Rōma 2 - Cook Island Maori Revised New Testament(CIMRNT)

Te 'akavā'anga a te Atua

1 Māt 7.1; Luk 6.37 Ē nō reira, kāre ā'au 'e kōto'e'anga, e tērā ra tangata, noa atu ē, ko 'ai koe tei 'akariro i a koe 'ei 'akavā? Mē tē 'akavā ra koe i tēta'i kē ra, tē 'akakite ra koe ē, kua tārevakē koe 'ua'orāi; nō te mea, ko koe e 'akavā ra, tē rave katoa ra koe i taua au mea ra.

2Kua kite rā tātou ē, 'e 'akavā'anga tika tā te Atua i te aronga i rave i taua au mea ra.

3Tē manako āina koe, e tērā ra tangata ē, i a koe e 'akavā na i te aronga i rave i taua au mea ra, ē tē rave katoa na 'oki koe i taua au mea ra, ka ora āina koe i te 'akavā'anga a te Atua?

4Mē kāre rā, tē 'akava'ava'a 'ua āinei koe i tōna tākinga meitaki ma'ata, te 'akamouririkore ē te 'akakoromaki roa, ma te kore koe e kite ē, nā te tākinga meitaki o te Atua ra e arataki i a koe kia tatarā'ara?

5Nō tō'ou mārō rā ē te tatarā'arakore o tō'ou ngākau, tē 'akaputu ra koe i te riri nō'ou 'ua'orāi nō taua rā riri ra e 'akaāri'ia mai ei te 'akavā'anga tika a te Atua ra.

6Sal 62.12; Mase 24.12Ka tūtaki mai 'oki aia ki te tangata tātakita'i i tei tau ki tāna au 'anga'anga:

7ko te aronga tei kimi i te kakā, te ngāteitei ē te ora'anga matekore nā roto i te rave tāmou mārie'anga i te meitaki, ka 'ōronga'ia mai ki a rātou te ora mutukore;

8ko te aronga rā tei kore i 'āriki i te tuatua mou ra, kua āru rā i te tuatua tikakore nā roto i te manako'anga pu'apinga nōna 'ua'orāi, ka tae mai ei te marekakore ē te riri 'oto'oto ki runga i a rātou.

9Ka tupu 'oki te tūmatetenga ē te mamae ngākau ki te tangata kātoatoa i rave i te kino ra, ko te Ngāti Iūda ana nā mua ē ko te Eleni katoa 'oki.

10Ka 'ōronga'ia rā te kakā, te ngāteitei ē te 'au ki te tangata kātoatoa e rave i te meitaki ra, ko te Ngāti Iūda ana nā mua ē ko te Eleni katoa 'oki.

11Deut 10.17'Āiteite 'ua te tū o tā te Atua 'ākono'anga ki te kātoatoa.

12Ko te aronga katoa tei rave i te 'ara ra, ē kāre ā rātou Ture, ka mate rāi rātou ma te kore ā rātou Ture; ko te aronga katoa ra i te tika a te Ture tei rave i te 'ara, nā te Ture rāi rātou e 'akavā.

13Kāre 'oki ē ko tei 'akarongo taringa 'ua i te Ture ra, 'e aronga tuatua tika rātou i tō te Atua 'ākara'anga, ko tei 'ākono mārie rā i te Ture ka 'akariro'ia rātou 'ei aronga tuatua tika.

14I te mea ē, ko te 'ētene kāre ā rātou Ture, kua rave rāi rātou i tei tau i tā te Ture ra, noa atu ē kāre ā rātou Ture, kua riro rāi rātou 'ei ture ki a rātou 'ua'orāi.

15Kua 'akaāri mai 'oki rātou ē, i tā te Ture i 'akakoro, kua tātā'ia ia i roto i tō rātou ngākau, ē nā tō rātou 'akavā ngākau i turu katoa mai, ē nā tō rātou manako 'ō'onu i roto i a rātou 'ua'orāi e 'aka'apa atu, mē kāre, e 'akatika mai i a rātou,

16i taua rā ra e 'akavā ai te Atua nā roto i a Iēsū Mesia ra i te au mea ngaro i roto i te tangata nei, kia tau ki te 'ēvangelia e tūtū 'aere'ia nei e au.

Te Ngāti Iūda ē te Ture

17Inā, ko koe 'oki, tē karanga na koe i a koe 'ua'orāi ē 'e tangata Ngāti Iūda, ē tē 'irinaki ra koe i te Ture, ē tē ngākau parau ra koe i tō'ou piri'anga ki te Atua.

18Kua kite 'oki koe i tōna anoano, ē tē kite na koe i te mea meitaki rava atu, nō te mea, kua 'āpi'i'ia koe e te Ture.

19Kua pāpū i a koe ē, 'e arataki koe nō tei matapō ra, 'e tūrama nō te aronga e no'o i te pōiri ra,

20'e akoako i te kitekore, 'e pū'āpi'i nō te tamariki, nō te mea, kua rauka i a koe te kī o te kite ē te tuatua mou nō roto mai i te Ture.

21Ko koe 'oki tei 'āpi'i atu i tēta'i kē ra, kāre koe e 'āpi'i i a koe 'ua'orāi? Ko koe 'oki tei ako ē, auraka e keiā, tē keiā ra koe?

22Ko koe 'oki tei karanga ē, auraka e 'akaturi, tē 'akaturi ra rā koe? Ko koe 'oki tei 'akava'ava'a i te au 'ītoro, tē keiā ra rā koe mei roto mai i te au 'iero?

23Ko koe 'oki tei ngākau parau i te Ture ra, tē tā'akamā ra koe i te Atua nā roto i te 'a'ati'anga i te Ture?

24Isa 52.5Nō kōtou 'oki i reira “i 'akakino 'ua'ia ai te ingoa o te Atua i rotopū i te au 'ētene ra,” mei tei tātā'ia ra.

25'E pu'apinga 'oki tō te peritome mē 'ākono koe i te Ture. Mē 'a'ati rā koe i te Ture, kua riro i reira tō'ou peritome 'ei peritomekore.

26Inā, ko te tangata peritomekore ra, mē tē 'ākono ra aia i tei tau i te Ture ra, kāre āinei tōna peritomekore e karanga'ia ē, 'e peritome?

27Ko ia tei kore i peritome kōpapa'ia ra ē tē 'ākono ra rā i te Ture, ka 'akavā mai ia i a koe, nō te mea, kua 'a'ati koe i te Ture, noa atu ē, tei a koe te Ture i tātā'ia ra ē te peritome.

28Kāre 'oki te Ngāti Iūda ā va'o 'ua ra i te Ngāti Iūda tikāi, ē kāre katoa 'oki te peritome kōpapa ā va'o 'ua ra i te peritome tikāi; inārā, ko te Ngāti Iūda ā roto ra ko te Ngāti Iūda tikāi ia.

29Deut 30.6Ē ko te peritome tika tikāi ko te peritome ia o te ngākau tei tau i te Vaerua, ē kāre anake 'ua i te mea i tātā'ia ra. Ē nā te Atua e 'akameitaki i taua tū Ngāti Iūda ra, kāre e nā te tangata.