1 Kōrīnētia 5 - Cook Island Maori Revised New Testament(CIMRNT)

'Akaātea'ia atu te au taeake kino

1 Deut 22.30 Kua 'akakite'ia mai tikāi ē, 'e kanga vi'ivi'i tei rotopū i ō kōtou na, 'e tū kanga 'oki ē kāre rava te reira i kitea ake ki ō te 'ētene katoa ra, koia 'oki, tei tēta'i tangata te va'ine a tōna 'ua'orāi metua tāne.

2Ē tē 'akaparau na kōtou! Kāre āina e tau kia auē ngākau kōtou, ē kia 'akaātea kē'ia atu te tangata i rave i taua mea ra mei rotopū atu i a kōtou na?

3Ko au 'oki, noa atu ē kāre tōku kōpapa i kō na, tei kō na rā tōku vaerua. Kua 'aka'apa takere au i te tangata i rave i taua mea ra i te ingoa o tō tātou 'Atu ko Iēsū, mei te mea atura ē, tei kō na tikāi au.

4Tēia tōku manako: kia 'uipā kōtou ma taku vaerua katoa ma te mana o tō tātou 'Atu ra o Iēsū,

5ka tuku atu i taua tangata ra ki a Sātani kia mate tōna kōpapa i tēianei, kia ora rā tōna vaerua i te rā o te 'Atu ra.

6 Gal 5.9 Kāre tā kōtou 'akaparau'anga i te mea meitaki. Kāre āina kōtou i kite ē, ko tēta'i mānga 'ōpue meangiti ra ka 'aka'ōpue'ia i te pōpō varāoa oi katoa'ia ra?

7Exo 12.5Ē tēianei, e 'akaātea tākiri atu i te 'ōpue ta'ito, kia riro mai kōtou 'ei putunga 'ōu. Kua kore 'oki te 'ōpue ta'ito i roto i a kōtou, nō te mea, kua tā'ia tā tātou Punua Māmoe Pāsa ra, koia te Mesia ra, nō tātou.

8Exo 13.7; Deut 16.3Ē nō reira, e 'ākono tātou i taua 'Ōro'a ra, 'eia'a ma te 'ōpue ta'ito, koia 'oki te 'ōpue manava kino ē te 'anga'anga kino, māri rā, ki te kai 'aka'ōpuekore'ia ra, koia 'oki te pikika'akore ē te tuatua mou.

9Kua tātā atu ana au i tāku leta ki a kōtou ē, auraka rava kōtou e kāpiti atu ki te aronga 'akaturi,

10kāre rā ē, ki te aronga kātoatoa o tēianei ao tei 'akaturi, mē kāre ra, ki tei noinoi 'apinga ē te 'aru ra, mē kāre ra, ki tei 'akamori 'ītoro ra. Mei te mea 'oki ē, ko te reira ra, 'e meitaki atu kōtou kia 'akaruke mai i tēianei ao.

11Ko tāku rā e tātā atu nei ki a kōtou ē, auraka rava kōtou e kāpiti atu ki tēta'i 'ua atu tangata tei karanga i aia 'ua'orāi ē 'e taeake, e oti akera, 'e tangata 'akaturi 'ua rāi aia, ē te noinoi 'apinga, te 'akamori 'ītoro, te 'akakino, te konā kava ē te 'aru 'apinga. Auraka rava atu e kaikai ki kō i te reira tūtū tangata.

12 Deut 13.5; 17.7 'E a'a rā tōku tika'anga kia 'akavā atu au i tō va'o ra i te 'ēkālēsia? Kāre āina ē, ko kōtou rāi te ka 'akavā atu i tō roto na?

13Nā te Atua rā e 'akavā atu i a rātou i va'o ra. Kua tātā'ia rā ē, “'Akaātea'ia atu te tangata kino mei roto atu i a kōtou na.”