvare.”
39Kua tū akera a Pētero, ē kua 'aere atura rātou katoa. Kia tae atura aia, kua arataki atura rātou i aia ki roto i taua pi'a i runga ra. Ē kua tū 'ua maira te au va'ine taka'ua rava rāi i tōna pae ma te auē ē te 'akaāriari'anga mai i te au pona ē te au kāka'u kē i roi'ia e Dōreka, i aia i no'o katoa ki ō rātou ra.
40Kua tuku atura a Pētero i a rātou kātoatoa ki va'o, kua tuturi i'ora aia, pure atura. Kua 'uri atura aia ki taua kōpapa ra, nā kō atura, “E Tābita, ka tū!” Pu'era akera tō Tābita mata, kua kite akera aia i a Pētero, ē kua no'o tū maira.
41Kua mou atura a Pētero i tōna rima, 'akatū maira i aia ki runga. Kua kāpiki atura aia i te aronga tapu ē te au va'ine taka'ua ra, ē kua tuku atura aia i a Tābita ki a rātou ra. Kua ora mai 'oki aia ra.
42Kitea pū'ia akera te reira i Iōpa katoa ra, ē 'e mānganui tei 'irinaki i te 'Atu.
43Kua no'o 'ua i'ora a Pētero i Iōpa i te au rā 'e mānganui ki ō tēta'i tangata ko Simona te ingoa, 'e tangata rapakau kiri aia.
Who We AreWhat We EelieveWhat We Do
2025 by iamachristian.org,Inc All rights reserved.