1 Kōrīnētia 8 - Cook Island Maori Revised New Testament(CIMRNT)

Te kai 'aka'ātinga'ia ki te au 'ītoro

1I tēianei, nō runga i te au mea 'aka'ātinga'ia ki te au 'ītoro ra.

Kua nakiro tātou ē, “'e kite tō tātou pou roa.” 'E 'akaparau'anga rā tō te kite, kāreka te aro'a ra 'e 'akatupu'anga tāna kia ma'ata te meitaki.

2Ko tēta'i 'ua atu tangata e manako ra ē, kua nakiro aia i tēta'i mea kia mārama aia ē, kāre rava aia i kite ake mei tei tau kia nakiro aia ra.

3Ko te tangata rā tei 'inangaro tikāi i te Atua ra, ko ia tei kitea tikāi'ia mai e te Atua.

4Ē nō reira, nō runga i te kai'anga i te au kai i 'aka'ātinga'ia ki te au 'ītoro ra, kua kite tātou ē kāre tākiri 'e 'ītoro i te ao nei, ē kāre rava atu 'e atua māri rā ko te Atua 'okota'i rāi.

5Nāringa 'oki ē, tē vai nei te au mea e karanga'ia nei ē 'e atua, mē i runga i te rangi ra, mē i raro i te 'enua nei, 'e mānganui 'oki i reira te au “atua,” ē 'e mānganui te au “'atu,”

6kāreka rā i a tātou nei, 'e 'okota'i rāi Atua, ko te Metua mei aia mai te au mea kātoatoa nei, ē nōna 'oki tātou e ora ai; ē pērā katoa 'e 'okota'i rāi 'Atu ko Iēsū Mesia, ē nā roto mai i aia te au mea kātoatoa nei, ē nā roto mai i aia e ora ai tātou nei.

7Kāre rā te kātoatoa rava i nakiro i tēia. Tē vai nei rāi tēta'i pāpāki tei mātau ana i te au 'ītoro i mua ake, mē kai rātou i te kai 'aka'ātinga'ia ki te au 'ītoro ra, ka manako rātou e tae 'ua atu ki tēianei rāi rā ē, 'e piri'anga 'ītoro te reira; nō te mea 'oki ē, e paruparu tō rātou 'akavā ngākau, kua tāvi'ivi'i'ia te reira.

8Inārā, kāre ē nā te kai e 'akavaitata atu i a tātou ki te Atua. Kāre tātou e kino atu kia kore tātou e kai i taua kai ra, ē kāre katoa tātou e meitaki atu kia kai tātou.

9Kia matakite rā ko te riro ā'ea tō kōtou tūranga rangatira 'ei tūrori'anga nō tei paruparu ra.

10Nō te mea, mē 'ākara mai tēta'i 'ua atu tangata 'akavā ngākau paruparu i a koe na tei tū i tēia kite i te kaikai'anga i roto i te 'are o te 'ītoro ra, kāre āinei aia e 'akamāro'iro'i'ia kia kai i tei 'aka'ātinga'ia nā te au 'ītoro ra?

11Ka mate 'oki taua tangata paruparu ra nōna i mate ei te Mesia ra, nā roto i tō'ou ra kite.

12Ē nō reira, tē 'ara nei kōtou i te Mesia ra nā roto i tō kōtou 'ara'anga i tō kōtou au taeake ē te tāvi'ivi'i'anga i tō rātou 'akavā ngākau paruparu ra.

13Ē tēianei, mē ko te kai tāku e kai ra ko te tumu ia e topa ai tōku taeake ki roto i te 'ara, kāre rava au e kai 'aka'ou i te kiko manu e tuātau 'ua atu, kia kore rava tōku taeake e topa ki roto i te 'ara.